ەسىمى الەمگە تانىلعان پوليگلوتتاردىڭ ءبىرى – ۆەنگريالىق كاتو لومب ەدى. 16 تىلدە ەركىن سويلەگەن اۋدارماشىنىڭ قابىلەتتەرى تاڭداي قاعارلىق. ويتكەنى, ول شەت تىلدەرىنىڭ كوبىن ءوز بەتىنشە مەڭگەرىپتى. ءتىل ۇيرەنۋگە قاتىستى كاتو لومبتىڭ قىسقا دا نۇسقا كەڭەستەرىن وقىرماندارعا ۇسىنۋدى ءجون كوردىك.
ءتىل ۇيرەنگىڭىز كەلسە, كۇندەلىكتى جاتتىعۋ كەرەك. اسىرەسە, تاڭعى ۋاقىتتا. ۋاقىتىڭىز تاپشى بولسا, كەم دەگەندە 10 مينۋتىڭىزدى قيىڭىز.
قۇلشىنىسىڭىز باسەڭدەسە, زەرىكتىرمەيتىن ءتاسىل ىزدەڭىز. ءبىر مەزگىل كىتابىڭىزدى قويىپ, سول تىلدە مۋزىكا تىڭداۋدى, كينو كورۋدى ادەتكە اينالدىرىڭىز. بىراق وقۋ مەن دەمالىس اراسىنداعى ءۇزىلىس ۇزاققا سوزىلىپ, ساباعىڭىزدى تاستاپ كەتپەڭىز.
سوزدەردى ءبىر-بىرلەپ ەمەس, بىردەن ءماتىن ىشىندەگى ءسوز تىركەسىن, سويلەمدى جاتتاۋعا تىرىسىڭىز.
ىشتەي ءبارىن اۋدارىپ ءجۇرىڭىز. كوشەدەگى جارناما, ءاننىڭ ءسوزى, گازەتتەگى ماقالا, كەزدەيسوق ەستىلگەن ديالوگ, تاعى دا باسقاسىن.
ءماتىننىڭ قاتەسىز ەكەنىنە كوز جەتكىزىپ بارىپ جاتتاۋعا كىرىسۋ كەرەك.
فرازەولوگيالىق تىركەستەردى, قاناتتى سوزدەردى قويىن داپتەرىڭىزگە ءتۇرتىپ قويىڭىز.
شەت ءتىلى – بەرىك قامال. ونى جاۋلايمىن دەسەڭىز, سول تىلدە كينو كورۋ, كىتاپ وقۋ, ينتەرنەت سايتتارىنداعى جاڭالىقتاردى شولۋ, ءتىلدى بىلەتىن ادامدارمەن اڭگىمەلەسۋ سىندى جان-جاقتى ىزدەنىس قاجەت.
قاتەلەسۋدەن قىسىلماڭىز. كەرىسىنشە بىلەتىندەردەن ءسىزدى تۇزەتۋىن سۇراڭىز.
ماقساتقا جەتەمىن دەگەن بەرىك سەنىمدە بولىڭىز. «جاسىمايتىن كۇش-جىگەر, ءتىل مەڭگەرۋگە دەگەن ەرەكشە قابىلەتىم بار» دەپ ويلاۋدان جالىقپاڭىز.
ءمادينا جاقىپ
