قازاقستان سپورتىنىڭ جارقىن جۇلدىزى اۋەسقوي بوكستان الەمنىڭ چەمپيونى, وليمپيادا ويىندارىنىڭ كۇمىس جۇلدەگەرى, كاسىپقوي بوكستان الەمنىڭ ەكس-چەمپيونى گەننادي گولوۆكين كەزەكتى جەكپە-جەگىن وتكىزدى. نيۋ-يورك قالاسىنداعى Madison Square Garden ارەناسىندا ىۆع جانە ءىۆو تۇجىرىمدارىنىڭ ورتا سالماقتاعى (76,6 كەلى) بوس تۇرعان الەم چەمپيونى اتاعى ساراپقا سالىندى. شارشى الاڭدا گەننادي گولوۆكين (40-1-1, 35 كو) مەن ۋكرايندىق بوكسشى سەرگەي دەرەۆيانچەنكو (13-2-0, 10 كو) قولعاپ ءتۇيىستىردى.
بۇل جەكپە-جەككە تورەشىلىك جاساعان قازىلار القاسى جەڭىستى ءبىراۋىزدان 37 جاسار گولوۆكينگە بەردى. شىنىن ايتۋ كەرەك, ەكى بوكسشى دا 12 راۋند بويى بارىن سالىپ ايقاستى. ەشقايسىسى جەڭىستى قولدان بەرگىسى كەلمەدى. دەگەنمەن, ۋكراين بوكسشىسىنىڭ قاباعىن جارىپ العانى, ونىڭ تولىققاندى جۇمىس ىستەۋىنە اسەر ەتكەنى بايقالدى. ال قارسىلاسىنىڭ بۇل جاعدايىن ءبىزدىڭ GGG ۇتىمدى پايدالانا ءبىلدى. جەڭىسكە جەتكەن ساتىندە گولوۆكين وتە اۋىر جەكپە-جەك بولعانىن, قارسىلاسىنىڭ وتە مىقتى بوكسشى ەكەنىن ايتا كەلە, «الۆارەس «كانەلوعا» سالەم ايتىڭدار, مەن ونىمەن جەكپە-جەك وتكىزۋگە دايىنمىن!» دەپ ايتىپ سالدى. ال بۇل ءسوزدى ەستىگەن كانەلو بولسا «ماعان ەندى GGG دەگەن قىزىق ەمەس, ول مەنى جەڭەتىن بولسا, مەن وعان ءوزىن دالەلدەۋ ءۇشىن 24 راۋند بەردىم, الايدا ول ەشتەڭە كورسەتە المادى عوي. ال ەگەر ءۇشىنشى جەكپە-جەك بولىپ جاتسا, مەن ونى نوكاۋتقا جىبەرەمىن» دەپ جار سالدى.
ءبىر ايتارلىعى, وتە كوپ سوققىلار بولعان نيۋ-يوركتەگى ايقاستان كەيىن ەكى بوكسشى دا كلينيكاعا ءتۇستى. دارىگەرلەردىڭ كومەك-كەڭەسىن الۋعا ءماجبۇر بولدى. ال بوكس الەمىنىڭ جۇلدىزدارى بولسا, گولوۆكين مەن دەرەۆيانچەنكو ايقاسى 2019 جىلدىڭ تاڭداۋلى جەكپە-جەكتەرىنىڭ ءبىرى دەگەن پىكىرلەرىن ءبىلدىرىپ جاتتى.
سونىمەن, وتكەن جىلى مەكسيكالىق الۆارەسپەن ايقاسىندا 4 تۇجىرىم بويىنشا اتاعىنان ايىرىلعان بولاتىن. سوندىقتان گەننادي گولوۆكين ءۇشىن ەندىگى بەلەس سول «كانەلو» بولىپ تۇر. ال ماماندار بولسا بۇل شايقاس 2020 جىلى بولىپ قالۋىن بولجاپ وتىر.
