سارىارقانىڭ قوڭىر سالقىن جازىنا ۇيرەنگەن استانالىقتار شىلىڭگىر شىلدە تۇسكەندە قينالىپ قالادى. جازدىڭ كۇنى جانعا جايلى بولۋى ءۇشىن مىنا جايتتاردى ەسكەرە ءجۇرىڭىز.
دارىگەرلەر جاسىل ءتۇستىڭ ادام اعزاسىنا جاعىمدى اسەرىن ءجيى ايتادى. كۇننىڭ اپتابىندا جاسىل شالعىن, جايقالعان كوك جاپىراققا قاراپ جانارىڭىزدى دەمالدىرىڭىز. سەبەبى, جاسىل ءتۇس كوزدىڭ قاراشىعىنا, كوز جانارىنىڭ تۇبىندە ورنالاسقان جۇيكە تامىرلارىنا اسەر ەتىپ, تىنىشتاندىرادى ەكەن. سونىمەن بىرگە كوكونىستەن جاسالعان تاعامدى مولىنان جەۋ كەرەك. قۇرامىندا سۋ كوپ كوكونىستەر ادام اعزاسىنىڭ ىلعالدىلىعىن ساقتاپ, ىستىققا توزىمدىلىگىن ارتتىرادى. وسى كۇندەرى كيگەن كيىمىڭىزدىڭ دە تۇسىنە قاراڭىز. اشىق ءتۇستى جاسىل, سارى, كوگىلدىر ءتۇستى كويلەكتەر كۇن ساۋلەسىن جىبەرمەي, دەنەنىڭ دەمالۋىنا سەپتىگىن تيگىزەدى. ىستىق باساتىن كوك شايمەن بىرگە مەديتسينادا «ەلەۋتەروكوكك» دەپ اتالاتىن دارىلىك ءشوپتىڭ 25-30 تامشىسىن تاڭەرتەڭمەن ءىشىپ العاننىڭ زيانى جوق ەكەن. بۇل ادامنىڭ سىرتقى فاكتورلارعا قارسى تۇرۋىن قامتاماسىز ەتسە, قاپىرىقتان, اۋانىڭ جەتىسپەۋشىلىگىنە جاعىمدى اسەرى بولادى. سونىمەن بىرگە مەليسسا جانە روزمارين جاپىراقشالارىن قوسىپ قايناتقان سۋعا ليمون سالىپ دامدەپ, سۋسىن ىشسەڭىز دە ىستىقتان السىرەمەي, جەڭىل سەزىنۋگە بولادى.
مۇندايدا مۇزدىڭ پايداسى كوپ. ونىمەن ماڭدايىڭىزدى, موينىڭىزدى سىلاپ, جەلكەڭىزدىڭ شۇقىرىنا قويىپ, ءسال كوزىڭىزدى جۇمىپ تىنىقساڭىز, جۇمىس قابىلەتىڭىز ارتىپ, سەرگەك سەزىنەسىز.
كۇننىڭ ىستىعىندا دارىگەرلەر بەلسەندى سپورت تۇرلەرىمەن شۇعىلدانباۋعا شاقىرادى. فۋتبول, باسكەتبول تاعى باسقا ويىنداردا ادام قاتتى تەرلەپ, تەز شارشايدى. الايدا, شىلدەنىڭ ىستىعىندا جانعا جايلى سپورت تۇرلەرى جوق ەمەس. بۇل – باسسەين, گيمناستيكا, اەروبيكا. نەمەسە, تاڭەرتەڭ كۇن قىزعانعا دەيىن نەمەسە كۇن باتقاندا ءبىر ساعاتتاي جاياۋ ءجۇرىپ سەرۋەندەسەڭىز, دەنساۋلىققا وتە پايدالى ءارى ۇيقىڭىز تىنىشتالىپ, كەلەسى كۇنى سەرگەك سەزىنۋگە كوپ سەپتىگىن تيگىزەدى.
ايگۇل ۋايسوۆا
