كومەكتەن كەندە قالمايدى

نۇر-سۇلتان قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ حابارلاۋىنشا, بيىل ەلوردادا 14 929 كوپبالالى وتباسى مەن 41 184 از قامتىلعان ازاماتقا الەۋ­مەتتىك قولداۋ كورسەتۋ جوسپارلانۋدا. جالپى, قالادا وسى جىلى 159 مىڭ ادامعا ءارتۇرلى كومەك كورسەتىلمەك. بۇل قاتارعا جاسىنا بايلانىستى زەينەتكە شىققان 82 290 ادام, 64 ۇلى وتان سوعىسى ارداگەرى, 25 719 مۇمكىندىگى شەكتەۋلى ازامات, سونىڭ ىشىندە 5 316 ەرەكشە قاجەتتىلىگى بار بالا ەنىپ وتىر.

جاڭا فورماتتاعى اتاۋلى الەۋمەتتىك كومەك

وسى كۇنگە دەيىن جالپى سوماسى 2 ملرد تەڭگەنى قۇرايتىن اتاۋلى الەۋمەتتىك كومەك 7 029 وتباسىعا نەمەسە 42 174 ادامعا تولەندى. سونىڭ 3 613-ءى كوپبالالى وتباسى (22 427 ادام). 1516 وتباسىنىڭ وتىنىشتەرى بەلگىلى ءبىر سەبەپتەرمەن قابىلدانبادى.
كۇنكورىس دەڭگەيىنىڭ ەڭ تومەنگى شەگى 33 358 تەڭگەنى, كەدەيلىك شەگى 23 351 تەڭگەنى قۇرايتىنىن ايتا كەتەيىك.

«جاپپاي وقىتۋ» قورى مەن «مەكتەپكە جول» شاراسى

«جاپپاي وقىتۋ» قورى اياسىندا ءار وقۋشىعا 30 مىڭ تەڭگەلىك جالپى سوماسى 384 ملن تەڭگەنى قۇرايتىن 12,8 مىڭ سەرتيفيكات بەرىلدى. «مەكتەپكە جول» قايىرىمدىلىق شاراسى شەڭبەرىندە 77 ملن تەڭگە سوماسىنا 6 042 بالاعا دەمەۋشىلەردىڭ ەسەبىنەن كومەك كورسەتىلدى.

