ەلورداداعى «Has Sanat» ونەر گالەرەياسىندا قازاقستان سۋرەتشىلەر وداعىنىڭ مۇشەسى, كوركەمسۋرەت اكادەمياسىنىڭ اكادەميگى, قازاقستاننىڭ ەڭبەك سىڭىرگەن ونەر قايراتكەرى, بەلگىلى قىلقالام شەبەرى ءماجيت بايتەنوۆتىڭ «ۇلى دالانىڭ سىرلارى» اتتى جەكە كورمەسى اشىلدى.
كورمەدە جاقىندا جەتپىس جاستىڭ جوتاسىنا شىققان سۋرەتشىنىڭ وتكەن عاسىردىڭ توقسانىنشى جىلدارىنان بۇگىنگى كۇنگە دەيىن كەسكىندەگەن كارتينالارى قامتىلدى. ءماجيت بايتەنوۆ ءوزىنىڭ شىعارماشىلىعىندا كونە تاريحتى, سونىڭ ىشىندە تۇركى حالىقتارىنىڭ تاريحىن, سالت-داستۇرلەرىن بەينەلەۋگە بەيىم. كوپتەگەن سۋرەتتەرىندە تامعالى پەتروگليفتەرى كوزگە شالىنادى. سونداي-اق, اۋىل تاقىرىبى دا جانىنا جاقىن. سۋرەتشى شىعارماشىلىعىنىڭ ءبىر ەرەكشەلىگى, ول كارتينالارىن اۆانگاردتىق, ابستراكتىلى ستيلدە سالادى.
بۇل كۇندەرى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ «ساۋلەت جانە ديزاين» كافەدراسىنىڭ دوتسەنتى رەتىندە شاكىرت تاربيەلەپ وتىر. سۋرەتشى «سۋرەت وقۋلىعى» اتتى ادىستەمەلىك قۇرالدىڭ اۆتورى.
قىلقالام شەبەرىنىڭ مەرەيتويلىق كورمەسىنە ارىپتەستەرى, بەينەلەۋ ونەرىنىڭ جانكۇيەرلەرى كوپ جينالدى. سۋرەتشىگە سۋرەتشىلەر وداعىنىڭ نۇر-سۇلتان قالاسى فيليالىنىڭ اتىنان سىي-قۇرمەت كورسەتىلدى. فيليال توراعاسى جانۇزاق ءمۇساپىر ءسوز سويلەپ, كوركەمسۋرەت اكادەمياسىنىڭ «التىن مەدالىن» تاپسىردى. اتالمىش كورمە 13 تامىزعا دەيىن جالعاسادى.
