كەشە استانا قالاسى اكىمدىگىنىڭ قولداۋىمەن ۇيىمداستىرىلعان «The Spirit of Astana-2017» قازىرگى زامانعى ەتنيكالىق مۋزىكا فەستيۆالى «بايتەرەك» مونۋمەنتى الدىنداعى الاڭدا اشىلدى. ەكى كۇنگە جالعاساتىن شاراعا قازاقستانمەن قاتار اقش, گەرمانيا, مالي, ماكەدونيا, گرۋزيا, ۆەنگريا, رەسەي, باشقۇرتستان, بۋرياتيا, تىۆا ەلدەرىنەن كەلگەن ونەرپازدار قاتىسۋدا.
جۋىردا «ەتنواۋىل» ۇلتتىق-مادەني كەشەنىندە «Nomad Way» اتتى كوشپەندىلەر مادەنيەتى فەستيۆالى ءوتتى. «The Spirit of Astana-2017» ونىڭ جالعاسى دەسەك تە بولادى. العاشقى اتالعان فەستيۆالگە قاتىسقان ونەرپازداردىڭ كوبىسى وسى جولى دا كورەرمەندەردىڭ الدىنا شىقتى.قازاقستاننان وعان «Tيگراحاۋد», «Drums of Almaty» ەتنو-روك توپتارى, ەدىل قۇسايىنوۆ, ناريمان يسسەنوۆ, رومان باجانوۆ, رۋستام وسپانوۆ, ت.ب. ورىنداۋشىلار مەن ديدجەيلەر قاتىسۋعا نيەت ءبىلدىردى.
كومەيمەن ءان ايتۋدىڭ شەبەرى تىۆالىق راديك تيۋليۋش «Huun Huur Tu» توبىمەن بىرگە ونەر كورسەتەدى. اتالمىش توپ «گرەممي» سىيلىعىن ەكى رەت يەلەنگەن Carmen Rizzo-مەن (اقش) قوسىلىپ تا ءوز ونەرىن ورتاعا سالادى. باۋىرلاس باشقۇرت ەلىنىڭ «ارعىماق» توبى كورەرمەندى كوشپەلى داۋىرگە ساپارعا شاقىرادى.
«بيىلعى جازدا استانا تۇرعىندارى مەن قوناقتارى ءۇشىن اۋقىمدى ءارى اركەلكى مادەني كوپشىلىك شارالار دايىندالدى. ماۋسىم-قىركۇيەك ارالىعىندا «ەكسپو-2017» حالىقارالىق مامانداندىرىلعان كورمەسىنىڭ اياسىندا قالا اكىمدىگى كونتسەرتتەردى, فەستيۆالدەردى, كورمەلەردى, تەاتر جانە تسيرك قويىلىمدارىن, سونىڭ ىشىندە اشىق اسپان استىندا ۇيىمداستىرىلاتىندارىن قوسقاندا 700-دەي شارا وتكىزەدى. وسى شارالاردىڭ قاتارىندا «The Spirit of Astana-2017» فەستيۆالى ەرەكشە ورىن الادى. استانادا العاشقى مارتە ءوتىپ تۇرعان بۇل فەستيۆال ەتنيكالىق مۋزىكانىڭ حالىق اراسىنا تارالۋىنا ۇلكەن ۇلەسىن قوسادى دەپ سەنەمىن» دەيدى استانا قالاسى مادەنيەت, مۇراعات جانە قۇجاتتامالار باسقارماسىنىڭ باسشىسى بولات ماجاعۇلوۆ.
«The Spirit of Astana-2017» قازىرگى زامانعى ەتنيكالىق مۋزىكا فەستيۆالىن «بايتەرەك» مونۋمەنتى الدىنداعى الاڭنان بۇگىن دە تاماشالاي الاسىزدار.
امانعالي قالجانوۆ
