«كوشە ساۋداسىنا – 1000 ورىن» باعدارلاماسى بويىنشا كاسىپتەرىن دوڭگەلەتىپ وتىرعان ساۋدا پاۆيلوندارىنا QR-كود ەنگىزىلدى.
ەندى قالا تۇرعىندارى مەن قوناقتارى ۇيالى تەلەفون نەمەسە پلانشەتتىڭ كومەگىمەن كوشەدەگى ساۋدا قىزمەتىنىڭ زاڭدى ياكي زاڭسىز ەكەنىن وسى QR-كود ارقىلى بىلە الادى. بۇل مۇمكىندىكتى پايدالانۋ اسا قيىن ەمەس. الدىمەن كامەرا ورناتىلعان ۇيالى تەلەفونداعى Smart Astana قوسىمشاسى ارقىلى كودتى سكانەرلەۋ باعدارلاماسىن قوسىپ, كامەرا وبەكتيۆىن كودقا جاقىنداتساڭىز, ساۋدا نۇكتەسى تۋرالى اقپارات شىعا كەلەدى. ءموبيلدى قوسىمشا ارقىلى كەز كەلگەن ادام جەر تەلىمىن جالعا الىپ وتىرعان كاسىپكەر تۋرالى دەرەكتى, ياعني جالعا الۋ كەلىسىمشارتىنىڭ تىركەمە ءنومىرىن, جەر ۋچاسكەسىن پايدالانۋداعى ماقساتىن, ونىڭ كولەمى قانشا شارشى مەتر ەكەنىن جانە جەر ۋچاسكەسىنىڭ ينۆەنتارلى ءنومىرىن, سول سياقتى ونلاين كارتادا بەلگىلەنگەن ناقتى مەكەنجايىن كورۋگە بولادى. سونداي-اق كاسىپكەردىڭ زاڭدى نەمەسە زاڭسىز قىزمەت كورسەتىپ وتىرعانى تۋرالى اقپاراتتان دا حاباردار بولىپ, قاجەتتى جاعدايدا ءوز ءوتىنىش-تىلەكتەرى مەن ارىز-شاعىمدارىن دا جازا الادى. وتىنىشتەر كاسىپكەردىڭ جەكە پاراقشاسىنا جانە «Astana» الەۋمەتتىك-كاسىپكەرلىك كورپوراتسياسىنىڭ ەلەكتروندى مەكەنجايىنا كەلىپ تۇسەدى. ەگەر دۇڭگىرشەك جۇمىسى زاڭسىز بولىپ شىقسا, تەكسەرۋشى ورگاندار كاسىپكەرگە ءتيىستى شارا قولدانادى. ويتكەنى زاڭ بويىنشا جابايى ساۋداعا تىيىم سالىنعان. ال «كوشە ساۋداسىنا – 1000 ورىن» باعدارلاماسى بويىنشا كاسىپ اشاتىندارعا بەلگىلى ءبىر تالاپتار قويىلادى. مىسالى, ولار سەرتيفيكاتسىز تاۋاردى ساۋدالامايدى. ءاربىر QR-كودتا «Astana» الەۋمەتتىك-كاسىپكەرلىك كورپوراتسياسىنىڭ اقپاراتتىق بازاسىندا تىركەلگەن پەرسونالدى پاۆيلوننىڭ پاراقشاسىنا سىلتەمە كودتالعان. كوشىرىپ باسىلۋدان ساقتاۋ ءۇشىن بارلىق QR-كود ارنايى NFC بەلگىسىمەن قورعالادى.
– ساندىق تەحنولوگيالاردى ەنگىزۋ ارقىلى ءبىز «كوشە ساۋداسىنا – 1000 ورىن» باعدارلاماسى اياسىندا بەرىلەتىن ساۋدا نىساندارىن كاسىپكەرلەرگە بەرۋ پروتسەسىن مەيلىنشە اشىق جۇرگىزۋدى قولعا الۋدامىز, – دەدى «Astana» اكك» ۇك» اق باسقارما توراعاسى نۇرلان جاقىپوۆ تىلشىلەرگە بەرگەن سۇحباتىندا.
