نۇر-سۇلتان قالاسىنىڭ قوعامدىق كەڭەس مۇشەلەرى ەلوردانىڭ 2021 جىلعا ارنالعان بيۋدجەتىنىڭ ورىندالۋى تۋرالى ەسەپتى تالقىلادى
جاڭا قۇرامنىڭ وتىرىسى فيلولوگيا عىلىمدارىنىڭ دوكتورى, پروفەسسور, قازاقستان جاراتىلىستانۋ عىلىمدارى اكادەمياسىنىڭ ۆيتسە-پرەزيدەنتى, قازاقستان رەسپۋبليكاسى ءبىلىم بەرۋ سالاسىنىڭ قۇرمەتتى قىزمەتكەرى, اكادەميك كارىمبەك قۇرماناليەۆتى اسقارالى 60 جاسىمەن قۇتتىقتاۋدان باستالدى. قوعامدىق كەڭەستىڭ توراعاسى زۋلفۋحار گايپوۆ الدىمەن پرەزيدەنت اكىمشىلىگى باسشىسىنىڭ ورىنباسارى ايدا بالاەۆانىڭ, سودان سوڭ نۇر-سۇلتان قالاسىنىڭ اكىمى التاي كولگىنوۆتىڭ قۇتتىقتاۋ حاتتارىن وقىپ, مەرەيتوي يەسىنە مىقتى دەنساۋلىق, جۇمىسىنا تابىس جانە وتباسىنا باق-بەرەكە تىلەدى. سونداي-اق «امانات» پارتياسىنىڭ اتقارۋشى حاتشىسى اسحات ورالوۆ تا ىزگى نيەتىن ءبىلدىردى. قوعامدىق كەڭەس مۇشەلەرى اتىنان يگى تىلەگىن جەتكىزگەن كەڭەس توراعاسى ءبىلىم بەرۋ جانە عىلىم سالاسىنداعى ەرەن ەڭبەگىن ەسكەرە وتىرىپ, كارىمبەك ارىستانبەكۇلىنا گۇل شوقتارىن تابىستادى. ءوز كەزەگىندە مەرەيتوي يەسى: «ماعان كورسەتىلگەن قۇرمەت – بۇل قوعامدىق كەڭەس مۇشەلەرىنە كورسەتىلگەن قۇرمەت دەپ سانايمىن» دەپ, شىنايى ىقىلاس ءبىلدىرىپ, ەرەكشە قۇرمەت كورسەتكەندەرى ءۇشىن قوعامدىق كەڭەس مۇشەلەرىنە العىس ايتتى.
قوعامدىق كەڭەس وتىرىسىنىڭ كۇن تارتىبىندەگى نەگىزگى ماسەلەلەردىڭ ءبىرى 2021 جىلعا ارنالعان ەلوردا بيۋدجەتىنىڭ اتقارىلۋ قورىتىندىلارىن قاراۋ بولدى. بۇل رەتتە قالالىق قارجى باسقارماسىنىڭ باسشىسى ءالىبي جۇماەۆ قوعامدىق كەڭەس مۇشەلەرىن نۇر-سۇلتان قالاسىنىڭ 2021 جىلعا ارنالعان بيۋدجەتىنىڭ ورىندالۋ قورىتىندىلارى تۋرالى حاباردار ەتتى.
باسقارما باسشىسىنىڭ ايتۋىنشا, 2021 جىلعى بيۋدجەت ساياساتى نۇر-سۇلتان قالاسىنىڭ دامۋ باعدارلاماسىندا جانە بيۋدجەتتىك باعدارلامالار اكىمشىلەرىنىڭ بيۋدجەتتىك باعدارلامالارىندا انىقتالعان ماقساتتارعا جانە مىندەتتەرگە قول جەتكىزۋگە باعىتتالدى. وسىلايشا بيۋدجەت 700 ملرد تەڭگە كولەمىندە ورىندالدى, 2021 جىل بويىنشا قالا بيۋدجەتىنىڭ شىعىستارى 97,2%-عا اتقارىلدى. مەنشىكتى كىرىستەردىڭ كولەمى 496 ملرد تەڭگەنى نەمەسە 109,5% ورىنداي وتىرىپ (جوسپارداعى 453 ملرد تەڭگە سومادا) قۇرادى. بيۋدجەتتىڭ اتقارىلۋىن تالداۋ ءوز كىرىستەرىنىڭ جىل سايىن ۇلعايىپ كەلە جاتقانىن كورسەتەدى. بيۋدجەتتىڭ كىرىس بولىگىنىڭ نەگىزگى اسىرا ورىندالۋى سالىقتىق ەمەس تۇسىمدەر جانە نەگىزگى كاپيتالدى ساتۋدان تۇسەتىن تۇسىمدەر ەسەبىنەن قامتاماسىز ەتىلدى.
رەسپۋبليكالىق بيۋدجەتتەن بولىنگەن نىسانالى ترانسفەرتتەر مەن كرەديتتەر بويىنشا يگەرۋشىلىك 94,4% قۇرادى (اتقارىلۋى 196925,5 ملن تەڭگەنى قۇرادى), ونىڭ ىشىندە: اعىمداعى باعدارلامالار بويىنشا – 99,4%, دامۋ بيۋدجەتى بويىنشا – 90,2%.
