«كوكتال-2» تۇرعىن الابىنىڭ ينفراقۇرىلىمىن دامىتۋ 2012 جىلى باستالدى. الايدا ارادا التى جىل وتسە دە, اتقارىلار ءىس ءالى شاش ەتەكتەن. جۋىردا قالالىق ءماسليحات حاتشىسى جانات نۇرپەيىسوۆتىڭ جەكە قابىلداۋىندا بولعان اتالمىش تۇرعىن الاپتىڭ ءبىر توپ تۇرعىندارى اباتتاندىرۋ تىم سوزىلىپ كەتكەنىنە, تروتۋارلاردىڭ سالىنباعانىنا, جولداردىڭ توزعانىنا, كارىز قۇدىقتارىنىڭ اشىق جاتقانىنا, قوقىس الاڭدارىنىڭ جەتكىلىكسىزدىگىنە شاعىمداندى.
وسى اڭگىمەدەن كەيىن ءماسليحات حاتشىسى №68 ورتا مەكتەپتە تۇرعىنداردىڭ سارىارقا اۋدانى اكىمدىگىنىڭ وكىلدەرىمەن, قالانىڭ بىرقاتار باسقارمالارىنىڭ قىزمەتكەرلەرىمەن, مەردىگەر ۇيىمداردىڭ باسشىلارىمەن كەزدەسۋىن ۇيىمداستىرىپ, تۋىنداعان ماسەلەنى تالقىلادى.
«جوبانىڭ جالپى قۇنى – 8 ملرد تەڭگە. بۇل رەسپۋبليكالىق بيۋدجەتتەن قارجىلاندىرىلىپ وتىر. مەردىگەر وزىنە العان مىندەتتى بيىل تولىعىمەن ورىندايمىن دەپ ۋادە بەردى. وسى جىلى جۇمىستاردى اياقتاۋ ءۇشىن قالعان 1 ملرد تەڭگەنىڭ ءبولىنۋ ماسەلەسىن اكىمدىكتىڭ الدىنا قويۋ كەرەك. ەگەر بيۋدجەت وسىنداي مۇمكىندىك بەرسە, جۇمىستىڭ نەگىزگى بولىگى اياقتالادى. ماسەلە قارجىلاندىرۋدا بوپ تۇر» دەدى جانات نۇرپەيىسوۆ.
قالالىق ءماسليحاتتىڭ وتىرىستارىندا جولداردى سالۋ ماسەلەسى قىزۋ پىكىرتالاسقا ۇلاسقانىن تالاي ەستىدىك. سوندا كەيبىر مەكتەپتەر مەن بالاباقشالارعا اپاراتىن جولدار سالىنباعانى دا ايتىلدى. ارينە, كولىك يەلەرى دە سودان زارداپ شەگۋدە. كەزدەسۋگە قاتىسۋشىلار وسىعان نازار اۋداردى. «ۋاقىتشا اسفالت توسەۋگە بولماي ما؟ بالالارىمىز كۇز جانە كوكتەم مەزگىلدەرىندە مەكتەپكە باتپاقتى كەشىپ جەتەدى. ەلدى مەكەندە كەدىر-بۇدىرى كوپ كەم دەگەندە بەس كوشە بار. سولاردى اينالىپ وتەمىز دەپ, باراتىن جەرىمىزگە كەشىگىپ جەتىپ جاتامىز» دەيدى ولار.
مەردىگەر ۇيىم وكىلىنىڭ ايتۋىنشا, قازىرگى تاڭدا ءتيىستى جۇمىستار 70 پايىزعا ورىندالعان. كەستەگە سايكەس جولدار قۇرىلىسى بيىل اياقتالماق. جاز بىتكەنشە قالعان كوشەلەرگە اسفالت توسەلەدى. «تۇرعىن الاپتىڭ شىعىسىندا ورنالاسقان كوشەلەردى اسفالتتاۋدى اياقتاۋ عانا قالدى. ۇلىتاۋ كوشەسى اسفالتتالدى. وسى ايدا بوستاندىق كوشەسىنە اسفالت توسەۋ جوسپارعا ەنگىزىلدى. سايكەس جۇمىستار امانتوعاي جانە كوكتال كوشەلەرىندە دە جۇرەدى» دەپ ءتۇسىندىردى ول.
بىراق ماسەلە جولدار قۇرىلىسىندا عانا ەمەس ەكەن. ءتيىستى جوباعا سايكەس مۇندا نوسەر جانە شارۋاشىلىق-تۇرمىستىق كارىز, ەلەكتر جانە سۋ جەلىلەرى دە سالىنۋى كەرەك.
