ەلوردادا بيزنەسپەن اينالىساتىن ادامداردىڭ سانى جىلدان جىلعا ارتىپ كەلەدى. بۇل جونىندە كاسىپكەرلەردىڭ جىل سايىنعى VI كونفەرەنتسياسىندا قالا اكىمى التاي كولگىنوۆ ءمالىم ەتتى. بۇگىندە استانادا 100 مىڭعا تارتا كاسىپكەرلىك سۋبەكتىلەرى تىركەلگەن. بۇعان كوپ جاعدايدا كاسىپكەرلەرگە مەملەكەتتىك قولداۋ يگى اسەر ەتىپ وتىر.تەك كوشە ساۋداسىندا 1,5 مىڭ ادام جۇمىسپەن قامتىلعان. ەلوردادا باسقا قالالارعا قاراعاندا جۇمىسسىزدىق دەڭگەيى تومەن – 4,5 پايىز. جالپى, رەسپۋبليكا بويىنشا ول 4,9 پايىزدى قۇرايدى. ساراپشىلار مۇنى, ەڭ الدىمەن قالادا ازاماتتاردىڭ ءوز ءىسىن اشۋعا قولايلى ورتا قالىپتاسۋىمەن بايلانىستىرادى. 
– مەملەكەت باسشىسى حالىققا جولداۋىندا شاعىن جانە ورتا بيزنەس – قالا مەن اۋىلدى دامىتۋدىڭ بەرىك نەگىزى ەكەنىن اتاپ ءوتتى. ويتكەنى بۇل – بيۋدجەتكە تۇسەتىن سالىقتار مەن جاڭا جۇمىس ورىندارى. بۇگىندە وتاندىق بيزنەسمەندەر الەۋمەتتىك نىسانداردىڭ اشىلۋىنا ەرەكشە كوڭىل بولە باستادى, – دەدى قالا اكىمى ا.كولگىنوۆ.
قازىرگى كۇنى الەۋمەتتىك باعىتتا جۇمىس ىستەيتىن جەكە مەنشىك نىساندار سانى ارتىپ كەلەدى. قالادا 213 جەكەمەنشىك بالاباقشا, 14 جەكەمەنشىك ەمحانا, 23 مىڭعا جۋىق وقۋشى ورنىمەن قامتاماسىز ەتىپ وتىرعان مەكتەپتەر بار.
التاي كولگىنوۆ قالا اكىمدىگى مەن «اتامەكەن» ۇكپ بىرلەسىپ بيزنەسمەندەر «ءبىر تەرەزە» قاعيداتى بويىنشا بارلىق قاجەتتى قىزمەتتەردى الا الاتىن «بيزنەسكە ارنالعان ۇكىمەت» الاڭىن ىسكە قوسۋدى جوسپارلاپ وتىرعاندارىن ايتتى.
الەۋمەتتىك كاسىپكەرلىكتى دامىتۋ ءۇشىن «1000 ورىن – كوشە ساۋداسى» جوباسى تابىستى جۇمىس ىستەۋدە. جوبا اياسىندا 1,5 مىڭنان استام جۇمىس ورنى اشىلىپ, 1 ميللياردتان استام جەكە ينۆەستيتسيالار تارتىلعان.
«اتامەكەن» ۇكپ نۇر-سۇلتان قالاسى وڭىرلىك كاسىپكەرلەر پالاتاسىنىڭ ديرەكتورى المات ءجۇنىسوۆتىڭ ايتۋىنشا, «1000 ورىن – كوشە ساۋداسى» جوباسى بويىنشا الەۋمەتتىك وسال توپتار ءۇشىن ساۋدا نۇكتەلەرىن بەرىلەدى.
سوڭعى 10 جىلدا شوب سۋبەكتىلەرىنىڭ سانى 5 ەسە ءوستى. بۇل سالادا حالىقتىڭ 60 پايىزعا جۋىعى جۇمىسپەن قامتىلعان. ءونىم شىعارۋ كولەمى 800 ملرد تەڭگەدەن 5 ترلن تەڭگەگە دەيىن ءوستى. بيزنەس وكىلدەرىمەن كەزدەسۋلەر جۇيەلى تۇردە وتەدى. قالا اكىمى كاسىپكەرلەردى «بيزنەسكە ارنالعان ۇكىمەت» الاڭىندا جەكە قابىلدايدى.
