تاياۋدا شۆەتسيادا تاي بوكسىنان وتكەن حالىقارالىق چەمپيوناتتا ەلوردالىق ءتورت سپورتشى – الەكسەي ماگدەەۆ, نيكولاي سامسۋەۆ, ايان تاجانوۆ, دميتري زۋەۆ الەم چەمپيونى اتاندى. جات جەردە ەلىمىزدىڭ كوك بايراعىن جەلبىرەتكەن جەڭىمپازداردى استاناداعى ەسىل اۋدانىنىڭ اكىمى ءسابيلا مۇستافينا قابىلداپ, سىي-سياپات كورسەتتى.
سوڭعى جىلدارى ەلىمىزدە تاي بوكسى جاقسى دامىپ كەلەدى. اسىرەسە, ەلوردالىق جاستاردىڭ وعان دەگەن قىزىعۋشىلىعى جوعارى. باس قالانىڭ ىرگەسىندەگى زارەچنىي كەنتىندە ورنالاسقان «توبەت» سپورت كلۋبى وسى باعىتتا جەمىستى جۇمىس اتقارۋدا. بۇگىندە اتالعان كلۋبتان جاسوسپىرىمدەر اراسىندا قازاقستاننىڭ 20-دان استام چەمپيونى شىققان. ونىڭ سىرتىندا 50-گە جۋىق جاس كۇمىس جانە قولا جۇلدەگەر اتانعان. قىسقاسى, باس قالادا سپورتتىق كلۋبتىڭ اتاعى دۇركىرەپ تۇر دەسە بولادى.
–مامىر ايىنىڭ 19 مەن 29 ارالىعىندا شۆەتسيانىڭ يونچەپينگ قالاسىندا تاي بوكسىنىڭ الەمدىك دوداسى ءوتتى. وعان كوپتەگەن ەلدىڭ سپورتشىلارى قاتىستى. تاي بوكسى – سپورتتىڭ قاتال ءتۇرى سانالادى. سوعان قاراماستان ءبىزدىڭ جىگىتتەر ايانىپ قالعان جوق. بار شەبەرلىكتەرىن سالدى. ەل نامىسىن قورعادى. تورتەۋى دە الەم چەمپيونى اتاندى. وسىنداي جەڭىسپەن ورالعانىمىزدا ءبىزدى جاقسى قارسى الىپ, قۇرمەت كورسەتىپ جاتقان ەسىل اۋدانىنىڭ اكىمدىگىنە العىس ايتامىز, – دەيدى استاناداعى تاي بوكسىنىڭ جاسوسپىرىمدەر اراسىنداعى اعا باپكەرى دياس قابدۋوۆ.
ءسابيلا ساپارقىزى دا ەلىمىزدىڭ ابىرويىن اسقاقتاتىپ, استانانى الەمگە تاعى ءبىر تانىتىپ كەلگەن جۇلدەگەرلەرمەن ەركىن سويلەستى. سپورت سالاسىنداعى جەتىستىكتەرىمەن ءبولىستى. «ارقاشان وسىنداي بيىكتەن كورىنىپ, ەلىمىزدىڭ كوك بايراعىن جەلبىرەتە بەرىڭىزدەر» دەپ ولارعا جىلى لەبىزىن ءبىلدىردى.
ازامات ەسەنجول
