«استانا» كونتسەرت زالىندا ۇلى جەڭىستىڭ 73 جىلدىعىنا ارنالعان مەرەكەلىك كونتسەرت ءوتتى. قۇرمەتتى قوناقتار رەتىندە ۇلى وتان سوعىسىنىڭ ارداگەرلەرى, تىل ەڭبەككەرلەرى شاقىرىلدى. كونتسەرتتە مايدان اندەرى مەن بەيبىت جىلدارى جازىلعان سوعىس تۋرالى, ەرلىك داڭقىن پاش ەتەتىن جانە ۇلى جەڭىس جايىنداعى شىعارمالار شىرقالدى.
«جاس سارباز» بالالار حورى «سوعىستى توقتاتىڭدار!» انىمەن كونتسەرت شىمىلدىعىن ءتۇرىپ, وسكەلەڭ ۇرپاقتىڭ بەيبىت كۇنگە تىلەگىن جەتكىزدى.
كونتسەرت بارىسىندا ساربازداردىڭ باسىنان وتكەن قيىنشىلىقتار تۋرالى «قوش بولىڭدار, جىگىتتەر!» ليريكالىق كومپوزيتسياسى, سوعىستىڭ كەسىرىنەن ءبىر-بىرىنەن ايىرىلعان عاشىقتاردىڭ سەزىمى تۋرالى «كەستەلى ورامال» ءانى, «دەن پوبەدى», «ۆ وسەننەم پاركە», «نام نۋجنا ودنا پوبەدا», «سوعىستان قايتقان سولداتتار», «انا تۋرالى باللادا», «اناعا حات», «نا بەزىمياننوي ۆىسوتە», «مەسياتس ماي», «سلۋجۋ, نە تۋجۋ», «تۋعان ەل», «سمۋگليانكا», «ءاليا» سىندى كوپشىلىككە تانىس جانە وزگە دە اندەر ايتىلدى.
اندەردى جۇلدىز ءۋاليحان, ءرۇستەم نۇرجىگىت, ءمادينا سادۋاقاسوۆا, الەن سامىكەن, رينات مالتساگوۆ, يگور بلاگودارنىي, اينۇر ابديەۆا, ولەسيا نوۆاك, ديانا ماي, مۇراتبەك حايرولدا, مارينا بەيسەحان, مەيىر باينەش, داۋرەن تولەۋباەۆ, Dinaya, البينا وگانەسيان سىندى تالانتتى ارتيستەر جانە «رويال» توبى ورىندادى.
كونتسەرت «ارتيست» بالەتىنىڭ بيشىلەرى جانە ەلوردالىق «جاستار» تەاترىنىڭ اكتەرلەرىنىڭ حورەوگرافيالىق جانە تەاترلاندىرىلعان قويىلىمدارىمەن كوركەمدەلدى.
