ەلوردالىق مادەنيەت سالاسىنىڭ وكىلدەرى ە.راحماديەۆ اتىنداعى مەملەكەتتىك اكادەميالىق فيلارمونياسىندا پارلامەنت ءماجىلىسىنىڭ دەپۋتاتى امانجول التايمەن كەزدەستى.
«مادەنيەت سالاسىنداعى وزەكتى ماسەلەلەر» تاقىرىبىندا دوڭگەلەك ۇستەل تۇرىندە وتكەن كەزدەسۋگە نۇر-سۇلتان قالاسىنداعى ە.راحماديەۆ اتىنداعى مەملەكەتتىك اكادەميالىق فيلارمونياسى, «اتامەكەن» قازاقستان كارتاسى» ەتنو-مەموريالدىق كەشەنى, م.گوركي اتىنداعى مەملەكەتتىك اكادەميالىق ورىس دراما تەاترى, قالالىق ورتالىقتاندىرىلعان كىتاپحانالار جۇيەسى, «استانالىق تسيرك», ت. ب. مەملەكەتتىك مادەنيەت ۇيىمدارىنىڭ جەتەكشىلەرى مەن وكىلدەرى قاتىستى. مادەنيەت سالاسىنىڭ مايتالماندارى وزدەرىن تولعاندىرعان وزەكجاردى, وتكىر ماسەلەلەر جايلى ءسوز تيەگىن اعىتتى.
قىزمەتكەرلەردى تولعاندىراتىن باستى ماسەلە – جالاقىنىڭ باسقا تارتسا اياققا جەتپەيتىندەي ازدىعى ەكەنىنە ايرىقشا توقتالعان سالا ماماندارى وسىدان تۋىندايتىن بىرقاتار ماسەلەنى ساۋساقپەن ساناپ كورسەتتى: جاس, قاجەتتى مامانداردى جۇمىسقا تارتۋ قيىنعا سوقسا, دايارلانعان, تىسقاقتى ماماندار باسقا سالاعا اۋىسىپ, جايى كەلسە, شەتەل اسىپ كەتىپ جاتىر. سۇرانىس ازايعاندىقتان, جوو-دا ماماندىق باعىتى قىسقارعان, رەجيسسەرلەر مەن كومپوزيتورلاردىڭ دا قاتارى سيرەگەن.
دوڭگەلەك ۇستەلگە جينالعاندار بازالىق-لاۋازىمدىق جالاقىنىڭ ماردىمسىزدىعى, مامانداردىڭ تۇراقتاماۋى, جاس ماماندارعا ارنالعان جاتاقحانالاردىڭ جەتىمسىزدىگى, دايىندىق بازاسىنىڭ تاپشىلىعى, مادەنيەت سالاسىنىڭ ەرەكشەلىگىن ەسكەرمەۋدەن مەملەكەتتىك ساتىپ الۋ جۇيەسىندە تۋىنداعان كەمشىلىكتەر, كىتاپ قورى مەن كىتاپحاناشى مۇددەسىن قورعايتىن زاڭنىڭ بولماۋى, مادەنيەت مەكەمەلەرىن باسقارۋ جۇيەسىن جەتىلدىرۋ مەن جاڭارتۋدىڭ زارۋلىگى, ارەنا ارتىستەرىنىڭ زەينەتكە شىعۋ جاسىن تومەندەتۋدىڭ قاجەتتىگى, ت. ب. ماسەلەلەر بويىنشا ءماجىلىس دەپۋتاتىنىڭ الدىندا اعىنان جارىلىپ, مادەنيەت جانە ونەر قىزمەتكەرلەرىنىڭ مۇڭ-مۇقتاجىن جەتەسىنە جەتكىزە ايتتى.
ءوزى دە ونەردىڭ قايناعان ورتاسىنان شىققان ايتىسكەر اقىن, ءماجىلىس دەپۋتاتى امانجول ءالتاي دوڭگەلەك ۇستەلدە ورتاعا تۇسكەن ۇسىنىستار مەن كوتەرىلگەن ماسەلەلەردى ۇكىمەتتىڭ قۇلاعىنا جەتكىزۋگە ۋادە بەردى. مادەنيەت پەن ونەر سالاسىنىڭ وكىلدەرى كوپتەن بەرى ايتىلىپ جۇرگەن ماسەلەنىڭ «باياعى جارتاس – سول جارتاس» كۇيىندە قالماي, ناقتى شەشۋ تەتىكتەرى ەرتەرەك ازىرلەنسە ەكەن دەگەن تىلەكپەن تاراستى.
ەرلان مازان
