نۇر-سۇلتان قالاسىنىڭ مەملەكەتتىك اكادەميالىق فيلارمونياسى سيمفونيالىق وركەسترىنىڭ حح كونتسەرتتىك ماۋسىمى كومپوزيتور, پەداگوگ ءالىبي مامبەتوۆتىڭ شىعارماشىلىعىنا ارنالعان كەشپەن اشىلدى.
تەكتىنىڭ تۇياعى, اتاقتى رەجيسسەر ءازىربايجان مامبەتوۆ پەن ايگىلى كومپوزيتور عازيزا جۇبانوۆانىڭ ۇلى ءالىبي مامبەتوۆ اتا-اناسىنىڭ ونەردەگى جولىن جالعاستىردى. قۇرمانعازى اتىنداعى ۇلتتىق كونسەرۆاتوريانى قوس بىردەي «كومپوزيتسيا» جانە «دومبىرا» ماماندىعى بويىنشا ءتامامدادى. ءالىبي مامبەتوۆ اتالمىش ونەر ورداسىندا وقي ءجۇرىپ, ءداستۇرلى قازاق مۋزىكا ونەرىن زاماناۋي كومپوزيتورلىق تەحنيكامەن ۇيلەستىرىپ, ءوز باعىت-باعدارىن انىقتاي باستادى. جاس تالانتتىڭ شىعارمالارى سول كەزدە-
اق الماتى, ەرەۆان, ماسكەۋ سىندى شاھارلاردا ورىندالا باستادى. ال ستۋدەنتتىك جىلدارى ءوزى مۇشەسى بولعان «نوعايلى» كۆارتەتىنىڭ مۋزىكاسى قازاق راديوسىنىڭ «التىن قورىنا» ەندى.
ءالىبي مامبەتوۆ سيمفونيالىق, كامەرالىق-اسپاپتىق, ۆوكالدىق مۋزىكانىڭ دامۋىنا ۇلەس قوستى. بىرقاتار كوركەم جانە انيماتسيالىق فيلمدەرگە, تەلەباعدارلامالارعا مۋزىكا جازدى. باستاپقىدا اناسىمەن بىرگە اكەسىنىڭ سپەكتاكلدەرىن اۋەنمەن ارلەپ, جالپى العاندا, 30-دان اسا درامالىق قويىلىمدارعا ارناپ شىعارمالارىن تۋدىردى. اتاپ ايتقاندا, «دوس بەدەل دوس», «عاسىردان دا ۇزاق كۇن», «قوزى كورپەش-
بايان سۇلۋ», «ءبىز بەسەۋ ەدىك», «ۆانيا اعاي», «شاعالا», ت.ب. سپەكتاكلدەر مۋزىكاسىنىڭ اۆتورى اتاندى.
ءومىرىنىڭ سوڭعى جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسىندا قىزمەت ىستەدى. كومپوزيتوردىڭ دۇنيەدەن وزعانىنا ءبىر جىلعا جۋىقتادى. ەلورداداعى كونتسەرتتە ارىپتەستەرى, شاكىرتتەرى اسىل بەينەسىن ەسكە الىپ, شىعارمالارىن ورىندادى.
