كەشە «استانا» كونتسەرت زالىندا ەلوردا اكىمىنىڭ ورىنباسارى قوسمان ايتمۇحامەتوۆ ەلوردا تۇرعىندارىمەن ەسەپتى كەزدەسۋىن وتكىزدى. جيىنعا قالالىق ارداگەرلەر كەڭەسى مەن قوعامدىق كەڭەستىڭ توراعاسى سانسىزباي ەسىلوۆ قاتىستى.
ەلۋ كوشە جوندەلدى
جيىندا اكىم ورىنباسارى قالاداعى كوممۋنالدىق شارۋاشىلىق, ەنەرگەتيكا, قورشاعان ورتانى قورعاۋ, توتەنشە جاعدايلاردىڭ الدىن الۋ, كولىك ينفراقۇرىلىمى جانە كوگالداندىرۋ سالالارى بويىنشا اتقارىلعان جۇمىستارعا توقتالدى. ول ءوز سوزىندە بۇگىندە باس شاھارعا جىلۋ بەرەتىن ەنەرگەتيكالىق ورتالىقتاردىڭ قالىپتى رەجيمدە جۇمىس ىستەپ تۇرعاندىعىن جەتكىزدى. وسى سالاداعى سۇراقتاردىڭ ءبارى قالالىق شتابتا تالقىلاناتىنىن ايتتى. ەلورداعا قاراستى سۋ قويمالارى دا, ەلەكتر ستانسالارىنىڭ قىزمەتى دە قالىپتى ەكەندىگى ايتىلدى. وتكەن جىلى بىرقاتار كوشەلەردە جىلۋ جەلىلەرى جاڭارتىلعان.
«بىلتىر 50 كوشەدە جالپى ۇزىندىعى 44 شاقىرىمعا سوزىلعان ورتاشا جوندەۋ جۇرگىزىلدى. 35 كوشەگە 34 كم قۇراعان ورتاشا اعىمدىق جۇمىستارى اتقارىلدى. «جۇمىسپەن قامتۋ جول كارتاسى – 2020» باعدارلاماسى اياسىندا 15 كوشەگە جوندەۋ جاسالدى. يلينكا تۇرعىن الابىندا 50 كوشە سالىندى. ونىڭ 32-سىنە اسفالت توسەلدى» دەدى قوسمان قايىرتايۇلى.
ەلوردادا دۇبىرلەپ وتكەن ەكسپو-2017 حالىقارالىق مامانداندىرىلعان كورمەسىن وتكىزۋ كەزىندە جۇمىس ىستەۋى ءتيىس نىساندار مەن «مىڭجىلدىق» ساياباعىنىڭ, جاڭا تەمىرجول ۆوكزالى ماڭى, وڭتۇستىك-شىعىس اۋدانى, ورىنبور, تۇران داڭعىلدارى سياقتى قالانىڭ دامىپ جاتقان بولىكتەرىن جىلۋمەن قامتاماسىز ەتۋ ماقساتىندا ەلوردا اكىمدىگى 4-ءشى جانە 5-ءشى كىرىستەردىڭ جىلۋ ماگيسترالدارىن سالۋ جوباسىن جۇزەگە اسىرعان.
ەكى كوپىر پايدالانۋعا بەرىلەدى
ودان كەيىن قالا اكىمىنىڭ ورىنباسارى الدا جۇزەگە اساتىن جۇمىستارعا شولۋ جاسادى. بيىل 9 شاقىرىمعا سوزىلعان جىلۋ جەلىلەرى جاڭعىرتىلادى. سونداي-اق, 48 كم قۇرايتىن سۋ قۇبىرلارىنا جوندەۋ جۇرگىزىلەدى.
