بار ءتارتىپ تازالىقتان باستالادى. 21 قىركۇيەك كۇنى استانانىڭ 80 مىڭعا جۋىق تۇرعىنى قولدارىنا كۇرەك-كەتپەنىن ۇستاپ, جالپىقالالىق سەنبىلىككە شىقتى. ەلوردانىڭ ەڭبەك مەرەكەسىندە 4039 ءتۇپ اعاش وتىرعىزىلىپ, قالا قوقىس قالدىقتارىنان تازارىپ قالدى.
سەنبىلىككە شىعىپ, اعاش ەگۋ – استاناعا جىلى سەزىمىن ءبىلدىرۋدىڭ ءبىر ءتۇرى ەكەنىن بۇگىندە جاس تا, جاسامىس تا جاقسى بىلەدى. «استانا – ەلىمىزدىڭ باس قالاسى عانا ەمەس, التى الاش ارداقتاعان قاسيەتتى وردا. ونىڭ كوركىن, كەلبەتىن كوركەيتەتىن بۇگىنگى شارانىڭ جالپى تالىمدىك, تاربيەلىك ماڭىزى وتە زور دەپ ەسەپتەيمىن. ويتكەنى, استانا – كۇننەن-كۇنگە ءوسىپ, وركەندەپ كەلە جاتقان ۇلكەن شاھار. ال, سونى ۇستاپ تۇرۋ ءۇشىن ەلدىڭ ءوزىنىڭ ىقىلاسى قاجەت» دەدى كوپشىلىكپەن بىرگە سەنبىلىككە شىعىپ, ەسىل اۋدانى اۋماعىندا اعاش وتىرعىزعان استانا اكىمى يمانعالي تاسماعامبەتوۆ. ونىڭ ايتۋىنشا, جالپىقالالىق سەنبىلىك – ەڭسەلى ەلوردامىزدىڭ ءسان-سالتاناتىن ارتتىراتىن, تازالىعى مەن ءتارتىبىن قالىپتاستىراتىن يگى ءۇردىس. تەك وسى سەنبىلىكتىڭ وزىندە ءتورت مىڭعا جۋىق كوشەت وتىرعىزىلدى. بۇل شارانىڭ استارىندا قالانى تەك كوگالداندىرۋ عانا ەمەس, سونداي-اق, وسكەلەڭ ورەندەردىڭ بويىنا وزدەرى تۇرىپ جاتقان شاھاردى كۇتىپ ۇستاپ, ونى ەڭبەك ارقىلى سۇيۋگە باۋلۋ ماسەلەسى دە جاتىر. «ءبىز جىلدان جىلعا استانالىقتاردىڭ ەكولوگيالىق مادەنيەتىن قالىپتاستىرۋعا تىرىسىپ كەلەمىز. سوندىقتان, تازالىق جۇمىسىنا بەلسەنە قاتىسقان بارشا حالىققا العىسىمدى بىلدىرەمىن. ءار استانالىق ەرتەڭ-اق جايقالا وسكەن اعاشتاردىڭ باققا اينالعانىن كورگەندە, ەڭبەكتەرىنىڭ ەش كەتپەگەنىن ۇعىناتىن بولادى» دەدى شاھار باسشىسى.
جالپى, سەنبىلىك كۇنى جينالعان قوقىس قالدىقتارىن پوليگونعا جەتكىزۋ ءۇشىن 30 جۇك تيەگىش جانە 90 جۇك كولىگى جۇمىلدىرىلدى.
گۇلميرا ايماعانبەت
