جاقىندا رەداكتسياعا بالاسى قالاداعى جامبىل جاباەۆ اتىنداعى №4 مەكتەپ-گيمنازياسىندا وقيتىن ءبىر اعامىز قوڭىراۋ شالدى. ول كىسىنىڭ ءايتۋىنشا…جا, سول كىسىنىڭ ءسوزىن ءدال كەلتىرەيىك. «ءىنىم, وسى مەكتەپكە كۇن سايىن بالامدى ساباققا الىپ بارامىن. قايبىر جىلى ءدال ءبىلىم ورداسىنىڭ ىرگەسىنەن قۇرىلىس جۇمىستارى باستالىپ, كەيىن ول اياقسىز قالدى. سونىڭ «ەسكەرتكىشى» بولىپ, سورايعان كران تۇر. جەلدى كۇندەرى وسى كراننىڭ جۇك كوتەرگىش قۇرالدارى شايقالىپ, مەكتەپ عيماراتىنا قۇلاپ كەتەتىندەي كورىنەدى. سوندىقتان وسى كراندى الىپ تاستاۋدىڭ ءبىر امالى بار ما؟» دەپ ءوتىنىشىن ايتتى.
سودان بۇل جاعدايدى ءوز كوزىمىزبەن كورۋ ءۇشىن اتالعان ءبىلىم ۇياسىنا ادەيىلەپ باردىق. بۇل وقۋ ورداسى قالاداعى بارلىق ءبىلىم وشاقتارىنىڭ قارا شاڭىراعى دەسە دە بولادى. ءجۇز ون جىلدان استام تاريحى بار. ءبىر بايقاعانىمىز, مەكتەپتىڭ تەرريتورياسى وتە تار. ماڭايىندا بوس جاتقان جەر جوق.
ايتقانداي, قوڭىراۋ شالعان اعامىزدىڭ شىرىلداپ ايتقان جانايقايى ورىندى ەكەن. مەكتەپ عيماراتىنا ءتونىپ, قيسايىپ تۇرعان كراندى كورىپ, وزىمىزدە شوشىپ قالدىق. وسى ماسەلەنىڭ جاي-جاپسارىن ءبىلۋ ءۇشىن ءبىلىم ۇياسىنا كىرگەندە الدىمىزدان مەكتەپ ديرەكتورىنىڭ شارۋاشىلىق جونىندەگى ورىنباسارى زاۋرە ءابدىراحمانوۆا جولىقتى. بۇل كىسى دە اتالعان جاعدايمەن جاقسى تانىس. «ءبىز بۇل پروبلەمانى كوتەردىك. بايقوڭىر اۋدانىنىڭ اكىمدىگى بىلەدى. ولار ءبىر اي بۇرىن بىزگە «شەشىمىن تابامىز» دەپ جاۋاپ بەرگەن. ەندى سونى كۇتىپ وتىرمىز» دەدى ول.
قازىر بۇل قۇرىلىس نىسانى تولىعىمەن بىتپەگەن. جۇمىسى توقتاپ تۇر. قوجايىندارى دا بەلگىسىز. سوندىقتان بىزگە ولارمەن تىلدەسۋدىڭ رەتى كەلمەدى. جالپى, بۇل پروبلەمانى شەشۋ ءۇشىن مەكتەپتىڭ اتا-انالار قامقورشىلار كەڭەسىنىڭ ءتورايىمى سۆەتلانا سمايىلوۆا جان سالىپ جۇگىرىپ ءجۇر ەكەن. بايقوڭىر اۋدانى اكىمىنىڭ قابىلداۋىندا بولىپتى.
«اۋدان باسشىسى ەرلان كاناليموۆ ءسوزىمدى جەرگە تاستاماي كراندى ءوزى كەلىپ كوردى. بارلىق جاعدايمەن تانىستى. بۇل ماسەلەمەن اينالىسۋعا ورىنباسارىنا تاپسىرما بەردى. بۇرىن كران ماشيناسىنىڭ جۇك كوتەرگىش قۇرالدارى بۇدان دا بيىك بولاتىن. قايتا, ولاردى جيناپ, شامالى ءتۇسىردى. ەندى كراندى مۇلدە الىپ تاستاسا دەپ وتىرمىن. بۇل پروبلەمانى شەشۋ – جالعىز بايقوڭىر اۋدانىنىڭ اكىمدىگىنە بايلانىستى ەمەس. بۇعان قالالىق قۇرىلىس سالاسىنا جاۋاپ بەرەتىن مەكەمەلەردىڭ دە قاتىسى بار. قوجايىندارىنىڭ تابىلماي وتىرعاندىعى دا ونى بوگەپ وتىر. دەگەنمەن, اياقسىز قالادى دەپ ويلامايمىن. بيىل ءبىزدىڭ ۇسىنىسىمىز بويىنشا بايقوڭىر اۋدانىنىڭ اكىمدىگى مەكتەپ عيماراتىن تولىق قورشاپ بەردى. ولارعا سول قامقورلىعى ءۇشىن راقمەت ايتامىز! ەندى وسى كراننان قۇتىلساق جاقسى بولار ەدى. ايتپەسە, كوڭىلىمىز تىنشىماي تۇر» دەدى قامقورشىلار كەڭەسىنىڭ ءتورايىمى.
قالاي بولعاندا دا, اتا-انالار ءوز بالالارىنىڭ قاۋىپسىزدىگى ءۇشىن «كراننان قاشان قۇتىلامىز؟» دەپ بەكەر دابىل قاعىپ وتىرعان جوق. بۇگىندە بۇل مەكتەپتە 2000-نان اسا بالا وقيدى. ال ادام ءومىرى – بارىنەن قىمبات! «ساقتانساڭ –ساقتايمىن» دەگەن بار. ەندەشە, بۇل ماسەلە كوپكە سوزىلماي تەزىرەك شەشىلگەنى ءجون.