«2018 جىلى باس شاھارداعى كولىك جۇرەتىن ەكى ۇلكەن كوپىر پايدالانۋعا بەرىلەدى. كىشى اينالما جولىنىڭ قۇرىلىسى شەڭبەرىندە سارايشىق كوشەسىنىڭ جالعاسى – تۇران مەن بەيسەكوۆانىڭ اراسى قوسىلادى. بۇل ۋچاسكەنىڭ جۇمىسى قالا كۇنىنە دەيىن اياقتالادى. سونىمەن بىرگە بەيسەكوۆا كوشەسىنىڭ 3 شاقىرىم جولىن جوندەۋ جۇمىستارى جالعاسادى. ابىلايxان داڭعىلى مەن قوشقارباەۆ كوشەسى قيىلىسىنداعى جول ايىرىعىنىڭ قۇرىلىسى بىتەدى» دەدى ق.ايتمۇxامەتوۆ.
ونىڭ ايتۋىنشا, بيىل قالاداعى 32 كوشەگە جول جوندەۋ جۇمىستارى جۇرگىزىلەدى. ونىڭ جارتىسى – كوكتال-2, ينتەرناتسيونالنىي مەن ميچۋرينو ەلدى مەكەندەرىنە قاتىستى. جانە 60 كوشەدە جالپى ۇزىندىعى 35 شاقىرىم جولداردا ورتاشا جوندەۋ جاسالادى. قوسمان قايىرتايۇلى كەزدەسۋدە قالانىڭ كوگالداندىرۋ ماسەلەسىنە دە توقتالدى. بۇگىندە استانادا 10 ساياباق, 4 بۋلۆار جانە 95 گۇلزار بار. وسى جىلى شاھاردا 14 گۇلزار پايدالانۋعا بەرىلەدى. ولاردىڭ كوبى ەسكى سۇرىلگەن ۇيلەردىڭ ورنىندا بولادى. ەلوردالىقتارعا تاعى ءبىر جاعىمدى جاڭالىقتى جەتكىزەيىك. بيىل اۋماعى 92 گەكتاردى الىپ جاتقان «بوتانيكالىق باقتىڭ» قۇرىلىسى اياقتالادى. ونىڭ قۇرامىندا ەكى جىلىجاي بولادى. وعان الەمنىڭ كوپتەگەن ەلدەرىنەن كوپشىلىككە اتى عانا تانىس زاتى بەيمالىم اعاشتار اكەلىپ ەگىلەدى.
ليفت جىرى تاۋسىلمايدى
قوسمان ايتمۇحامەتوۆتىڭ بايانداماسىنان كەيىن تۇرعىنداردىڭ سۇراق قويۋ كەزەگى باستالدى. ءسوزدى الدىمەن «گراند استانا» تۇرعىن ءۇي كەشەنىنىڭ تۇرعىنى الدى. ول اكىم ورىنباسارىنا اتالعان ۇيدەگى ءليفتىنىڭ قالاي قۇلاعانىن ايتىپ بەردى.
