استانا قالاسى ورتالىقتاندىرىلعان كىتاپحانالار جۇيەسىنە قاراستى بەس كىتاپحانانىڭ بازاسىندا قوعامدىق-مادەني ورتالىقتار تەگىن جۇمىس ىستەيدى. سوندا اشىلعان ۇيىرمەلەر مەن كلۋبتاردىڭ نەگىزگى مىندەتتەرى – بالالار مەن ەرەسەكتەردىڭ بوس ۋاقىتىن ءتيىمدى ۇيىمداستىرۋ, جەكە تۇلعانى جان-جاقتى دامىتۋ, اقپاراتتىق مادەنيەتتى قالىپتاستىرۋ.
كۇن سايىن №15 كوپشىلىك كىتاپحانادا اعىلشىن ءتىلى, ارتتەراپيا, شاحمات جانە توعىزقۇمالاق ۇيىرمەلەرىنىڭ ساباقتارى وتەدى. ال №5 كوپشىلىك كىتاپحانادا اپتاسىنا ءبىر رەت «فلورا» اتتى وسىمدىكتەردى سۇيەتىندەر كلۋبى مۇشەلەرىنىڭ وتىرىسى ۇيىمداستىرىلادى.
سونداي-اق «جەتىستىككە جەتۋ جولى» ىسكەرلىك ادەبيەتتى سۇيەتىندەر كلۋبى جۇمىس ىستەيدى. نەگىزگى مىندەت – كلۋب مۇشەلەرىن پسيحولوگيا, بيزنەس جانە كوممۋنيكاتسيا سالاسىنداعى ءوزىن-ءوزى دامىتۋعا, قوعامدا تۇلعانى بەيىمدەۋگە, ىسكەرلىك مانسابىن قۇرۋعا ىقپال ەتەتىن ادەبيەتتەرمەن تانىستىرۋ. اي سايىن كلۋب وتىرىسىنا قاتىسۋشىلار «ىسكەرلىك ادەبيەت» جاڭالىقتارىمەن تانىسىپ, بۇرىن وقىلعان باسىلىمداردى تالقىلاي الادى.
بالالاردىڭ سۋرەتشى بولۋ ارمانىن جۇزەگە اسىرۋ ءۇشىن №3 كوپشىلىك كىتاپحانادا اپتا سايىن سۋرەت سالۋ, ەرەسەكتەر مەن بالالارعا ارنالعان ارت-تەراپيا كۋرستارى وتەدى. ارتتەراپيا ءومىردىڭ جاڭا تۇستەرىن اشۋعا ارنالعان. «قولونەر» كۋرسىندا بالالار پايدالى جانە جاعىمدى ينتەرەر شەشىمدەرىنىڭ ۇيلەسىمىن بىرىكتىرە وتىرىپ, ساندىك قولونەر جاسايدى.
№12 كوپشىلىك كىتاپحاناداعى «تىلدىك قوعامداستىق» كلۋبى الەۋمەتتىك-مادەني جانە ىسكەرلىك سالالاردا قارىم-قاتىناس جاساۋعا, مەملەكەتتىك تىلدە وقىتۋعا ىقپال ەتەدى. وعان استانا قالاسى تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» ورتالىعى ماماندارى, ۇستازدارى شاقىرىلىپ, ولار مەملەكەتتىك ءتىلدى وقىتۋدان تەگىن كۋرستار جۇرگىزەدى. جالپى وقۋ كۋرسى – 4 اي, ساباقتار اپتاسىنا 3 رەت وتەدى. كۋرستار اياقتالعاننان كەيىن ءبىلىم الۋشىلار تەستىلەۋدەن وتەدى, سەرتيفيكاتتار الادى.
№4 بالالار كىتاپحاناسىنىڭ «نەگەشتەر» كلۋبى باستاۋىش سىنىپ جاسىنداعى بالالاردىڭ وي-ءورىسىن كەڭەيتۋگە ىقپال ەتەدى. كىتاپحانا قىزمەتكەرلەرى اپتاسىنا ەكى رەت كلۋب مۇشەلەرىن شاقىرادى. وسىمدىكتەر مەن جانۋارلار الەمىنە ەنگىزەدى. بىرگە وقىعان كىتاپتاردى, ەرتەگىلەردى تالقىلايدى. بالالارعا ىشكى الەمىن اشۋعا مۇمكىندىك بەرىلەدى.
«جەلەزنودوروجنىي» كەنتىندەگى قارت ادامداردىڭ بوس ۋاقىتىن وتكىزۋگە ارنالعان №4 كوپشىلىك كىتاپحانانىڭ جانىنداعى «اجەتاي» كلۋبى مۇشەلەرى اپتاسىنا ءبىر رەت كىتاپحاناعا جينالادى. ولار بوس ۋاقىتتارىن كىتاپتار اراسىندا وتكىزەدى, اڭگىمەلەسەدى, سالاۋاتتى ءومىر سالتىن ۇستانۋ تاجىريبەلەرىمەن بولىسەدى. كىتاپحانا قىزمەتكەرلەرى ولارعا دارىگەرلەرمەن, زاڭگەرلەرمەن, پسيحولوگتارمەن جانە ت.ب. كەزدەسۋلەر ۇيىمداستىرادى.
