كرەديت اۋ-جايىن حقو-دان ءبىلىڭىز
استانا قالاسىنىڭ حالىققا قىزمەت كورسەتۋ ورتالىقتارىندا كرەديتتىك ەسەپتى الۋ بويىنشا قاناتقاقتى جوبا باستاۋ الدى. قالاعان جان حقو-عا كەلىپ, ءوزىنىڭ كرەديتتىك تاريحى كورسەتىلگەن انىقتاما الا الادى. باستاپقى كەزەڭدە جوبا استانانىڭ ەكى حقو-دا ىسكە اسىرىلادى (ميرزويان كوشەسىندەگى № 2 ءبولىم جانە رەس-پۋبليكا داڭعىلى 43, № 4 ءبولىم). كەلەشەكتە بۇل قىزمەتتى قازاقستاننىڭ بارلىق حالىققا قىزمەت كورسەتۋ ورتالىقتارىندا ىسكە قوسۋ جوسپارلانۋدا.
«جەكە كرەديتتىك ەسەپتە كرەديتتەر, ولاردىڭ مەرزىمدەرى, سومالارى, ولار رەسىمدەلگەن بانكتەر تۋرالى مالىمەتتەر كورسەتىلەدى. سونداي-اق, مۇندا كليەنت بانك قارىزىن ادال وتەگەنى, تولەمدەردىڭ ۋاقىتىلى ەنگىزىلگەنى, مەرزىمىن وتكىزىپ الۋلارعا جول بەرىلگەن-بەرىلمەگەنى جونىندە كورسەتىلەدى» دەپ ءتۇسىندىردى «حقكو» رمك باس ديرەكتورىنىڭ ورىنباسارى مۇحامەدعالي اشىرباەۆ.
كرەديت تاريحىن الۋ ءۇشىن ازامات كرەديتتىك تاريح سۋبەكتىسىنىڭ حقكو ارقىلى ول تۋرالى كرەديتتىك ەسەپتى بەرۋ جونىندەگى ءوتىنىش-كەلىسىمگە قول قويۋى, سونداي-اق, جەكە كۋالىكتىڭ تۇپنۇسقاسى مەن تەلنۇسقاسىن, تولەم تۋرالى تۇبىرتەكتى ۇسىنۋى قاجەت. اقىلى قىزمەت باس-اياعى 15 مينۋت ىشىندە جەدەل كورسەتىلەدى.
سونىمەن قاتار, تاپ وسىنداي كرەديت ەسەبىن جازباشا سۇراۋ ارقىلى الماتى قالاسىنداعى ءبىرىنشى كرەديت بيۋروسىنان, ەلەكتروندىق ۇكىمەت پورتالىنان, سونىمەن بىرگە www.myth.kz سايتىنان الۋعا بولادى.