ۇشتىكتىڭ بىرلىگى
كەشە ەلوردا اكىمىنىڭ ورىنباسارى ماليكا بەكتۇروۆا پوليتەحنيكالىق كوللەدجدىڭ وقۋ پروتسەسىمەن تانىسىپ شىقتى. ءىس-شارا بارىسىندا ول اتالعان كوللەدجگە تاعى ەكى وقۋ ورنى قوسىلاتىنىن ءمالىم ەتتى.
وقۋ ورنىنىڭ قىزمەتكەرلەرى جينالعان جۇرتتى ستۋدەنتتەردىڭ دارىسىمەن تانىستىردى. العاشقى كىرگەن شەبەرحانادا جاستاردىڭ تەمىردى دانەكەرلەۋ ساباعى كورسەتىلسە, كەلەسى بولمەدە ۇستازداردىڭ جەتەكشىلىگىمەن مەرسەدەس, اۋدي سەكىلدى نەمىس كولىكتەرىنىڭ قوزعالتقىشىن بۇزىپ, قايتا جيناۋ, اقاۋلارىنىڭ الدىن الۋ سەكىلدى پروتسەستەرى كورسەتىلدى. ال ەندىگى بولىمدە قۇرىلىسشىلاردىڭ جۇمىسى ۇسىنىلدى.
سوڭعى جىلدارى الەم ەلدەرىندە ەلەكتر كولىكتەردى قولدانۋ ۇردىسكە اينالىپ كەلەدى. بۇل تۇرعىدا قازاقستاندا Tesla كولىكتەرىن پايدالاناتىندار قاتارى ارتقانمەن, ونى ساۋاتتى جوندەي بىلەتىن ماماندار تاپشى بولىپ تۇرعانى جاسىرىن ەمەس. پوليتەحنيكالىق كوللەدج مۇنى دا نازاردان تىس قالدىرماي, بولاشاققا قاجەت ماماندار دايارلاۋدى قولعا الىپتى.
ەلوردانى گازداندىرۋدا Bosch Thermotechnik كومپانياسى مەن پوليتەحنيكالىق كوللەدجدىڭ بىرلەسىپ اشقان وقۋ ورتالىعىندا ءبىراز باستاما قاراستىرىلىپ جاتقانى ءمالىم بولدى. جينالعان جۇرتتى تاڭقالدىرعان ماماندىقتىڭ ءبىرى – عيماراتتىڭ جوباسىن BIM تەحنولوگياسى بويىنشا دايىنداپ شىعارۋ ءۇردىسى بولدى. بۇل تەحنولوگيا قازىر وزىق ەلدەردە عانا قولدانىلىپ كەلەدى ەكەن.
– ءبىز قازىرگى زاماننىڭ تالاپتارىنا ساي كەلمەيتىن كەي ماماندىقتاردىڭ ورنىنا زاماناۋي سالالاردى ەنگىزدىك. سونداي-اق, پوليتەحنيكالىق كوللەدجگە ەنەرگەتيكا جانە بايلانىس, قۇرىلىس كوللەدجدەرىن بىرىكتىرۋدى ءجون كوردىك. ولاردىڭ ءبىر سالاداعى مامانداردى دايىنداعانىمەن ماتەريالدىق-تەحنيكالىق الەۋەتتەرى, وقۋ پروگرامماسى, ءبىلىم بەرۋ تاسىلدەرى ايتارلىقتاي بولمادى. سوندىقتان ۇشەۋىن بىرىكتىردىك. ەندى ولاردىڭ ماتەريالدىق-تەحنيكالىق بازاسىن كۇشەيتەمىز, – دەدى ماليكا بەكتۇروۆا.
ءسوز اراسىندا ول پوليتەحنيكالىق كوللەدج الداعى وقۋ جىلىنان باستاپ جاڭا عيماراتقا كوشەتىنىن جەتكىزدى. بۇعان قوسا كوللەدج تۇلەكتەرىنىڭ جوعارى ءبىلىمدى بولىپ ەسەپتەلۋى ءۇشىن وقۋ باعدارلاماسىن بىرىكتىرۋ ماسەلەسى قاراستىرىلىپ جاتقانىن جەتكىزدى. ياعني ستۋدەنتتىڭ العان ءبىلىمى – تەوريالىق, پراكتيكالىق دارىستەرى كرەديتتىك ساعاتقا (credit hours) اينالىپ, جوعارى ءبىلىمدى بولىپ ەسەپتەلەدى.