كەشە استانادا «Til-Qazyna» اتتى جاڭا لاتىن الىپبيىندە شىعاتىن تۇڭعىش گازەتتىڭ تۇساۋى كەسىلدى.
اتالمىش باسىلىم قر مادەنيەت جانە سپورت مينيسترلىگى مەن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ مۇرىندىق بولۋىمەن جارىق كوردى.
– ەلباسىنىڭ 2025 جىلعا دەيىن لاتىن قارپىنە كوشۋ جونىندەگى تاپسىرماسىنا وراي بىرقاتار ىستەر اتقارىلىپ جاتىر. بۇل باسىلىم دا سونىڭ ءبىر پاراسى. ايىنا ەكى رەت شىعاتىن جاڭا گازەتتە ءتىل ماسەلەسىنە قاتىستى ماقالالار مەن تانىمدىق ماتەريالدار جاريالاناتىن بولادى, – دەدى تانىستىرىلىم بارىسىندا ءسوز سويلەگەن مادەنيەت جانە سپورت ءمينيسترى ارىستانبەك مۇحامەديۇلى.
جيىنعا قاتىسقان بەلگىلى عالىمدار مەن قوعام قايراتكەرلەرى وتكەن عاسىردا لاتىن الىپبيىمەن جارىق كورگەن قازاق باسىلىمدارىنىڭ تاريحىنا دا شولۋ جاسادى. سونداي-اق جاڭا گازەتتىڭ الداعى جۇمىسىنا قاتىستى پىكىرلەر دە ورتاعا سالىندى.
«Til-Qazyna» گازەتى لاتىن نەگىزدى قازاق ءالىپبيىن ءناسيحاتتاپ, جاڭا قازاق ەملەسىنىڭ ەرەجەلەرىن تۇسىندىرۋگە باعىتتالعان. وندا «ءالىپبي», «رۋحاني جاڭعىرۋ», «كيە», «عالام», «ەملە», «ساراپ» جانە «تانىم» ايدارلارى ارقىلى جاڭا ءالىپبي تۋرالى اقپارات, تانىمدىق ماتەريالدار جارىق كورەدى. گازەت ا3 فورماتىندا 8 بەتتەن قۇرالعان. باستاپقىدا ايىنا ەكى رەت 3 مىڭ دانامەن شىعارۋ جوسپارلانىپ وتىر. سونىمەن قاتار ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ رەسمي سايتىندا گازەتتىڭ ەلەكتروندى نۇسقاسى جاريالانىپ, ونلاين ازىرلەنەدى.
بوتاگوز ماراتقىزى
