قازاق ۇلتتىق ونەر ۋنيۆەرسيتەتىنىڭ «شابىت» عيماراتىندا «رۋحاني جاڭعىرۋ» باعدارلاماسى اياسىندا تاۋەلسىزدىكتىڭ 30 جىلدىعىنا وراي «اسەم قوڭىر» اتتى كۇي كەشى ءوتتى. دينا نۇرپەيىسوۆانىڭ تۋعانىنا 160 جىل تولۋىنا ارنالعان كەشكە وقۋ ورنىنىڭ رەكتورى, قازاقستاننىڭ ەڭبەك ەرى ايمان مۇساقوجاەۆا قاتىسىپ, كۇي اناسىنىڭ ءومىر جولى جانە ۇلتتىق مۋزىكاعا قوسقان ۇلكەن ۇلەسى تۋرالى اڭگىمەلەدى.
وسى كەشتە بيىل دينا نۇرپەيىسوۆانىڭ مەرەيتويى اياسىندا اتقارىلعان شارالار قورىتىندىلاندى دەپ ايتساق بولادى. سول شارالاردىڭ كوبىسىنە «كۇي اناسى» قورى مۇرىندىق بولىپ, تىكەلەي ارالاستى.
بيىل ەلوردادا اتاقتى كۇيشىنىڭ ەسكەرتكىشى بوي كوتەردى. «كۇي اناسى – دينا» اتتى كىتاپ جارىق كوردى. دينانىڭ تۋعان جەرى باتىس قازاقستان وبلىسى جاڭاقالا اۋدانىندا ونىڭ مەرەيتويىنا ارنالعان رەسپۋبليكالىق دومبىراشىلار بايقاۋى ءوتتى. وسىنى اتاپ وتكەن اتالمىش قوردىڭ جەتەكشىسى تولەگەن قۋانىشەۆ دينانىڭ مەرەيتويىنا اتسالىسقان ۇجىمدارعا, قوعامدىق ۇيىمدارعا, وقۋ ورىندارىنا العىسىن ايتتى. وسى قور اتىنان جاس ونەرپاز الىشەر بەكباۋۇلىنا ارنايى تاپسىرىسپەن جاسالعان دومبىرانى سىيعا تارتتى.
كەشتىڭ قۇرمەتتى قوناعى, كۇيشى-كومپوزيتور, قازاقستاننىڭ ەڭبەك سىڭىرگەن قايراتكەرى ءشامىل ءابىلتاي قۇرمانعازىنىڭ, دينانىڭ, حالىق كۇيلەرىن توكپەلەتتى. قازاقستاننىڭ ەڭبەك سىڭىرگەن ءارتىسى تۇرار الىپباەۆ, قازاقستاننىڭ ەڭبەك سىڭىرگەن قايراتكەرى انار مۇزداحانوۆا, حالىقارالىق كونكۋرستاردىڭ لاۋرەاتى ايتولقىن توقتاعان كۇي تارتتى. بەلگىلى اقىن ايباتىر سەيتاق كۇي اناسىنا ارناعان ولەڭىن وقىدى. قازاق ۇلتتىق ونەر ۋنيۆەرسيتەتىنىڭ ستۋدەنتتىك حالىق اسپاپتار وركەسترى (ديريجەرى – قازاقستاننىڭ ەڭبەك سىڭىرگەن قايراتكەرى داۋرەن عىلىموۆ) ونەر كورسەتتى.
دينانىڭ كۇيشىلىگى ۇرپاقتان-ۇرپاققا جالعاسىپ جاتىر. سونىڭ ءبىرى مۇقاعالي رىسقاليەۆ دومبىراشىلىعىمەن كورىندى. سونىمەن قاتار كۇي اناسى تۋرالى ەڭبەكتەردەن قۇرالعان كورمە مەن قولونەر كورمەسى ۇيىمداستىرىلدى.