«ينفراقۇرىلىم قۇرىلىسىنىڭ جوباسى بار. بۇل جوبا ساراپتامادان ءوتتى. سايكەس جۇمىستارعا جىل سايىن ءبولىنىپ وتىرعان قارجى 100 پايىز يگەرىلۋدە. جوبا بويىنشا وسى جىلعا 965 ملن تەڭگە ءبولىندى. ەسەپتەۋ جاسالعان سوڭ, كەستە بويىنشا جۇمىستاردى اياقتاۋعا بۇل قارجى جەتپەيتىندىگى انىقتالدى. قوسىمشا قارجى الۋ ءۇشىن اكىمدىككە حابارلاستىق. بيۋدجەتتىك تاپسىرىسقا سايكەس جۇمىستاردى بىتىرۋگە تاعى 1 ملرد تەڭگە سۇراۋعا بولادى. ال ازىرگە قولدا بار قارجىعا اباتتاندىرۋ مەن كەيبىر كوشەلەرگە اسفالتتىڭ جوعارعى قاباتىن سالۋ جوسپارلانىپ وتىر» دەدى كولىك جانە جول-كولىك ينفراقۇرىلىمىن دامىتۋ باسقارماسى باسشىسىنىڭ ورىنباسارى دارحان بورانباەۆ.
تۇرعىن الاپقا كارىز قاشان تارتىلادى دەگەنگە كەلسەك, بۇل ماسەلەنى «استانا سۋ ارناسى» مقك ديرەكتورىنىڭ ورىنباسارى سەرگەي ۆيلكوۆ ءتۇسىندىردى. ونىڭ سوزىنشە, جەتكىزۋشى كوللەكتوردىڭ قۇرىلىسى اياقتالىپ قالدى. بۇل ءىس كۇزگە دەيىن ءبىتىپ, كوللەكتور تولىق قۋاتىندا جۇمىس ىستەي باستايدى. كولىك جانە جول-كولىك ينفراقۇرىلىمىن دامىتۋ باسقارماسى سالىپ جاتقان بارلىق كوشەلەر كارىزدىڭ ورتالىق جۇيەسىنە قوسىلادى.
«نوسەر كارىزى جۇمىس ىستەۋ ءۇشىن ءبىرىنشى كەزەكتە ەلەكترقۋاتى كەرەك. سوسىن كارىزدىك سورعى ستانساسىن قوسىپ, قازىر سالىنىپ جاتقان باستى جەلىگە جالعاۋ قاجەت» دەپ ءتۇسىندىردى مەردىگەر.
كەنتتە جۇمىس ىستەمەي تۇرعان قۇدىقتار بار ەكەن. تۇرعىندار ولاردى جابۋدى سۇرادى. جاۋاپتى مەكەمە وكىلىنىڭ سوزىنشە, قاقپاقتار ءجيى ۇرلانعاندىقتان, قۇدىقتار اشىق قالىپ جاتادى. «بۇل ماسەلەنى جۋىق ارادا شەشۋگە تىرىسامىز» دەدى ول.
سارىارقا اۋدانى اكىمدىگىنىڭ وكىلى تۇرعىن الاپتا جاقىندا قوقىس الاڭدارىنىڭ قۇرىلىسى اياقتالاتىنىن جەتكىزدى. ونىڭ ايتۋىنشا, «كوكتال-2»-گە 80-نەن استام كونتەينەر ءبولىندى. الايدا الاپ تۇرعىندارىندا قوقىستى شىعارۋ بويىنشا 3 ملن تەڭگە شاماسىندا قارىز جينالىپ قالىپتى.
«كونتەينەرلەردى ورناتقاندا قوقىس تاسيتىن كولىككە ارنالعان «قالتانى» دا سالۋ كەرەك. ايتپەسە, قوقىستى ارتۋعا كەلگەندە بۇل كولىكتەر جەكە كولىكتەردىڭ جۇرۋىنە ۇنەمى كەدەرگى كەلتىرىپ جاتادى. سوسىن كونتەينەرلەردى ورناتقاندا بىزبەن دە اقىلداسساڭىزدار دەگەن تىلەگىمىز بار» دەدى كوكتالدىقتار.
تۇرعىندار سارىارقا اۋدانى اكىمدىگىنەن كەنتكە كىرەبەرىستە كوشەلەردىڭ اتاۋى جازىلعان بەلگى ورناتۋدى دا سۇرادى. بۇل كەزدەسۋدە قالالىق ءماسليحات حاتشىسى جانات نۇرپەيىسوۆ, ءماسليحات دەپۋتاتى زۇلپىحار عايىپوۆ بارلىق ۇسىنىس-تىلەكتەر ەسكەرىلەتىنىن جەتكىزدى.
ءماسليحات حاتشىسى ىلە-شالا «نۇر وتان» پارتياسى قالالىق فيليالىنىڭ قوعامدىق قابىلداۋىندا حالىقتى جەكە ءماسەلەلەرمەن قابىلدادى. ونىمەن كەزدەسۋگە كەلگەن ءتورت ادام ازاماتتاردىڭ جەكە ساناتتارىنا الەۋمەتتىك كومەك كورسەتۋ, تۇرعىن ءۇي-كوممۋنالدىق شارۋاشىلىق, جۇمىسپەن قامتۋ ماسەلەلەرىن شەشۋدى سۇرادى. جانات نۇرپەيىسوۆ ولاردى مۇقيات تىڭداپ, بارلىق ماسەلەنى زاڭدىق تۇرعىدان ءتۇسىندىردى. بۇعان قوسا, ءتيىستى مەملەكەتتىك ورگاندارعا حاتتاردى جونەلتىپ, تۇرعىندار تۇيتكىلدەرى باقىلاۋىندا بولاتىنىن ايتتى.
