جان راقاتىن سەزىنىپ, كوڭىل كوتەرىپ, جاقسى دەم الىپ سەرگىپ قايتۋدىڭ تاماشا ءتاسىلى ساياحات ەكەنىندە تالاس جوق. الايدا ساياحاتتايمىن دەپ سىرىن بىلمەيتىن جات ەلگە بارىپ سىرقاتتانىپ قالعان نەمەسە جۇقپالى اۋرۋ تارالىپ جاتقان ەلدەردەن تارالعىش دەرت جۇقتىرىپ العان تۋريستەر دە كەزدەسەدى. سوندىقتان شەتەلگە ساياحات جاساۋدىڭ الدىندا باسا نازار اۋداراتىن تۇيىندەردىڭ ءبىرى – باراتىن ەلىڭىزدە جۇقپالى اۋرۋ تارالعان-تارالماعانىن انىقتاپ الۋ.
اتاپ ايتقاندا, ساپارعا شىعاردان بۇرىن دۇنيەجۇزىلىك دەنساۋلىق ساقتاۋ ۇيىمىنىڭ, قر دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ سايتتارىنا كىرىپ, قاي ەلدەردە قانداي اۋرۋلار تاراپ جاتقانىن بىلگەنىڭىز ابزال. اسىرەسە, ەبولا سياقتى جۇقپالى اۋرۋ تارالىپ جاتقان ەلدەرگە بارۋدىڭ قاجەتى شامالى.
جاقىندا قر دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى جانداربەك بەكشين قازاقستاندىق تۋريستەرگە قاي ەلدەرگە بارۋ قاۋىپتى ەكەندىگىن ايتىپ, ەسكەرتۋ جاساعان ەدى. «قازىر ماداگاسكار مەملەكەتىندە وبا قاتتى تارالىپ جاتىر. كونگو دەموكراتيالىق مەملەكەتىندە دە ەبولا, كونگو-قىرىم گەمورراگيالىق قىزباسى, سارى قىزبا سياقتى اۋرۋلار كوپ تارالعان. باتىس افريكانىڭ وزگە دە ەلدەرىنە بارۋدان ساقتانۋ قاجەت. برازيليادا دا ەبولا, سارى قىزبا ىندەتتەرى تىركەلىپ جاتىر. اسىرەسە, سارى قىزبا جۇقتىرۋ قاۋپى جوعارى» دەدى جانداربەك بەشكين ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ءتۇرلى ينفەكتسيا جۇقتىرۋدان ساقتانۋ ءۇشىن جەگەن تاماق پەن ىشەتىن اۋىزسۋعا دا باسا ءمان بەرگەن جاقسى. كوشەدە, بازارلاردا كوتەرمە ساۋداگەرلەردەن تاماق ساتىپ الماۋ قاجەت. ەڭ دۇرىسى, تانىمال ءدامحانالاردان, قوناقۇي قىزمەتكەرلەرى ۇسىنعان جەرلەردەن تاماقتانعان ابزال. ەكزوتيكالىق تاعامدار الۋدان ساقتانعان ءجون. اسىرەسە, بالىق جانە تەڭىز تاعامدارىن ابايلاپ تۇتىنۋ قاجەت.