2021 جىلدىڭ قاڭتار-جەلتوقسان ايىنىڭ قورىتىندىسى بويىنشا ەلوردانىڭ نەگىزگى الەۋمەتتىك-ەكونوميكالىق كورسەتكىشتەرى وڭ ءوسىم كورسەتتى. بايانداماشى رەسپۋبليكالىق بيۋدجەتتەن بولىنگەن ترانسفەرتتەرگە, «جۇمىسپەن قامتۋدىڭ جول كارتاسى» باعدارلاماسى بويىنشا ءىس-شارالاردى ىسكە اسىرۋعا, شاعىن جانە ورتا كاسىپكەرلىكتى قولداۋعا, الەۋمەتتىك ماسەلەلەردى شەشۋگە توقتالدى. سونداي-اق قوعامدىق كەڭەس مۇشەلەرى 2021 جىلعا ارنالعان ەلوردا بيۋدجەتىنىڭ اتقارىلۋ قورىتىندىلارىن تالداپ, بيۋدجەتتىك باعدارلامالار اكىمشىلەرىنىڭ قاراجاتتى يگەرۋى بويىنشا وڭ ديناميكانى اتاپ ءوتتى.
قالا بيۋدجەتى قاراجاتىنىڭ جۇمسالۋىن وڭتايلاندىرۋ جونىندەگى جۇمىس ونىڭ الەۋمەتتىك باعىتىن ساقتاۋعا مۇمكىندىك بەردى. جىل سايىن ءبىلىم بەرۋ, دەنساۋلىق ساقتاۋ, مادەنيەت سالالارىنا, مەملەكەتتىك باعدارلامالار بويىنشا تۇرعىن ءۇي قۇرىلىسىنا, قازاقستان رەسپۋبليكاسىنىڭ زاڭناماسىندا ايقىندالعان ازاماتتاردىڭ جەكەلەگەن ساناتتارىنا سپورت جانە الەۋمەتتىك كومەك كورسەتۋگە شىعىستار ۇلعايۋدا. دەگەنمەن كەيبىر باسقارمالاردىڭ بيۋدجەتتەن بولىنگەن قارجىنى ۋاقىتىلى يگەرمەگەنى بەلگىلى بولدى. ماسەلەن, قالالىق قۇرىلىس باسقارماسى مەن وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى بيۋدجەتتەن بولىنگەن قاراجاتتى ۋاقىتىلى يگەرمەگەن. سول ءۇشىن اتالمىش باسقارما باسشىلارى, سونىمەن بىرگە قالاداعى 9 مەكتەپ ديرەكتورى, بارلىعى 17 لاۋازىمدى تۇلعا قاتاڭ سوگىس جانە ەسكەرتۋ جاريالاۋ تۇرىندەگى ءتۇرلى تارتىپتىك جاۋاپكەرشىلىككە تارتىلعان.
جالپى تالقىلاۋ قورىتىندىسى بويىنشا 2021 جىلعا ارنالعان بيۋدجەتتىڭ اتقارىلۋى تۋرالى ەسەپ قوعامدىق كەڭەس مۇشەلەرىنىڭ ۇسىنىستارى مەن تولىقتىرۋلارىن ەسكەرە وتىرىپ, كوپشىلىك داۋىسپەن ماقۇلداندى.
مەملەكەتتىك قىزمەت ىستەرى اگەنتتىگىنىڭ نۇر-سۇلتان قالاسى بويىنشا دەپارتامەنتى باسشىسىنىڭ ورىنباسارى رومان كيم ەلورداداعى مەملەكەتتىك ورگانداردىڭ قىزمەتىنە توقتالدى. جىل سايىن اگەنتتىك قىزمەتكەرلەرىنىڭ جۇرگىزەتىن الەۋمەتتىك زەرتتەۋلەرىنىڭ قورىتىندىسى بويىنشا 2020 جىلى باس قالا 17 ءوڭىر ىشىنەن مەملەكەتتىك قىزمەت كورسەتۋ ساپاسى جونىنەن 17-ورىندى يەلەنسە, بىلتىر 13-ورىنعا شىققان. ارينە, بۇل قوعام مۇشەلەرىن قاتتى الاڭداتتى. سەبەبى كەز كەلگەن ادام ەلىمىزدىڭ باس قالاسىنداعى مەملەكەتتىك قىزمەت كورسەتۋ جۇمىسىنا قاراپ جالپى مەملەكەتتىك ورگاندارعا باعا بەرەتىنى تۋرالى ايتا كەلە, دەپارتامەنت باسشىسىنىڭ ورىنباسارى الداعى ۋاقىتتا ەلوردا ءيميدجىن كوتەرۋ باعىتىنداعى جۇمىستى جاقسارتۋعا بىرلەسە اتسالىسۋعا شاقىردى.
گۇلبارشىن وكەشقىزى
