ەلورداداعى پروبلەمالى 12 ءۇيدىڭ قۇرىلىسى تولىققاندى ءجۇرىپ جاتىر. بىرنەشە جەر ۋچاسكەسىندە ورنالاسقان «باسپانا كوكتال» كوپپاتەرلى تۇرعىن ءۇي كەشەنى 13 ۇيدەن قۇرالادى. بۇگىندە ولاردىڭ بىرەۋى اياقتالعان. وسى پروبلەمالى نىساننىڭ قۇرىلىسى بۇگىندە وڭ شەشىمىن تاۋىپ وتىر.
«بەس جىل بۇرىن قۇرىلىسى توقتاپ قالعان 12 ءۇي «قۇرىلىسى ۇزاققا سوزىلعان» نىسان رەتىندە تانىلعان. ولاردىڭ ارقايسىسىندا شەشىلمەگەن, پروبلەمالىق ماسەلەلەر بولدى: شاتىردان سۋ كەتۋ, قاسبەتتىڭ, تەرەزەلەردىڭ, ەسىكتەردىڭ, ليفت شاحتالارىنىڭ جانە تالاپقا ساي جاعدايدىڭ بولماۋى. جارىق, جىلۋ, سۋ مەن كارىز جۇيەلەرى دە ينجەنەرلىك جەلىلەرگە قوسىلمادى.
ۇلەسكەرلەرمەن بىرنەشە رەت كەزدەسىپ, جوسپارلى قۇرىلىس كەستەسىن قۇردىق. بۇل ۇيلەردەن 600-گە جۋىق وتباسى پاتەرلەرىن كۇتىپ ءجۇر.
بۇرىنعى قۇرىلىسشى بىرنەشە قاباتتى زاڭسىز تۇردە سالىپ, ليفتىلەردى قاراستىرماعان. قۇرىلىس سالاسىنداعى قولدانىستاعى نورمالارعا سايكەس عيمارات 6 قاباتتان اسسا مىندەتتى تۇردە ليفتىمەن قامتاماسىز ەتىلۋى ءتيىس. سونداي-اق ورتكە قارسى ەۆاكۋاتسيالىق باسپالداقتار بولعان جوق. وسىعان بايلانىستى ليفتتەر مەن ەۆاكۋاتسيالىق باسپالداقتاردى ورناتۋ ءۇشىن بولىمدەردى بولشەكتەۋ قاجەت بولدى.
بارلىق اتالعان قۇرىلىس جۇمىستارى جۇرگىزىلىپ جاتىر. تۇرعىن ءۇي كەشەنىن «ەلوردا قۇرىلىس كومپانياسىنىڭ» قاتىسۋىمەن «نۇرلى جەر» باعدارلاماسى اياسىندا سالىپ جاتىرمىز. قۇرىلىس قارقىنىن كۇشەيتىپ, ۇيلەردى جىل سوڭىنا دەيىن اياقتاۋدى تاپسىردىم. اۋماقتى اباتتاندىرۋ كوكتەمگە جوسپارلانعان» دەپ جازدى نۇر-سۇلتان قالاسىنىڭ اكىمى التاي كولگىنوۆ ءوزىنىڭ ينستاگرام پاراقشاسىندا.
