«سارىارقا» ماگيسترالدىق گاز قۇبىرىنىڭ قۇرىلىسىن جىل سوڭىندا اياقتاپ, نۇر-سۇلتان قالاسىندا گاز تاراتۋ جەلىلەرىن سالۋ, جەكە سەكتور تۇرعىن الاپتارى مەن ەنەرگيا كەشەنىن تابيعي گازعا اۋىستىرۋ بويىنشا جول كارتاسى وتكەن جىلدىڭ شىلدەسىندە بەكىتىلگەن بولاتىن.
«تۇڭعىش پرەزيدەنت – ەلباسى نۇرسۇلتان نازارباەۆ ەلوردانى گازداندىرۋدى تاپسىردى. بۇگىن جەلى قۇرىلىسى باستالدى. جوبانىڭ ىسكە اسىرىلۋ مەرزىمى دە, ساپاسى دا قاتاڭ باقىلاۋدا بولادى. كەلەسى جىلۋ بەرۋ ماۋسىمى باستالعانعا دەيىن ادامدار گازدى ۇيگە وتكىزىپ ۇلگەرۋى ءۇشىن جوبانىڭ ءبىرىنشى كەزەڭىن 2020 جىلدىڭ جازىندا اياقتاۋ كوزدەلىپ وتىر. تەحنيكالىق قاداعالاۋ توسەمنىڭ تەرەڭدىگىن, جىلۋ وقشاۋلاۋ نورمالارىن, گاز قۇبىرلارىنىڭ تۇيىسۋلەرىن جانە ورىندالاتىن جۇمىستىڭ ساپاسىن زەردەلەۋگە ءتيىس. مەرزىمى بويىنشا تەزدەتۋ كەرەك» دەگەن قالا اكىمى التاي كولگىنوۆ گاز قۇبىرىنىڭ نەگىزگى ماگيسترالدارى جىل سوڭىنا دەيىن جۇرگىزىلەتىنىن ايتتى.
بۇگىندە نۇر-سۇلتان قالاسىندا گاز قابىلداۋ مەن تاراتۋ جۇمىسى ەكى باعىتتا جۇرگىزىلىپ جاتىر. ءبىرىنشى باعىت – گاز تاراتۋ كوممۋنيكاتسيالارىن №1 جىلۋ ەلەكتر ورتالىعى مەن №2 جىلۋ ەلەكتر ورتالىعىنا تارتۋ جۇمىستارى. گازدىڭ نەگىزگى تۇتىنۋشىلارى وسى ەكى ورتالىق بولادى, ياعني استاناعا كەلەتىن گازدىڭ 90 پايىزىن تۇتىنادى. ەكىنشى باعىت بويىنشا – تۇرعىندارعا گاز تاراتۋ جەلىلەرىنىڭ قۇرىلىسى جۇرگىزىلۋدە. جوبانىڭ ءبىرىنشى كەزەگىندە جىلۋ ەلەكتر ورتالىقتارىنا, «كوكتال-1», «كوكتال-2» ىقشام اۋداندارىنا, جەلەزنودوروجنىي كەنتىنە, وڭتۇستىك-شىعىسقا (وڭ جانە سول) دەيىن گاز تاراتۋ جەلىلەرىنە وتىن بەرۋدى كوزدەيدى. ءبىرىنشى كەزەك اياقتالعان سوڭ 13,5 مىڭ ءۇيدىڭ تۇرعىندارى كوگىلدىر وتىننىڭ قىزىعىن كورمەك. جوبانىڭ ەكىنشى كەزەگىندە ميچۋرينو, ينتەرناتسيونالنىي, كۇيگەنجار, تەلمان, پريگورودنىي, Garden Village, Family Village تۇرعىن الاپتارى تۇر. ال يلينكا, شۇبار, ءوندىرىس تۇرعىن الاپتارى ءۇشىنشى كەزەكتە گازداندىرىلاتىن بولادى.
جوبالاۋشىلاردىڭ ايتۋىنشا, گاز تاراتۋ جەلىلەرى كوشە جەلىسى بويىنشا جۇرگىزىلەتىن بولادى, ارنايى ەسەپتەۋىشتەر دە قاراستىرىلعان. جەكە سەكتور تۇرعىندارى گازدى تىكەلەي كوشە جەلىسىنەن ۇيلەرىنە قوسادى. گاز وتكىزۋ اتموسفەراداعى زياندى قالدىقتاردى 6 ەسەگە, قاتتى زاتتاردى 35 مىڭ تونناعا ازايتۋعا مۇمكىندىك بەرمەك.
