«استانا» كونتسەرت زالىندا كورنەكتى كومپوزيتور, قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى مىڭجاسار ماڭعىتاەۆتىڭ شىعارماشىلىعىنا ارنالعان «قازاقستانىم مەنىڭ» كەشى ءوتتى. نۇر-سۇلتان قالاسى مەملەكەتتىك اكادەميالىق فيلارمونياسى قازاق وركەسترىنىڭ XXII كونتسەرتتىك ماۋسىمىنىڭ جابىلۋى اياسىندا وتكەن كونتسەرتتە كومپوزيتوردىڭ تۋىندىلارى شىرقالدى.
مىڭجاسار ماڭعىتاەۆ «وتىرار» وپەراسىن, «قوزى مەن بايان» بالەتىن, سيمفونيالىق جانە حورعا ارنالعان پوەمالاردى, وراتوريالاردى, بىرنەشە كۇيدى, كوركەم جانە دەرەكتى فيلمدەرگە, سپەكتاكلدەرگە ارنالعان مۋزىكا جازدى. ال ونىڭ ءان-رومانستارى ءۇش جۇزدەن اسىپ جىعىلادى.
وسى كەشتە كومپوزيتوردىڭ كۇردەلى تۋىندىلارى ورىندالماسا دا, اندەرى مەن كۇيلەرى شارىقتادى. ول نۇرسۇلتان الىمقۇلوۆ پەن نۇتفوللا شاكەنوۆ, ساعي جيەنباەۆ, تۇمانباي مولداعاليەۆ, مۇزافار الىمباەۆ, قابدىكارىم ىدىرىسوۆ, يسرايل ساپارباي سىندى اقىندارمەن شىعارماشىلىق بايلانىستا بولدى.
ال العاشقى اندەرىنىڭ ءبىرى – «ساعىنىش». ايتجان بايعوجاەۆ ءسوزىن جازعان بۇل ءاننىڭ العاشقى ورىنداۋشىسى, كومپوزيتورمەن جەتى جىل كونسەرۆاتوريادا بىرگە وقىعان كۇمىس كومەي, جەز تاڭداي ءانشى, قازاقستاننىڭ حالىق ءارتىسى نۇرعالي ءنۇسىپجانوۆ. نۇرعالي اعا بۇل كەشكە ارنايى قاتىسىپ, وسى تۋىندىمەن قاتار كومپوزيتور وزىنە اماناتتاپ كەتكەن «مايتوبە – تاۋدىڭ تورەسى» ء(سوزىن جازعان نازىكەن الپامىسقىزى) ءانىن تامىلجىتا شىرقادى.
سونىمەن بىرگە كونتسەرتتە قازاقستاننىڭ ەڭبەك سىڭىرگەن ءارتىسى باعدات سامەدينوۆا, قازاقستاننىڭ ەڭبەك سىڭىرگەن قايراتكەرلەرى گۇلزيرا بوكەيحان, بيبىگۇل جانۇزاق, قايىرجان بەردىباي, مادەنيەت سالاسىنىڭ ۇزدىكتەرى ارايلىم راحىم, كۇنسۇلۋ تۇرلىبەكوۆا, نۇراي تاناباەۆ, مادەنيەت قايراتكەرى ەستاي مۇقاشەۆ, رەسپۋبليكالىق جانە حالىقارالىق بايقاۋلاردىڭ لاۋرەاتتارى ايزادا كاپونوۆا, التىنبەك ءابىلدا, شاحريزادا تىنىشتىق ونەر كورسەتتى.
كەش سوڭىندا مىڭجاسار ماڭعىتاەۆتىڭ جارى سۆەتلانا رامازانقىزى كونتسەرتتى ۇيىمداستىرۋشىلارعا, بارلىق ونەرپازدارعا, كورەرمەندەرگە العىسىن ايتتى.