قولجەتىمدى باسپانامەن قامتۋ

تۇرعىن ءۇي كەزەگىندە 47 646 ادام, سونىڭ ىشىندە 3 912 كوپبالالى وتباسى تۇر. بۇل قاتاردا الەۋمەتتىك وسال توپ ساناتىنا جاتاتىن 18 355 ادام, 2 758 جەتىم بالا, 22 528 مەملەكەتتىك قىزمەتكەر مەن بيۋدجەتتىك ۇيىمدار قىزمەتكەرى دە بار.
جىل باسىنان بەرى 518 پاتەر بەرىلدى. سونىڭ 336-سى تۇرعىن ءۇي كەزەگىندە تۇرعاندارعا, 24-ءى كوپبالالى وتباسىلارعا ءبولىندى. (10 پاتەر ساتىپ الۋ قۇقىعىنسىز جالعا بەرىلدى, 14 پاتەر – نەسيەلىك باسپانا).
كونستيتۋتسيا كۇنىنە وراي «بەرەكەلى باسپانا» اتتى ساتىپ الۋ قۇقىعىنسىز پاتەرلەردى جالعا بەرۋ قالالىق باعدارلاماسى اياسىندا تۇرعىن ءۇي كەزەگىندە تۇرعاندارعا 298 پاتەر بەرىلدى. سونىڭ 150-ءى كوپبالالى وتباسىلارعا, 148-ءى الەۋمەتتىك وسال توپتارعا ءبولىندى.
بيىل كوممۋنالدىق تۇرعىن ءۇي قورىنان 1 322 پاتەر ءبولۋ جوسپارلانىپ وتىر (419 – ارەندالىق, 903 – نەسيەلىك. سونىڭ ىشىندە 452 كەزەكتە تۇرعاندارعا).
بيۋدجەتتىك قىزمەتكەرلەرگە 1 ملن تەڭگە كولەمىندە 500 تۇرعىن ءۇي سەرتيفيكاتى ءبولىندى. بۇگىنگى كۇنگە دەيىن ءبىلىم, دەنساۋلىق ساقتاۋ, ارنايى الەۋمەتتىك قىزمەت, پوليتسيا دەپارتامەنتى قىزمەتكەرلەرىنە 397 سەرتيفيكات تاپسىرىلدى.
«باقىتتى وتباسى» باعدارلاماسى بويىنشا 2 365 جولداما بەرىلدى (834 كوپبالالى وتباسىعا, 1143 تولىق ەمەس وتباسىعا جانە ەرەكشە قاجەتتىلىگى بار بالالاردى تاربيە­لەپ وتىرعان 388 وتباسىعا).
تولەم قابىلەتىن باعالاۋ ءۇشىن 857 ءوتىنىش قابىلداندى (309 كوپبالالى وتباسىدان, 400 تولىق ەمەس وتباسىدان, ەرەكشە قاجەتتىلىگى بار بالالاردى تاربيەلەپ وتىرعان 148 وتباسىدان). سونىڭ ىشىندە 5,9 ملرد تەڭگە سوماسىنا 414 ءوتىنىش ماقۇلداندى. 1,4 ملرد تەڭگە سوماسىنا 103 نەسيەلىك قارىز بەرىلدى. بۇل قارىز «تۇرعىنۇيقۇرىلىسجيناقبانك» اق ارقىلى 20 جىلعا دەيىن, 2 پايىز وسىممەن, 1 ملن تەڭگە كولەمىندەگى باستاپقى جارنانى جەرگىلىكتى بيۋدجەتتەن جارتىلاي سۋبسيديالاۋمەن پاتەر ساتىپ الۋعا بەرىلەدى. بۇل ماقساتقا 1 ملرد تەڭگە (1000 تۇرعىن ءۇي سەرتيفيكاتى) قاراستىرىلعان.
«نۇرلى ەرتىس» باعدارلاماسى بويىنشا جىل باسىنان بەرى ەكىباستۇز قالاسىنا 222 وتباسى كوشىرىلدى (بارلىعى 1161 ادام, مۇنىڭ 781 بالا).
«ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ مەملەكەتتىك باعدارلاماسى اياسىندا سولتۇستىك قازاقستان وبلىسىنا 62 وتباسى (212 ادام) قونىس اۋداردى. وتىنىشتەردى قابىلداۋ جالعاسۋدا.
وسى جىلدىڭ اياعىنا دەيىن «نۇرلى جەر» باعدارلاماسى شەڭبەرىندە 616 كوپبالالى وتباسى باسپانامەن قامتىلادى.

نەسيەلەردى وتەۋ

22 544 ادامنىڭ 6,7 ملرد تەڭگە كولەمىندەگى نەسيەلىك قارىزى وتەلەدى.

جۇمىسقا تۇرۋعا جاردەمدەسۋ

جىل باسىنان بەرى 15 194 ازامات جۇمىس ىزدەپ كەلدى. جۇمىسسىزدىقتان الەۋمەتتىك قورعاۋ شارالارىمەن 7 502 ادام (48,7 %) قامتىلدى. سونىڭ ىشىندە 6 919 ادام جۇمىسقا تۇرعىزىلدى (تۇراقتى جۇمىسقا 3 778 ادام تۇرعىزىلىپ, 2 029 ادام قوعامدىق جۇمىستارعا جىبەرىلدى; جاستار پراكتيكاسىمەن 865 ادام, الەۋمەتتىك جۇمىس ورىندارىمەن 154 ادام قامتىلدى).
قىسقامەرزىمدىك كۋرستارعا 583 ادام جىبەرىلىپ, 49 ازامات بيزنەس-­يدەيالارىن جۇزەگە اسىرۋعا گرانتتار الدى.
قىسقامەرزىمدىك كۋرستارعا جىبەرىلگەن ادامدار سانى 700-دەن 2 113 ادامعا ارتتى. كۋرستار ەڭبەك نارىعىنداعى سۇرانىسقا يە 102 ماماندىق بويىنشا ۇيىمداستىرىلۋدا.
جاڭا بيزنەس-يدەيالاردى جۇزەگە اسىرۋعا مەملەكەتتىك گرانتتار جوسپارى 100-دەن 2 200-گە ءوستى. گرانت كولەمى ەكى ەسەگە ارتىپ, 100 اەك-تەن 200 اەك-كە (505 مىڭ تەڭگە) جەتتى.
جىل باسىنان بەرى 14 927 تۇراقتى جاڭا جۇمىس ورىندارى قۇرىلدى (سونىڭ ىشىندە شاعىن بيزنەس سالاسىندا 14 705 ورىن).
859 جۇمىس بەرۋشىدەن مالىمەتتەر بازاسىنا 7 825 بوس ورىن تىركەلدى. اتاپ ايتقاندا, 100 مىڭ تەڭگەگە دەيىن جالاقىمەن 4,2 مىڭ ورىن; 100 مىڭ تەڭگەدەن 150 مىڭ تەڭگەگە دەيىن 2 مىڭ ورىن, 150 مىڭ تەڭگەدەن جوعارى جالاقىمەن 1,6 مىڭ بوس ورىن بار. سونىڭ ىشىندە قۇرىلىس سالاسىندا – 1707, كولىك جانە بايلانىستا – 396, بىلىمدە – 1696, دەنساۋ­لىق ساقتاۋدا – 554, ساۋدادا – 819, ونەركاسىپتە – 464, تۇرعىن ءۇي جانە تاماقتانۋدا – 244, ت.ب.

