جەڭىس كۇنى قارساڭىندا استانا اكىمى اسەت يسەكەشەۆ ەلوردادا تۇراتىن بىرقاتار ۇلى وتان سوعىسى ارداگەرلەرىنىڭ ۇيىنە ارنايى بارىپ, مەرەكەمەن قۇتتىقتادى.
اسىلحان بەكباەۆ اسكەر قاتارىنا 18 جاسىندا شاقىرىلعان. 1944 جىلدىڭ قاراشاسىندا 134-ءشى گۆارديالىق اۆياتسيا پولكىنىڭ 6-شى گۆارديالىق اۆياتسيالىق بومبىلاۋ ديۆيزياسىنىڭ 3-ءشى بەلارۋس مايدانىندا باسقىنشىلاردان بەلورۋسسيا مەن پريبالتيكانى ازات ەتۋگە قاتىسقان ول سوعىستان كەيىنگى عۇمىرىن ءبىلىم سالاسىنا ارناعان.
«ارميادا 10 جىل بولدىم, ونىڭ 4 جىلى شىعىس پرۋسسياداعى سوعىستا ءوتتى. بۇل سوعىس تۋرالى نە ايتۋعا بولادى؟ وزىمە قىمبات جولداستارىمنىڭ ءبارى ەسىمدە. مەن شىعىس پرۋسسيادان پە-2 ۇشاعىمەن ۇشىپ, سول جەردە اۋىر جارالانىپ, جۇرە الماي قالدىم. ماعان بەلارۋستىق تاتيانا نوۆيكوۆا دەگەن قىز كۇتىم جاسادى. سودان سول قىزعا ۇيلەنىپ, ونى شىعىس قازاقستان وبلىسى بەسقاراعاي اۋدانىنا الىپ باردىم. تاتيانا سوندا ءجۇرىپ قازاق ءتىلى مەن ادەت-عۇرىپ, سالت-ءداستۇردى بويىنا ءسىڭىردى» دەيدى اسىلحان اقساقال ءوزىنىڭ سوعىس تۋرالى تاريحىن بايانداپ.
ال 94 جاسار ميحايل كوچەتكوۆ باتىس اسكەرى قۇرامىندا ءۇشىنشى بەلورۋسسيا جانە ءبىرىنشى پريبالتيكا مايدانىندا شايقاسقان. جەڭىس كۇنىن ول شىعىس پرۋسسياداعى كەنيگسبەرگ تۇبىندە قارسى الىپتى.
«سوعىستىڭ ءبىتۋىن نەمىس جەرىندە قارسى الدىق. بىزگە «وكوپتان شىعىڭدار, نەمىستەر بەرىلدى, سوعىس ءبىتتى» دەپ ايتقانى ەسىمدە قالىپتى. ول كەزدە سەنگەن دە جوقپىن. بىراق وكوپتان شىعا باستاعانىمىزدا راسىندا ەشكىم وق اتپادى. ءبىر-ءبىرىمىزدى قۇشاقتاپ قۇتتىقتاي باستادىق» دەيدى مايدانگەر.
اسەت يسەكەشەۆ ارداگەرلەرگە سىيلىق تابىس ەتىپ, ولاردىڭ كەلەشەك ۇرپاق ءۇشىن جاساعان ەرلىكتەرىنە شەكسىز العىسىن ءبىلدىردى.
«ەلىمىزگە جەڭىس سىيلاعاندارىڭىز ءۇشىن سىزدەرگە كوپ راقمەت. سىزدەر سوعىس كەزىندە قانشاما قيىندىقتاردى, وزدەرىڭىزگە قىمبات ادامداردى جوعالتۋ ساتتەرىن باستان وتكەردىڭىزدەر. جىل سايىن ارداگەرلەر ازايىپ بارادى. بىراق ءبىز ولاردىڭ ەرلىگىن ەشقاشان ۇمىتپايمىز. ارامىزداعى ءاربىر باتىرعا العىس ايتىپ, ولاردى ەرەكشە قۇرمەتتەيمىز. ءبىزدىڭ مىندەت – سىزدەردى كوزىمىزدىڭ قاراشىعىنداي ساقتاپ, ەرلىكتەرىڭىزدى ەرتەڭگى ۇرپاققا جەتكىزۋ. سىزدەرگە جانە جاقىندارىڭىزعا زور دەنساۋلىق تىلەيمىن» دەدى قالا باسشىسى.
