ەلىمىزدىڭ قۇرىلىس نورمالارى مەن ەرەجەلەرىنە اقپان ايىندا وزگەرىستەر ەنگىزىلدى. استانا قالاسى ءبىلىم باسقارماسىنىڭ باسشىسى ءانۋار جانعوزيننىڭ ايتۋىنشا, بۇل جاعداي ورتا مەكتەپتەر قۇرىلىسىنا دا ارتىقشىلىقتار بەرىپ وتىر. ەندى 1200 ورىندىق مەكتەپتەردىڭ ورنىنا 3 مىڭعا تارتا وقۋشىعا ارنالعان وقۋ ورىندارىن سالۋعا بولادى. وسىعان وراي ءبىلىم باسقارماسى قالالىق ورتانى رەگەنەراتسيالاۋ باسقارماسىمەن بىرگە شاھارداعى جەتى ۋچاسكە بويىنشا مەكتەپتەردىڭ قۇرىلىسى جوباسىن وزگەرتتى. الدىندا باس جوسپاردا تالقىلانعان بۇل ماسەلە قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ وتىرىسىندا قارالدى.
«2023 جىلعا دەيىن استانادا 123 مىڭ بالاعا كوبەيەدى دەپ كۇتىلۋدە. بۇعان قازىر مەكتەپتەرگە سىيماي جاتقان 11 مىڭ بالانى قوسىڭىزدار. جاقىن جىلدارى 134 مىڭ بالاعا ارنالعان جەكەمەنشىك مەكتەپتەردى سالۋ مۇمكىن ەمەس. سوندىقتان ۇكىمەتپەن بۇل ماسەلەنى تالقىلاپ جاتىرمىز. ورىندار تاپشىلىعىن 25 پايىزعا جەكەمەنشىك مەكتەپتەر, 75 پايىزعا مەملەكەتتىك مەكتەپتەر ەسەبىنەن جابۋدى جوسپارلادىق, الايدا ۇكىمەت بۇل جوسپارمەن كەلىسپەي وتىر. سەبەبى مەكتەپتەردى سالۋعا قوسىمشا 130 ملرد تەڭگەدەن استام قارجى كەرەك. بۇگىندەرى ماسەلەنىڭ شەشىمىن ىزدەپ جاتىرمىز. بالكىم, مەكتەپتەر قۇرىلىسىنىڭ 40-50 پايىزىن ينۆەستورلارعا, ياعني جەكەمەنشىككە جۇكتەيمىز» دەدى ءا. جانعوزين.
ونىڭ سوزىنشە, قازىر قالادا 10 مەكتەپ سالىنىپ جاتىر. بيىل 3 مەكتەپ پايدالانۋعا بەرىلمەك. قالعان 7 مەكتەپ پەن 6 جاپسارلاس عيمارات قۇرىلىسىنىڭ بيۋدجەتى بەكىتىلدى. قۇرىلىس جۇمىستارى بيىل باستالماق.
جالپى, قالادا مەكتەپتەر تاپشىلىعىمەن قاتار پروبلەمالى ورتا ءبىلىم بەرۋ نىساندارى بار. سونىڭ ىشىندە ءماسليحات دەپۋتاتى زەينوللا شىبكەنوۆ «ءوندىرىس» جانە «كيرپيچنىي» تۇرعىن الاپتارىنداعى №23 جانە №12 مەكتەپتەردىڭ جايىن سۇرادى. «كيرپيچنىيداعى» مەكتەپكە 800 وقۋشى اۆتوبۋستارمەن قاتىنايتىنىن قاپەرگە سالدى.
«№12 مەكتەپتە وقۋشىلاردىڭ شامادان تىس اسىپ كەتۋ ماسەلەسىن وقۋشىلاردى باسقا مەكتەپتەرگە اۆتوبۋسپەن تاسىمالداۋ نەمەسە وتباسىلاردى كوشىرۋ ارقىلى شەشۋگە بولاتىن شىعار. بۇل ماڭايدا جاڭا مەكتەپ سالۋ مۇمكىن ەمەس. ەشقانداي نورمالار بۇعان مۇمكىندىك بەرمەيدى. №23 مەكتەپكە جاپسارلاس عيمارات سالۋ ماسەلەسىن قاراستىرىپ جاتىرمىز. بىراق №60, №31, №59, №75 مەكتەپتەردە وقۋشىلار سانى ودان دا كوپ. ياعني, الدىمەن وسى ورتا ءبىلىم ورىندارىنىڭ ماسەلەسىن شەشۋىمىز كەرەك» دەدى باسقارما باسشىسى.
دەپۋتات قاراقات ابدەن تەلمان كەنتىنىڭ ماسەلەسىن كوتەردى. ونىڭ ايتۋىنشا, اتالمىش كەنتتە بىردە-ءبىر مەكتەپ پەن بالاباقشا جوق. ەڭ جاقىن مەكتەپ زارەچنىيدا ورنالاسقان. ونىڭ وزىندە وقۋشىلاردىڭ سانى اسىپ كەتكەن. قالاداعى №75 مەكتەپ سياقتى نىسانداردى تەلمان مەن زارەچنىيدان كەلىپ قاتىنايتىن وقۋشىلار تولدىردى.
