حالىقتىڭ جىل سايىن ءوسۋى جانە جولدارداعى ترافيكتىڭ ۇلعايۋى ەسكەرىلە وتىرىپ, ەلوردادا كەشەندى كولىك سحەماسىنىڭ تۇجىرىمداماسى بەكىتىلدى. اتالعان قۇجات قالاداعى كولىكتىڭ 10 جانە ودان دا كوپ جىلعا ارنالعان ءبىرتۇتاس تەحنيكالىق پايىمىن ازىرلەۋگە مۇمكىندىك بەرەدى. بۇل تۋرالى كەشە قالالىق ءماسليحات وتىرىسىندا «City Transportation Systems» جشس باسقارما توراعاسى بەكمىرزا يگەنبەردينوۆ ايتتى.
ككس ارقىلى سونىمەن قاتار جاڭا كوپىرلەر, جول ايىرىقتارى سانىن ارتتىرۋ, كوشەلەردى كەڭەيتۋ, قوعامدىق كولىكتى ءبىرشاما جاڭعىرتۋ جۇمىستارى قاراستىرىلادى.
«قالانىڭ باس جوسپارىندا كولىك دامۋى ءبولىمى بار, بىراق ۋاقىت تالابى مەن ۋربانيزاتسيانى, جاڭا سىن-تەگەۋرىندەردى ەسكەرسەك (كولىك-اۋىسىپ وتىرۋ توراپتارى, بۇرىلۋ الاڭدارى, جاياۋ جۇرگىنشىلەر, باعدارشامدار جانە ت. ب.), كەشەندى كولىك سحەماسىنىڭ دامۋىن جەكە ءبولىپ قاراستىرۋ قاجەت. الەمدىك تاجىريبەدە قالالىق جانە كولىكتىك جوسپارلاۋ – قالا قۇرىلىسىنىڭ ءوزارا بايلانىستى جانە ءوزارا تاۋەلدى ەلەمەنتتەرى» دەدى ب.يگەنبەردينوۆ.
كولىك كومپانياسىنىڭ باسشىسى قالادا كولىكتەردى باسقاراتىن ۇيىمدار اراسىنداعى ۇيلەستىرۋ جۇمىستارىن كۇشەيتۋ قاجەتتىگىن دە اتاپ ءوتتى.
«بۇدان باسقا نەگىزگى كوشەلەر مەن وزەن ارقىلى قوسىلاتىن جولدار سانىن ارتتىرۋ قاجەت. تۇرعىن ءۇي كۆارتالدارىنىڭ قۇرىلىسىن كولىككە قولجەتىمدىلىكتى ەسكەرە وتىرىپ جوسپارلاۋ كەرەك. جوعارىدا ايتىلعانداردى ەسكەرە كەلە, قالالىق كولىكتى باسقارۋ سالاسىنداعى ستراتەگيالىق قۇجات – كەشەندى كولىك سحەماسىن جاساۋ ەڭ دۇرىس شەشىم بولادى» دەپ اتاپ ءوتتى ول.
كەشەندى كولىك سحەماسى ەلوردادا قالالىق كولىكتى ۇيىمداستىرۋ مەن باسقارۋعا قاتىستى قولدانىستاعى قۇقىقتىق جۇيەنىڭ ولقىلىقتارىن انىقتاپ, جەر پايدالانۋ مەن قالالىق كولىكتى جوسپارلاۋدى, وسى سالاعا تارتىلعان ورگانداردىڭ فۋنكتسيالارى مەن وكىلەتتىكتەرىن بىرىكتىرەدى. قۇجاتتا سونىمەن قاتار قوعامدىق كولىك, جول-كولىك ينفراقۇرىلىمى, جول قوزعالىسىن ۇيىمداستىرۋ, كولىك اعىندارىن باسقارۋ, تۇراق كەڭىستىگى جانە ت. ب. سالالارداعى پروبلەمالاردى شەشۋ جولدارى ۇسىنىلادى.
كەشەندى كولىك سحەماسىنىڭ تۇجىرىمداماسىن قالالىق ءماسليحات بەكىتتى. ۇكىمەت جانە قر يندۋستريا جانە ينفراقۇرىلىمدى دامىتۋ مينيسترلىگىمەن بىرلەسىپ قارجىلاندىرۋ كوزدەرى كەلىسىلەدى, بۇدان ءارى كەشەندى كولىك سحەماسىن ىسكە اسىرۋ قولعا الىنادى. سحەمانى ازىرلەۋمەن قاتار نۇر-سۇلتان قالاسىنىڭ اۋماعىن 2025 جىلعا دەيىن دامىتۋ باعدارلاماسىنداعى نىسانالى كورسەتكىشتەردى قاراستىرۋ قاجەت.
