بۇگىنگە باس قالانىڭ كەلبەتىن بۇزىپ, تازالىق نورمالارىنا ءاتۇستى قارايتىندار ازايماي تۇر. كەرەك بولسا ۇيىنەن شىعاتىن تۇرمىستىق قالدىقتارىن ارناۋلى جاشىكتەرگە تاستاۋعا ەرىنىپ, ءۇي اينالاسىنا شاشىپ كەتە بەرەتىن تۇرعىندار دا بار. مۇنداي ولقىلىقتار, اسىرەسە, ءۇي-جايىن جالعا بەرۋشىلەر اراسىندا كوپ تارالعان.
كوپشىلىگى ءۇي-جايلارىن جالعا بەرىپ, اقشا تابۋدى جاقسى بىلگەنىمەن, اۋلاعا ارنايى قوقىس جاشىگىن ورناتۋ تۋرالى تالاپ بارىن مۇلدەم ەستىمەگەن بولىپ جاتادى. زاڭ بويىنشا, پاتەرىن جالعا بەرۋشى تۇرعىندار «استانا-تازالىق» مەكەمەسىمەن قاتتى تۇرمىستىق قالدىقتاردى شىعارۋ تۋرالى قوعامدىق كەلىسىمشارتقا وتىرىپ, جالداپ وتىرعان ادامنىڭ سانىنا قاراي اقشا تولەۋى ءتيىس ەكەن. الايدا, كوبى بۇل زاڭدىلىقتىڭ بەلىنەن باسىپ, ۇيىندە تۇراتىن ادام سانىنا قاراي ازىن-اۋلاق اقشا تولەپ قۇتىلىپ جاتادى.
وسىنداي زاڭسىزدىقتاردى رەتتەۋ جانە الدىن الۋ ماقساتىندا قالا اكىمى ادىلبەك جاقسىبەكوۆ ارنايى جۇمىس توپتارىن قۇرىپ, اپتانىڭ ءار بەيسەنبىسىندە ارنايى رەيدتەر جۇرگىزۋدى تاپسىرعان-دى. وسىنداي كەزەكتى رەيد-شاراسىنا «استانا اقشامى» گازەتىنىڭ تىلشىلەرى دە قاتىسىپ, سانيتارلىق تالاپ ماسەلەسىنە قاتىستى ءتارتىپ بۇزۋشىلىق فاكتىلەرىن بىرگە تەكسەرىپ كوردى.
«استانا-تازارتۋ» كاسىپورنىنىڭ باقىلاۋشىلارى مەن پوليتسيا ينسپەكتورلارى جانە «استانا ەكو-پوليگون نس» ماماندارى بىرنەشە جەكە سەكتورعا بارىپ, تەكسەرۋ جۇرگىزىپ, ەكولوگيا تالاپتارىن بۇزۋ جانە تۇراتىن ادامداردىڭ سانىن جاسىرۋ فاكتىلەرىن انىقتادى. ناتيجەسىندە حاتتامالار تولتىرىلىپ, تۇسىندىرمە جۇمىستارى جۇرگىزىلدى.
بۇركىت نۇراسىل
