كەشە نۇر-سۇلتان قالاسى ءماسليحاتىنىڭ 47-ءىنشى كەزەكتى سەسسياسى ءوتتى. كۇن تارتىبىنە ون ءبىر ماسەلە قويىلعان جيىنعا پارلامەنت سەناتىنىڭ دەپۋتاتى سەرىك جاقسىبەكوۆ قاتىستى. نەگىزگى ماسەلە – ەلورداداعى مادەنيەت, دەنە شىنىقتىرۋ مەن سپورتتىڭ جاعدايى تۋرالى, وسى سالالاردى ءارى قاراي دامىتۋ جۇمىسى جايلى قالا اكىمىنىڭ ورىنباسارى نۇرلان نۇركەنوۆ بايانداما جاساپ, ءماسليحات دەپۋتاتتارىنىڭ سۇراقتارىنا جاۋاپ بەردى.
بايانداماشى «ەلوردامىز ەلىمىزدىڭ ساياسي ورتالىعى رەتىندە عانا ەمەس, ءوزىنىڭ مادەني جانە رۋحاني بيىك مارتەبەسىن جان-جاقتى كورسەتىپ كەلە جاتىر» دەي كەلە, بۇل باعىتتاعى ستاتيستيكالىق دەرەكتەرمەن تانىستىردى. اتاپ ايتقاندا, قىسقى ماۋسىم بويى شاھاردا ۇيىمداستىرىلعان «Astana Winter Land» فەستيۆالى اياسىندا 19 نىسان قىزمەت كورسەتتى. كونكيلەردى, شاڭعىلاردى جالعا بەرۋ ورىندارى سىندى وسى نىساندارعا قىس ىشىندە 400 مىڭنان استام كەلۋ تىركەلگەن.
بۇل نىساندارعا ءبىر ادام ءتورت رەت باردى دەپ ەسەپتەگەندە, 100 مىڭ ادامداي شىققانىن ايتقان ن. نۇركەنوۆ قازىر قالا اكىمىنىڭ تاپسىرماسىمەن قىسقى دەمالىستىڭ عانا ەمەس, حالىق ءۇشىن جالپى جىل بويعى دەمالىستىڭ جوسپارى جاسالىپ جاتقانىن جەتكىزدى. ياعني, كوكتەمگى, جازعى, كۇز بەن قىسقى دەمالىستارعا نەعۇرلىم كوبىرەك ادام تارتىلماق. دەمالىس كەڭىستىگى كەڭەيتىلىپ, بالكىم, بۇل ءۇشىن ينۆەستورلارعا جەر تەلىمدەرى بولىنەدى.
«قالامىز ەلىمىزدىڭ سپورتتىق استاناسى بولىپ تانىلدى. ەلوردادا ايماقتارمەن سالىستىرعاندا سپورتتىق نىساندار كوپ ورنالاسقان. ۇزدىك سپورتشىلار مەن جاتتىقتىرۋشىلار, سپورت سالاسىنداعى جەتەكشى ماماندار وسىندا تۇرىپ, ەڭبەك ەتىپ جاتىر» دەگەن قالا باسشىسىنىڭ ورىنباسارى سپورت سالاسىنداعى جەتىستىكتەرگە دە توقتالدى.
مادەنيەت پەن سپورتتاعى جەتىلدىرۋدى قاجەت ەتەتىن ماسەلەلەردى دە جاسىرماي, تۇيتكىلدەردى اتاپ, ولاردى شەشۋ بويىنشا جۇمىس جۇرگىزىلەتىنىن ايتتى. سونىڭ ءبىرى استانالىق تسيرك, قۋىرشاقتار تەاترى, بي ۇجىمدارىنىڭ ارتىستەرىنە قاتىستى بولىپ وتىر. ولار ەڭبەك جانە زەينەتاقى زاڭنامالارىنا زەينەتكە شىعۋ جاسىن تومەندەتۋ بويىنشا وزگەرىستەردى ەنگىزۋدى سۇراعان. «بۇرىن ەڭبەك سىڭىرگەن قايراتكەرلەر ساحنادا 20 جىل جۇمىس ىستەگەننەن كەيىن زەينەتكە شىعاتىن. قازىر ايەلدەر ءۇشىن زەينەت جاسى – 59 جاس. بولاشاقتا بۇل جاس 63-كە جەتەدى. ال ەرلەردە – 63 جاس. ماماندىق ەرەكشەلىكتەرىنە بايلانىستى, اتاپ ايتقاندا, تسيرك, بالەت ارتىستەرى بۇل جاسقا جەتكەنشە جۇمىس ىستەي المايدى. وسى ماسەلە پارلامەنتتە قارالدى. الايدا ءالى دە اشىق بولىپ تۇر. ءتيىستى جۇمىستى جالعاستىرامىز» دەدى ن. نۇركەنوۆ.
مادەنيەت جانە سپورت سالالارىنىڭ قىزمەتكەرلەرى ءۇشىن قولجەتىمدى باسپانا ماسەلەسى دە وزەكتى ەكەنىن ايتقان اكىم ورىنباسارى ەلوردادا قازىر بۇل سالالاردا 3800-دەن اسا ادام جۇمىس ىستەپ جاتقانىن, ولاردىڭ 2 مىڭعا جۋىعى تۇرعىن ءۇي كەزەگىندە تۇرعانىن جەتكىزدى. ولاردىڭ اراسىندا باسپانالارىن كەڭەيتكىسى كەلەتىندەر دە بار.
