كونگرەسس-حولل الاڭىنداعى كونتسەرتتەر
كۇن جىلىنعالى ءار بەيسەنبى-سەنبى سايىن, ءۇش كۇن قاتارىنان استانا قالاسى مەملەكەتتىك اكادەميالىق فيلارمونياسىنىڭ شىعارماشىلىق ۇجىمدارى كونگرەسس-حولل الاڭىندا تەگىن كونتسەرتتەر بەرىپ كەلەدى. قازاقستان رەسپۋبليكاسى تاۋەلسىزدىگىنىڭ 25 جىلدىعىنا ورايلاستىرىلعان شارانى كەز كەلگەن ادام ساعات 18.00-دەن باستاپ تاماشالاي الادى.
بۇگىن الاڭدا كامەرالىق حور مەن اعاشتان جاسالعان ۇرمەلى اسپاپتار كۆينتەتى ونەر كورسەتەدى. اتاۋى ايتىپ تۇرعانداي, بەس ادامنان جاساقتالعان توپ قۇرامىنا حالىقارالىق بايقاۋلاردىڭ لاۋرەاتتارى نۇرگۇل ساپاروۆا (گوبوي), جىبەك ساپارعاليەۆا -جاكەنوۆا (فلەيتا), ۆلاديمير ارداشەۆ (فاگوت), قۋانىش ساعىمباەۆ (ۆالتورنا) جانە عاني يسمايىلوۆ (كلارنەت) كىرەدى.
كۆينتەتتىڭ رەپەرتۋارىندا ي.س. باح, ۆ.ا. موتسارت, ل.ۆ. بەتحوۆەن, رەيح, ە. گريگ, م. گلينكا, پ.ي. چايكوۆسكي, ت.ب. كلاسسيك كومپوزيتورلاردىڭ مۋزىكاسى جانە ە. بوزز, تاففانەل, ە. پۋلەنك سىندى زاماناۋي كومپوزيتورلاردىڭ شىعارمالارى بار.
سونداي-اق, توپ مۇشەلەرى ۇلتتىق مۋزىكانى دا ناسيحاتتاۋدان تانبايدى. كونتسەرتتەرىندە قازاق كومپوزيتورلارىنىڭ تۋىندىلارى, قازاق اندەرى مەن كۇيلەرىنىڭ ۇرلەمەلى اسپاپتارعا لايىقتالعان نۇسقالارىن ورىندايدى. ماسەلەن, نۇرعيسا تىلەنديەۆتىڭ «ماحامبەت» پەن حالىق ءانى «القوڭىردى» رەپەرتۋارىنا ەنگىزگەن.
ال ەرتەڭ الاڭدا فيلارمونيانىڭ ءداستۇرلى ءان ءبولىمىنىڭ, ءداستۇرلى مۋزىكا ءانسامبلى مەن «شالقىما» حالىقتىق بي ءانسامبلى ونەرپازدارىنىڭ ونەرىن تاماشالاۋعا بولادى. سەنبى كۇنى كلاسسيكالىق جانە ەسترادالىق ۆوكال سوليستەرى, «ارتيست» ەسترادالىق بي توبى ونەر شاشادى.
امانعالي قالجانوۆ