جىلداعى ءداستۇر بويىنشا استانا كۇنى قالالىق دەنساۋلىق ساقتاۋ باسقارماسىنىڭ وكىلدەرى ەلوردا پەرزەنتحانالارىندا بولىپ, جاس انالاردى قۋانىشتارىمەن قۇتتىقتادى. بۇل كۇنى باس قالادا 61 ءسابي دۇنيەگە كەلسە, ولاردىڭ 28-ءى قىز جانە 33-ءى ەر بالا ەكەن.
قالا مەرەكەسىن استانالىق جاعىپاروۆتار وتباسى دا اسىعا كۇتىپتى. جيىرما التى جاستاعى عاليا ەكىنشى پەرزەنتىنىڭ ءدال وسى كۇنى دۇنيەگە كەلۋىن جاقسىلىققا جورىپ, بالاپانىنىڭ بولاشاعىنان زور ءۇمىت كۇتەتىنىن جاسىرمادى. «وسىنداي قوس قۋانىش قۇشاعىندا ءوزىمدى سونداي باقىتتى سەزىنىپ تۇرمىن. ەكى ادامنىڭ ءبىرىنىڭ ماڭدايىنا بۇيىرا بەرمەيتىن ەرەكشە كۇنى – استانانىڭ تۋعان كۇنىندە دۇنيەگە كەلگەن سابيىمە ەلباسىمىز نۇرسۇلتان نازارباەۆتىڭ ەسىمىن قويۋدى ۇيعارىپ وتىرمىز. استانانى ءتول پەرزەنتىندەي اياعىنان تىك تۇرعىزىپ, ونىڭ دامۋىنا, جاس قالانىڭ كەمەلدەنۋىنە بار كۇش-جىگەرىن, قاجىر-قايراتىن جۇمساعان مەملەكەت باسشىسىنداي ەلىنىڭ, جەرىنىڭ قامىن ويلايتىن بەدەلدى ازامات بولسا ەكەن بالاپانىم» دەدى جاس انا.
ءاليا مولداعۇلوۆا كوشەسىنىڭ بويىندا ورنالاسقان استانا قالالىق پەرزەنتحاناسىندا سول كۇنى 18 انا بوپەلى بولدى. پەرزەنتحانانىڭ باس دارىگەرى زايتۋنا حاميدۋللينانىڭ ايتۋىنشا, كۇن سايىن پەرزەنتحانادا 28-30 بالا تۋادى ەكەن. ال, استانا مەرەكەسى كۇنى تۋعان 7 ۇل مەن 11 قىزدىڭ جانە ولاردىڭ انالارىنىڭ دەنساۋلىقتارى جاقسى, كوڭىل-كۇيلەرى كوتەرىڭكى بولىپ شىقتى. ولاي بولاتىن سەبەبى, ءدال سول كۇنى مەكەمە باسشىسى مەن قالالىق دەنساۋلىق ساقتاۋ باسقارماسىنىڭ انا مەن بالا دەنساۋلىعىن ساقتاۋ ءبولىمىنىڭ جەتەكشى مامانى فاريدا نۇرقاسىمقىزى جاڭا تۋعان سابيلەردىڭ انالارىن قوس قۋانىشتارىمەن قۇتتىقتاپ, ولارعا سىيلىقتار تاراتتى.
قالالىق №1 پەريناتالدىق ورتالىقتا مەرەكە كۇنى دۇنيەگە كەلگەن 28 بالانىڭ 15-ءى ۇل, 13-ءى قىز بالا ەكەن. ال, №2 پەريناتالدىق ورتالىقتا تۋعان سابيلەردىڭ سانى – 15.
جالپى, بيىل استانا كۇنى دۇنيەگە كەلگەن سابيلەردىڭ التاۋى – باسقا قالالاردان ەلورداعا قىدىرىپ كەلگەندەر بولسا, قالعان ەلۋ بەس بالا باس قالانىڭ تۇرعىندارى بولىپ شىقتى. ءۇش سابيگە ەلباسىنىڭ قۇرمەتىنە نۇرسۇلتان ەسىمى بەرىلدى. ءبىر قىزىعى, بيىلعى مەرەكەدە تۋعانداردىڭ اراسىندا ەگىزدەر دە, ۇشەمدەر دە بولماي شىقتى. دەگەنمەن, استانا تويىندا دۇنيە ەسىگىن اشقان بوبەكتەر مەن ولاردىڭ انالارىنىڭ بىردە-ءبىرى سىيلىقتان قۇر الاقان قالمادى.
گۇلبارشىن وكەشقىزى