«استانانىڭ شەتكى ايماقتارىن دامىتۋ تۇجىرىمداماسى ءازىرلەندى. قالانىڭ شەتىندە تۇراتىن حالىقتىڭ جاعدايىنا مۇقيات قاراۋىمىز كەرەك. بىراق سول ايماقتاردا تۇراتىن بالالاردى ۇنەمى ۇمىتامىز. مەكتەپ پەن بالاباقشامەن, قوعامدىق كولىكپەن ءتيىستى دەڭگەيدە قامتاماسىز ەتپەيمىز» دەدى ق. ابدەن.
دەپۋتات قوسىمشا ءبىلىم ءتۇيتكىلىن دە اتاپ ءوتتى. ونىڭ سوزىنشە, مۋزىكاعا جانە بەينەلەۋ ونەرىنە باۋليتىن مەكتەپتەر, وقۋشىلار سارايلارى – ءبارى وڭ جاعالاۋدا ورنالاسقان. سول جاعالاۋدا ولاردىڭ بىردە-بىرەۋى جوق.
رامزيا ۋمەرباەۆا بۇرىنعى ۇلگىمەن مەكتەپ سالىنعاندا ونىڭ جانىنا بالاباقشا سالۋدى ۇسىندى. دەپۋتاتتىڭ سوزىنشە, اتا-انالار دا بۇل ۇلگىنى قۇپتايدى.
قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ توراعاسى ءماجيت شايداروۆ ءوز تاجىريبەسىمەن ءبولىستى. «قازىر مەكتەپتەردىڭ تىعىزدىعىن تالقىلاپ وتىرمىز. وسىدان 18 جىل بۇرىن استانا قالاسى دەنساۋلىق ساقتاۋ دەپارتامەنتىن باسقارعانىمدا ءدال وسىنداي جاعداي ەمحانالارعا قاتىستى تۋىنداعان ەدى. ياعني, ولاردى قاي اۋماققا سالۋ كەرەكتىگىن شەشتىك. باس جوسپاردى, ءبىلىم, جۇمىسپەن قامتۋ, ەڭبەك باسقارمالارىن, ىشكى ىستەر دەپارتامەنتىن, كوشى-قون پوليتسياسىن شاقىرىپ, قالانىڭ ەلەكتروندى كارتاسىن ازىرلەدىك. سول ارقىلى قۇرىلىس جۇرەتىن اۋماقتار, حالىقتىڭ تىعىزدىعى انىقتالدى. قازىرگى ەمحانالاردىڭ ءبارى سول ۋاقىتتا جوبالاندى. مەكتەپتەردى دە وسى ۇلگىمەن سالۋ كەرەك. تەلماندا قۇرىلىس قارقىندى جۇرگىزىلىپ جاتىر. دەمەك, سول اۋماققا مەكتەپ قاجەت» دەدى كوميسسيا توراعاسى.
دەپۋتات زاۋرە ءجۇسىپوۆا 1200 بالاعا ارنالعان №82 مەكتەپتى «دارىن» مەكتەبىنە قوسىپ جىبەرگەنىن, قازىر ونداعى وقۋشىلاردىڭ سانى 600-دەن استام ەكەنىن ايتتى. «باسقا مەكتەپتەر 3 مىڭ وقۋشىمەن وقىپ وتىرعاندا, بۇل مەكتەپتە بالا سانى بار بولعانى – 600. «ارمان قالانىڭ» ماڭايىندا ۇلكەن مەكتەپ سالىندى. بۇل ماتەماتيكالىق باعىتتاعى وقۋ ورنىن جەكەنىڭ قولىنا بەرىپ قويدى. ەگەر مەكتەپتەردى جەكەنىڭ قولىنا بەرە بەرسەك, وقۋ ورىندارى تىعىزدىعى ماسەلەسىن شەشپەيمىز» دەدى دەپۋتات.
قالالىق ورتانى رەگەنەراتسيالاۋ باسقارماسىنىڭ باسشىسى عالي يسقاليەۆ ەگەر ءماسليحات دەپۋتاتتارى ۇسىنىلعان جوبانى قولداسا, بيىل جاڭا 10 مەكتەپتى جوبالاۋ جۇمىستارى باستالاتىنىن ايتتى. ەنەرگەتيكا جانە بايلانىس كوللەدجىنە ارنالىپ سالىنعان عيمارات مەكتەپكە بەرىلەتىنىن, ءتيىستى تالداۋ تەلمان كەنتىندە مەكتەپ قاجەتتىگىن كورسەتسە, ونى جوبادان الىپ تاستامايتىنىن جەتكىزدى.
دەپۋتات زۇلپىقار عايىپوۆ كوللەدج عيماراتىن مەكتەپكە بەرمەس بۇرىن تۇسىندىرمە جۇمىستارىن جۇرگىزۋ كەرەكتىگىن ايتتى.
