جاعدايىمىز جاقسارىپ, تۇرمىسىمىز تۇزەلگەن سايىن اينالامىزعا سەلسوق, تابيعاتقا نەمقۇرايدى قارايتىنىمىز راس. ەلدىڭ بەتكە ۇستار قالاسى – ەلوردانىڭ ورتالىق كوشەلەرىمەن كەلە جاتساڭىز, جان-جاعىنا قولىنداعى قوقىسىن لاقتىرىپ, تەمەكىسىن تاستاپ, بوتەلكەسىن سىندىرىپ, تۇكىرىپ, ساعىزىن وتىرعىشقا جاپسىرىپ بارا جاتقان تۇرعىنداردى, قالا قوناقتارىن اراگىدىك بولسا دا كەزدەستىرىپ قالاسىز.
ونى جيناپ, تازالايتىن دا ءوزىمىزدىڭ قاراكوزدەر ەكەنىن ەسكەرە بەرمەيمىز. ءجونسىز قىلىق, ياعني قورشاعان ورتاسىن لاستاۋعا قاتىستى اكىمشىلىك جاۋاپكەرشىلىك, ايىپپۇل مولشەرى بەلگىلى بولسا دا, تۇرعىندار تاراپىنان تەرىس قىلىق تىيىلار ەمەس. مۇندايدا اعارتۋشىلىق باعىتتى جانداندىرعان دۇرىس دەپ ەسەپتەيمىن. سەبەبى قوعامدىق ورىندارداعى مىنەز-قۇلىق ەرەجەلەرى, تازالىق ماسەلەسى بالالارعا جاستايىنان ناسيحاتتالسا, وسى باعىتتا قوعامدىق كولىكتەردە ۇدايى ارنايى جاسالعان روليكتەر كورسەتىلسە, ونىڭ اسەرى زور بولار ەدى.
قالاي بولعاندا دا, ەكىنشى ميلليونعا اياق باسقان استانانىڭ تۇرعىندارى, ەلوردانىڭ كوشەلەرى ەلىمىزگە ۇلگى بولۋى ءتيىس.
