استانا كۇنى مەرەكەسىنە وراي بيىل العاش رەت ەلوردادا ۇزدىك كاسىپكەر, ۇزدىك مەتسەنات پەن ۇزدىك ينۆەستور انىقتالىپ, ولاردى استانا قالاسىنىڭ اكىمى يمانعالي تاسماعامبەتوۆ ارنايى ماراپاتتادى.
– كاسىپكەرلىك – ەل ەكونوميكاسىنىڭ بويىنا قان جۇگىرتەتىن ەڭ قاجەتتى سالانىڭ ءبىرى. ونىڭ حالىقتىڭ ءومىر ءسۇرۋ ساپاسىن جاقسارتۋدا ماڭىزى ۇلكەن ەكەندىگىن قوعام دا تولىقتاي ءتۇسىندى. قازىرگى تاڭدا ەلوردانىڭ ەكونوميكالىق ءوسىمى جامان ەمەس. ايتالىق, جالپى ايماقتىق ءونىم كولەمى بىلتىرعى جىلمەن سالىستىرعاندا, سوڭعى بەس ايدىڭ ىشىندە 3,4 پايىزعا ءوستى. نەگىزگى كاپيتالعا قۇيىلعان ينۆەستيتسيا 4 پايىزعا ۇلعايدى. ەلوردادا بەلسەندى جۇمىس ىستەپ جاتقان ورتا جانە شاعىن بيزنەس سۋبەكتىلەرىنىڭ سانى 56 مىڭنان استى. ال, سوڭعى بەس ايدىڭ ىشىندە بيۋدجەتكە تۇسكەن تۇسىمدەر بىلتىرعىمەن سالىستىرعاندا 24 پايىزعا ارتتى. بۇل – جاقسى كورسەتكىش. قالا ەكونوميكاسىنىڭ قارقىندى دامۋىنا سىزدەردىڭ دە ۇلەستەرىڭىز كوپ, قۇرمەتتى كاسىپكەرلەر! – دەدى قۇتتىقتاۋ سوزىندە يمانعالي نۇرعاليۇلى.
الدىندا وتكەن كاسىپكەرلەر جيىنىندا استانانىڭ الەۋمەتتىك-ەكونوميكالىق دامۋىنا قوماقتى ۇلەس قوسقان كاسىپكەر ازاماتتار ماراپاتتالاتىنى ايتىلعان بولعان. وسى ۋادەگە ساي, استانا قالاسىنىڭ اكىمدىگى قالالىق كاسىپكەرلەر پالاتاسىمەن بىرلەسىپ, وزگەگە ونەگە رەتىندە ۇزدىك كاسىپكەرلەردى ماراپاتتاپ وتىرعانىن ايتقان قالا باسشىسى ولاردىڭ شاھار ءۇشىن جاساعان جاقسىلىعىنا جان-جاقتى توقتالىپ ءوتتى.
سونىمەن, بيىلعى «ۇزدىك كاسىپكەر» اتاعىنا «ALIT» جشس باس ديرەكتورى نۇرلان الجانقۇلوۆ يە بولدى. «بۇل كومپانيانىڭ نەگىزى 1992 جىلى قالانعان. اليت – قۇرىلىس ماتەريالدارىن وندىرەتىن ءبىرىنشى وتاندىق كومپانيا. ولاردىڭ شىعاراتىن قۇرىلىس ماتەريالدارىنىڭ 95 پايىزى – وتاندىق ءونىم. استاناداعى بارلىق قۇرىلىس ۇيىمدارىمەن جۇمىس ىستەيتىن كومپانيا ونىمدەرىن الەمدىك ستاندارتقا ساي ساپالى جاساۋعا, سان تۇرلەندىرۋگە بارىن سالىپ كەلەدى» دەدى قالا اكىمى.
ال, «ۇزدىك مەتسەنات» بولىپ, «Bi group» حولدينگىنىڭ پرەزيدەنتى ايدىن راحىمباەۆ تانىلدى. قۇرىلىس سالاسىندا كوشباسشى كومپانيا رەتىندە جاقسى تانىس ءىرى ينۆەستيتسيالىق حولدينگ ۇجىمى بيزنەستىڭ الەۋمەتتىك جاۋاپكەرشىلىگىن جاقسى سەزىنەتىنىن ەلوردا اكىمى ەرەكشە اتاپ ءوتتى. ولار 2004 جىلى «جۇلدىزاي» كورپوراتيۆتىك قايىرىمدىلىق قورىن قۇرىپ, مۇمكىندىگى شەكتەۋلى بالالارعا بارىنشا قولعابىس ەتىپ كەلەدى. وسى «جۇلدىزايدان» قاناتتانىپ ۇشقان تالاي ورەن دەنساۋلىعىنا قاراماستان حالىقارالىق بايقاۋلاردا توپ جارىپ ءجۇر. استاناداعى بالالار ۇيلەرىنە, مۇگەدەك بالالار ورتالىقتارىنا دەمەۋشى بولۋدان تانباي كەلە جاتقان كومپانيا جىل سايىن 250 جەتكىنشەكتى رەسپۋبليكالىق ساۋىقتىرۋ ورتالىقتارىنا جىبەرۋدى جاۋاپكەرشىلىگىنە العان. مىنە, وسىنداي جومارتتىعىمەن اتالمىش كومپانيا باسشىسى «ۇزدىك مەتسەنات» اتانىپ وتىر.
«ۇزدىك ينۆەستور» اتالىمىندا «جاننۇر-استانا» جشس كومپانيا توبىنىڭ پرەزيدەنتى بولات سادىق جەڭىمپاز بولدى. بۇل ءوزى سان-سالالى 25 كومپانيانى بىرىكتىرگەن سەرىكتەستىك. ونىڭ ىشىندە ساۋدا ۇيلەرى دە, سۋپەرماركەتتەرى دە, كولىكتىك-لوگيستيكالىق قىزمەتى دە, كۇزەت-زاڭگەرلىك قىزمەتى دە بار. ءتىپتى, كۋلينارلىق-كونديتەرلىك ونىمدەر شىعارۋمەن دە اينالىسىپ, كوممەرتسيالىق تۇرعىن ۇيلەردى دە سالىپ جاتىر. «جاننۇر-استانا» بۇگىندە «حان اۋىلى» اتتى مەيرامحاناسى بار, كولەمى 45 مىڭ شارشى مەترلىك الىپ كەشەندى سالۋعا ينۆەستيتسيا قۇيدى. سونداي-اق, «مىڭجىلدىق اللەياسى» مەن سەيفۋللين كوشەسى بويىنداعى كوپ قاباتتى تۇرعىن ءۇي كەشەندەرى وسى كومپانيانىڭ قارجىسىمەن سالىنۋدا.
ولار استاناداعى عانا ەمەس, كۇللى قازاقستانداعى كوپتەگەن جوبالارعا ينۆەستيتسيا قۇيىپ كەلەدى. وسىنداي ينۆەستيتسيالىق ەرەكشەلىگىمەن «جاننۇر-استانا» ۇزدىكتەردىڭ قاتارىنان كورىنىپ وتىر.
جالپى بايقاۋ ەكى كەزەڭ بويىنشا ءوتىپتى. العاشقى وتىنىمدەردى قابىلداۋ كەزەڭى 5 ماۋسىم مەن 25 ماۋ-سىم ارالىعىندا جۇرگىزىلگەن. كەيىن 5 شىلدەگە دەيىن ىرىكتەۋ كەزەڭى وتكىزىلىپ, جەڭىمپازدار انىقتالعان.
قىمبات توقتامۇرات
