استانا – قازاق ەلى بولاشاعىنىڭ قالاسى. مادەنيەتتىڭ وشاعى, عىلىم مەن ءبىلىمنىڭ ورداسى. ەلىمىزدىڭ كوگىلدىر تۋى جەلبىرەگەن تاۋەلسىزدىگىمىزدىڭ ورداسى. جاڭا استانامىزدىڭ قۇرىلىسى – جاس مەملەكەتىمىزدىڭ جاسامپازدىققا ۇمتىلىسىنىڭ, بۇكىل قوعامىمىزدىڭ جاڭارۋىنىڭ ەرەكشە سيمۆولىنا اينالعان قۇبىلىس.
ءبىز جاڭا عاسىرعا, جاڭا مىڭجىلدىققا وركەنيەتتى ۇلت رەتىندە, تاريح ساحناسىنا ەگەمەندى ەل رەتىندە ەندىك. الەمدىك قاۋىمداستىقتىڭ كوشىنە جەكە كەرۋەن بولىپ قوسىلدىق. تاۋەلسىزدىگىمىزدىڭ ايعاعىنداي, ەلىمىزدىڭ بەلگىسىندەي, التىن كۇندەي ەلتاڭبامىزدى, جەلبىرەگەن كوك بايراعىمىزدى كورگەندە, اۋەلەگەن ءانۇرانىمىزدى ەستىگەندە بويىڭدى ەرەكشە ءبىر اسقاق ازاماتتىق سەزىم بيلەيدى. مۇنى كورۋ, سەزىنۋ دە ءبىر باقىت, ماڭدايعا بىتكەن باق ەمەس پە؟!
از ۋاقىتتىڭ ىشىندە كوركەيىپ, تۇرلەنىپ, تاۋەلسىزدىگىمىزدىڭ تۇلەگى, وتانىمىزدىڭ جۇرەگى – استانا ەلىمىزدىڭ جاڭا بەتتەرىن اشقانداي, تاۋەلسىزدىگىمىزدى ايگىلەپ تۇر. جاستارىمىزدى بولاشاققا باستايتىن باس قالامىز, ارمان قالا, جاس قالامىز بۇگىندە ونەر, ءبىلىم مەن مادەنيەتتىڭ, عىلىمنىڭ ورداسىنا اينالۋدا. ەرتەڭگە قالدىرار, ۇرپاققا تابىستار ميراس-مۇرامىز دا, بايلىق بازارىمىز دا – ەلوردامىز استانا.
استانا – بۇگىن وسكەن قالا. كەمەل دە كەلىسىمدى ويلاردىڭ, ىزگى نيەت پەن يگى تىلەۋدىڭ قالاسى. وسىنداي عاجاپ, وزگە قالالاردان ەرەكشەلەنىپ تۇرعان استانامىزدىڭ كەسكىن-كەلبەتى ەۋروپا ماتەريگىندە ورنالاسقان پاريج قالاسىنىڭ ءدال وزىندە جۇرگەندەي سەزىندىرەدى مەنى. پاريجگە بارعاندا ەڭ الدىمەن ەيفەل مۇناراسىن ىزدەسە, استانامىزعا كەلگەندەر بيىكتىگى 97 مەترگە جەتەتىن «استانا-بايتەرەك» مونۋمەنتىنە كوش باسىن بۇرادى. وسىنىڭ ءوزى – الەم تورىنەن ورىن الاتىنداي كورىنىس.
كوشەلەرى دە تاپ-تۇيناقتاي, قازاق دانالارىنىڭ ەسىمىمەن اتالعان. استانامىزدىڭ كورسە كوز تارتار كورىكتى, قاراسا كوزدىڭ جاۋىن الار جاڭا ۇلگىدەگى ونەرىنە نەگىزدەلگەن بيىك-بيىك عيماراتتارى قالاعا ءسان بەرىپ, جاڭاشا باعىتتا ەرەكشەلەندىرىپ تۇرعانى ءسوزسىز. ءتىپتى قالامىزدىڭ اسەم جەرلەرىن ارالاپ, تامسانىپ كەتەتىن شەتەلدىك قوناقتار دا از ەمەس. جەر بەتىندەگى ەۋرازيا قۇرلىعىندا ورنالاسقان استانا – ەۋرازيا مەن ازيانى جالعاستىرۋشى التىن كوپىر, قاقپانىڭ كىلتى بولسا, كۇللى قازاق حالقىنىڭ جۇرەگى.
اينالدىرعان 20 جىلدىڭ ىشىندە ادام ايتسا سەنبەستەي وزگەرگەن ارۋ استانا وزگە ەلدەرمەن تەرەزەسى تەڭ, كەلەشەگى كەمەل, بولاشاعى ايقىن جانە جۇلدىزى جارىق قالالار قاتارىنا قوسىلدى.
ەلوردانىڭ وركەندەۋى – ەلىمىزدىڭ وركەندەۋىنىڭ بەلگىسى. ەندەشە, باس قالانىڭ جاڭادان قالانىپ جاتقان ىرگەتاسىنىڭ بەرىك بولۋى دا مەملەكەتىمىزدىڭ بولاشاققا نىق سەنىممەن جاسار قادامىنىڭ ناعىز كەپىلىنە اينالماق. كەلەر ۇرپاقتىڭ دا, جاستاردىڭ دا بولاشاعى ءبىر وزىڭدە! ال سەنىڭ گۇلدەنۋىڭ – سولاردىڭ قولىندا. كەلەشەگىڭ جارقىن بولسىن, حالقىمنىڭ اق ورداسى, كوركەيىپ, بيىكتەردەن كورىنە بەرگەيسىڭ!
ارۋجان وكەش,
اقمولا وبلىسى قورعالجىن اۋدانى
امانكەلدى ورتا مەكتەبىنىڭ وقۋشىسى
