نۇر-سۇلتان قالاسى پوليتسيا دەپارتامەنتىنىڭ باسشىلىعى پيك جانە جەكە كۇزەت ۆەدومستۆولارىنىڭ وكىلدەرىمەن كەزدەسۋ وتكىزدى.
جاستار سارايىندا وتكەن كونسترۋكتيۆتى ديالوگتى ەلوردالىق پوليتسيا دەپارتامەنتىنىڭ باستىعى ەرجان سادەنوۆ اشىپ, جەرگىلىكتى پوليتسيا مەن پيك (پاتەر يەلەرى كووپەراتيۆى) اراسىنداعى ءوزارا ءىس-قيمىل جاساۋدىڭ ەرەكشەلىكتەرى مەن مۇمكىندىكتەرى, قالاداعى قوعامدىق قاۋىپسىزدىكتىڭ ساقتالۋى مەن قۇقىقتىق ءتارتىپتى قامتاماسىز ەتۋدەگى جۇمىستىڭ قالاي جۇرگىزىلۋى ءتيىس ەكەنى جونىندە مالىمەت بەردى. قالالىق ورتانىڭ ساپاسى مەن باقىلاۋ باسقارماسىنىڭ باسشىسى تولەگەن قۇلىشەۆ پيك شارۋاشىلىعى تۋرالى اقپارات بەرىپ, ەلورداداعى 480-گە جۋىق پيك ۇيىمىنىڭ ءبارى بىردەي زاڭنامالىق تۇرعىدا بەكىتىلگەن ەرەجە تالاپتارىنا ساي جۇمىس جۇرگىزە الماي وتىرعانىن ايتىپ, كوپتەگەن كوپپاتەرلى تۇرعىن ۇيلەردە اۋلاداعى جانە كىرەبەرىستەردەگى قاراپايىم تازالىق جۇمىستارىنىڭ ءوزى جۇيەلى جۇرگىزىلمەيتىنىن, اباتتاندىرۋ قاعيدالارىن ساقتاماۋ ءالى دە جالعاسىپ جاتقانىن حاباردار ەتتى. ماسەلەن, جىل باسىنان بەرى 123 پيك بەكىتىلگەن ەرەجەلەر تالاپتارىن ورىنداماعانى ءۇشىن 3 ميلليون 509 مىڭ تەڭگە سوماسىندا جاۋاپكەرشىلىككە تارتىلعان. ال 27 پيك-كە ەكىنشى رەت اكىمشىلىك جازا قولدانىلعان.
جەرگىلىكتى پوليتسيا باستىعى عوسمان جاكين جالپى قالاداعى كريمينوگەندىك جاعداي تۇراقتى بولعانمەن, ۇساق قوعامدىق ءتارتىپ بۇزۋشىلىق تىيىلماي وتىرعانىن ءمالىم ەتتى. ماسەلەن, جىل باسىنان بەرى 248 پاتەر توناۋ وقيعاسى تىركەلگەن. ونىڭ كوپشىلىگى بەينەكامەرا مەن كونسەرجى جوق ۇيلەردە بولعان ەكەن. ال كەرىسىنشە ارنايى قوندىرعىلارمەن جابدىقتالعان جانە كونسەرجى بار ۇيلەردە ۇرلىق مۇلدەم بولماعان. وسى ورايدا ع.جاكين پيك جەتەكشىلەرىنە وسى ماسەلەگە, ياعني باقىلاۋ جانە قاۋىپسىزدىك قوندىرعىلارىن ورناتۋعا كوڭىل ءبولۋدى سۇرادى. ال جيىنعا قاتىسقان جەكە كۇزەت ۆەدومستۆو وكىلدەرى بولسا, بارلىق ۇسىنىستى قابىلداۋعا دايىن ەكەندەرىن جەتكىزدى.
كەزدەسۋ بارىسىندا پيك وكىلدەرى جەرگىلىكتى پوليتسيا باسشىلىعى مەن نۇر-سۇلتان قالاسىنىڭ قالالىق ورتا ساپاسى جانە باقىلاۋ باسقارماسى ماماندارىنا وزدەرىن تولعاندىرعان سۇراقتارىن قويىپ, جاۋاپ الدى.
ەڭ باستىسى, كەزدەسۋ بارىسىندا قالاداعى پيك شارۋاشىلىعىنداعى وزەكتى ماسەلەلەر, سونىمەن قاتار قوعامدىق قاۋىپسىزدىك پەن قۇقىقتىق ءتارتىپتى نىعايتۋ جونىندە اشىق اڭگىمە ءوربىدى. ايتىلعان پروبلەمالاردى شەشۋدىڭ جولدارى ايقىندالدى. ۇسىنىستار مەن تىلەكتەر تىڭدالدى.