تەگىن ءدارى بەرىلەدى

تەگىن مەديتسينالىق كومەكتىڭ كەپىلدەندىرىلگەن كولەمى شەڭبەرىندە ديسپانسەرلىك ەسەپتە تۇرعان پاتسيەنتتەر تەگىن دارىمەن قامتاماسىز ەتىلدى. سونىڭ ىشىندە الەۋمەتتىك وسال توپتارعا ءدارى الۋعا 7,2 ملرد تەڭگە ءبولىندى.

ءبىلىم بەرۋ گرانتتارى

2019 جىلى 49 گرانت بەرىلدى. سونىڭ ىشىندە كوپبالالى وتباسىلاردان شىققان 48 بالا مەن تۋعانىنان مۇگەدەكتىككە شالدىققان 1 بالاعا تاپسىرىلدى. قازىرگى كەزدە گرانتپەن 138 ستۋدەنت وقۋىن جالعاستىرىپ جاتىر. جالپى, وسى قاتارداعى وقۋىن اياقتاعان 304 جاس ماماندىقتارى بويىنشا جۇمىسقا تۇرعىزىلدى.

دينارا احمەتبەكوۆا,
كوپبالالى انا:

– 2002 جىلدان بەرى وسى قالادا تۇرامىز, بەس بالامىزدىڭ تورتەۋى ەلوردادا دۇنيەگە كەلدى. تەكسەرۋ كومسيسسياسى جاعدايىمىزدى كورىپ كەتكەننەن كەيىن ماۋسىمنىڭ سوڭىنان باستاپ اتاۋلى الەۋمەتتىك كومەكتى الا باستادىق, شۇكىر, سول كومەكتىڭ ارقاسىندا جاعدايىمىز تاۋىرلەنىپ قالدى. كوپ جىلدان بەرى باسپانا كەزەگىندە تۇرعانبىز, ءوزىم ۋچاسكەلىك مەدبيكەمىن, جولداسىم قۇرىلىسشى, جۋىردا كوپبالالى وتباسى رەتىندە ءۇش بولمەلى پاتەرگە قول جەتكىزدىك. مەملەكەتتىڭ كوپ بالالى وتباسىلارعا جاساپ جاتقان قامقورلىعىن سەزىنىپ جاتىرمىز. بۇل تۇرعىدا ەل باسشىلارىنا قالا اكىمىنە, ەلدىڭ جايىن ويلاعان ازاماتتارعا العىس بىلدىرەمىز. ءبىز ءۇشىن نۇر-سۇلتان قالاسىنا جەتەتىن جەر جوق, قانشاما يگىلىكتەر كورىپ جاتىرمىز, قالامىزدىڭ كۇننەن كۇنگە كوركەيگەنى دە ءبىزدى قۋانتادى.

ءمولدىر امىربەكوۆا,
كوپبالالى انا:

– ەلورداعا 2009 جىلى كوشىپ كەلگەننەن باستاپ مەملەكەت تاراپىنان الەۋمەتتىك قولداۋ ارقاشان كورسەتىلىپ كەلەدى. قازىر التى بالام بار. 2014 جىلعى مامىر ايىندا ەلباسىنىڭ قولىنان كۇمىس القا ماراپاتىن العان بولاتىنمىن. بۇگىندە بالالارىمنىڭ الدى وقۋ ءبىتىرىپ, ءوز الدىنا وتاۋ تىگىپ تە ۇلگەردى. 2012 جىلى ءۇي كەزەگىنە تۇرعان ەدىم, بيىل مىنە, كوپتەن كۇتكەن قۋانىشقا دا قول جەتكىزىپ, ءۇش بولمەلى پاتەرگە يە بولدىق. وسىنداي مۇمكىندىك بەرىپ جاتقانى ءۇشىن مەملەكەت باسشىسىنا دا, قالالىق اكىمدىككە دە العىسىم شەكسىز.