«باسپانانى جالعا بەرۋ نەمەسە شاعىن وتباسىلارعا ارنالعان جاتاقحانالاردى سالۋ جولىمەن بۇل ماسەلەنى شەشە الار ەدىك. قازىرگى كەزدە قورعالجىن تاسجولىنىڭ بويىندا جاتاقحانا سالۋ ءۇشىن جەر تەلىمى ءبولىندى. بۇل ماسەلە بويىنشا جۇمىستىڭ بەلسەندى جۇرگىزىلۋىنە اتسالىسامىز» دەدى قالا باسشىسىنىڭ ورىنباسارى.
مەكتەپ وقۋشىلارى مەن كوللەدج ستۋدەنتتەرى بۇل كۇندەرى قالا تەاترلارىنا از باراتىن بولعان. ونىڭ سەبەبى, ءبىلىم بەرۋ مەكەمەلەرىندە بيلەتتەردى ساتۋعا تىيىم سالىندى. «قازىرگى تاڭدا تەاتر كورەرمەندەرى كوبەيگەن. الايدا وقۋشىلار مەن ستۋدەنتتەردىڭ ۇلەسى ازايعان. بۇرىندارى تەاتر ونكۇندىكتەرى وتكىزىلىپ, وندا وقۋ باعدارلاماسىنا سايكەس جانە پاتريوتتىق-ادامگەرشىلىك تاربيە بەرۋ ماقساتىندا بارلىق مەكتەپتەردىڭ وقۋشىلارى تەاترلارعا باراتىن. بۇل ماسەلە ءبىزدىڭ باقىلاۋىمىزدا. ارينە, مەكتەپ وقۋشىلارى مەن كوللەدج ستۋدەنتتەرىن قالانىڭ مادەني ومىرىنە تارتۋ مۇمكىندىكتەرىن قاراستىرامىز» دەدى نۇرلان جاڭبىرشىۇلى.
جۋىردا قالالىق ءماسليحات دەپۋتاتتارى بىرقاتار مادەني جانە سپورتتىق نىسانداردى ارالاپ, سونداعى تۇيتكىلدەردى انىقتادى. ونىڭ ءبىرى استانالىق تسيرككە قاتىستى بولدى. عيماراتتىڭ ءبىر بولىگى سەنىمدى باسقارۋعا بەرىلگەن. قالا باسشىسىنىڭ ورىنباسارى تەكسەرىس قورىتىندىسىندا تسيركتىڭ تومەنگى قاباتىندا ورنالاسقان تاماقتانۋ ورنىن جالعا العان ادام ورتكە قارسى تالاپتاردى ساقتاماعانى, مۇمكىندىگى شەكتەۋلى جاندارعا ارنالعان پاندۋستى بۇزىپ تاستاعانى انىقتالعانىن ايتىپ, ونىمەن اڭگىمە جۇرگىزىلگەنىن, دەپۋتاتتاردىڭ ەسكەرتپەلەرىنە سايكەس ماسەلە شەشىلەتىنىن جەتكىزدى.
بالالار مەن جاسوسپىرىمدەر سپورتىنداعى تۇيتكىلدەردى اتاپ وتكەن ن. نۇركەنوۆ سپورت مەكتەپتەرىنىڭ ماتەريالدىق بازاسىن كۇشەيتۋ, جاڭا سپورتتىق قۇرالداردى ساتىپ الۋ كەرەكتىگىن, جالپى قالادا جاڭا سپورتتىق نىسانداردى سالۋ, بارىن جاڭعىرتۋ قاجەتتىگىن ايتتى.
جوندەۋدى قاجەت ەتەتىن مادەني نىساندارعا توقتالعان قالا باسشىسىنىڭ ورىنباسارى, سونىڭ ىشىندە «جاستار» تەاترىنا توقتالدى. «عيمارات 1954 جىلى سالىنعان. بۇل تاريحي جانە مادەني ەسكەرتكىش بولىپ سانالادى. نىسان 2014 جانە 2018 جىلى جوندەلدى. الايدا كۇردەلى جوندەۋدەن وتپەدى. ءبىز اقاۋ شىققان جەرگە قاتىستى اكت دايىنداپ, ەندى جوبالىق-سمەتالىق قۇجاتتى ازىرلەيمىز» دەگەن ن. نۇركەنوۆ «ماڭگىلىك ەل» سالتانات قاقپاسىنا قاتىستى ماسەلەنى اتادى.
«نىساننىڭ قۇرىلىسى كەزىندە جەراستى وتكەلى ۇستىندەگى كولىك جولى ساپاسىز سالىنعان. جىل سايىن جۇرگىزىلەتىن اعىمداعى جوندەۋ جۇمىستارى ماسەلەنى شەشپەي تۇر. جولدى قايتا سالۋ ءۇشىن 600 ملن تەڭگەدەن استام قارجى كەرەك» دەدى قالا باسشىسىنىڭ ورىنباسارى.
سونداي-اق «تولقىن» سپورت كەشەنىنىڭ شاتىرىن جوندەۋگە قارجى كەرەكتىگىن ايتىپ, قالادا سپورتتىق گيمناستيكا, باتۋتتىق گيمناستيكا, سپورتتىق بي سياقتى سپورت تۇرلەرىمەن اينالىسۋعا زالدىڭ جوقتىعىن, دارىگەرلىك-دەنە شىنىقتىرۋ ديسپانسەردىڭ سالىنباعانىن جەتكىزدى. سپورتشىلاردى تەكسەرۋ قازىر №5 قالالىق ەمحانادا جۇرگىزىلەتىنىن, بۇل جايت ماسەلەنى شەشپەي كەلە جاتقانىن, ديسپانسەردى سالۋ كەرەكتىگىن ايتتى.