«كەشە ۇيىمىزدە ليفت قۇلادى. ونىڭ ىشىندە مەنىڭ جولداسىم جانە تاعى 4 ادام بولدى. ليفت جەتىنشى قاباتتان قۇلادى. بىراق ونى باسقاشا جەتكىزىپ جاتىر. ءليفتىنىڭ تەجەگىشى ىستەپ كەتتى دەيدى. نەگىزىندە, ولاي ەمەس. مەنىڭ كۇيەۋىم سەگىزىنشى قاباتتان ليفتىگە كىرەدى. جەتىنشى قاباتتان تاعى ەكى جاس جىگىت مىنەدى. سول كەزدە ءليفتىنىڭ ءبىر نارسەسى ۇزىلگەندەي تومەن قاراي قۇلديلايدى. ونىڭ قاتتى قۇلاعانى سونشا, ىشىندەگى ادامداردىڭ ءبارى باستارىن توبەگە سوعادى. قۇداي ساقتاعاندا, ليفت ءبىرىنشى جانە ەكىنشى قاباتتىڭ اراسىندا توقتاعان. كۇيەۋىم ماعان قوڭىراۋ شالىپ, پيك ديرەكتورىنىڭ تەلەفون ءنومىرىن سۇرادى. وعان زۆونداساق, المايدى. ادامدار ليفتتە 50 مينۋت وتىردى. ولاردى جوعارى كوتەرىپ, ۇستىڭگى قاباتتان شىعاردى. وسىنى قالاي تۇسىنۋگە بولادى؟» دەدى ەكاتەرينا ماناتاەۆا. اكىم ورىنباسارى اتالعان ماسەلەنى باقىلاۋدا ۇستاپ وتىرعانىن ايتىپ: «ءبىز كەشىرىم سۇرايمىز. راسىندا دا, كەشە ونداي جاعداي بولدى. بىراق ەشكىم جاۋاپكەرشىلىكتەن قاشىپ وتىرعان جوق. قازىر ارنايى كوميسسيا قۇرىلدى. ءبىر-ەكى كۇندە «گراند استانانىڭ» ليفتتەرىن تەكسەرەمىز. الاڭداماڭىز. ءتيىستى شارالاردى قولعا الامىز» دەدى ول.
اسفالت ەمەس, تاس جول توسەلەدى
«187-ءشى كوشەدە تۇرامىز. ءبىزدىڭ ءۇيىمىز 2010 جىلى مەملەكەتتىك باعدارلامامەن بەرىلگەن. بىراق سودان بەرى ءۇيدى قالا ءالى بالانسىنا العان جوق. ينجەنەرلىك جەلىلەر دە دۇرىس ەمەس. اۋلادا بالالار وينايتىن الاڭ دا جوق. كىشكەنتايلارىمىزدى قايدا جىبەرەرىمىزدى بىلمەيمىز. قاشان ءبىزدىڭ ءۇي قالانىڭ بالانسىنا كىرەدى» دەگەن تۇرعىننىڭ سۇراعىنا قوسمان قايىرتايۇلى: «ءبىز ول ۇيگە ينجەنەرلىك جەلىلەردى جۇرگىزدىك. بۇل جۇمىس دەمەۋشىلەردىڭ قولداۋىمەن ىسكە اسىرىلدى. ەندى بالالاردىڭ ويىن الاڭدارى بوي كوتەرەدى. ءسىز ايتقان ماسەلەنى بىلەمىز. ۇزاماي, وڭ شەشىمىن تابادى» دەپ جاۋاپ بەردى.
«لەسوزاۆود تۇرعىن الابىنداعى «ءوندىرىس» كوشەسىندەگى 8 ءۇيدىڭ تۇرعىنداردىڭ اتىنان كەلىپ وتىرمىن» دەپ ءسوزىن باستادى ءومىرتاي اقپاەۆ دەگەن اقساقال. «ءبىزدىڭ سەگىز ءۇي كوشەنىڭ باس جاعىندا ورنالاسقان. بىلايشا ايتقاندا, قالتارىستا تۇر. جولى وتە جامان. كوكتەمنەن قارا كۇزگە دەيىن باتپاق كەشىپ جۇرەمىز. سودان قاتتى قينالامىز. ۇشقوڭىر كوشەسىنە شىعاتىن جولدىڭ اراسى – 250 مەتر. وسىعان اسفالت توسەپ بەرسەڭىزدەر» دەدى قاريا. «جاقسى, بيىلعى جوسپارعا كىرگىزەمىز. بىراق ول جەرگە اسفالت ەمەس, تاس جول سالىپ بەرەمىز» دەدى ق.ايتمۇحامەتوۆ.
العىس تا ايتىلدى
كەلەسى كەزەكتە الماتى اۋدانىنداعى باعانالى كوشەسىنىڭ تۇرعىنى س.ەڭسەباەۆا دەگەن ازاماتشا سول كوشەدەگى 19 جەكە تۇرعىن ءۇيدىڭ يەلەرى وزدەرى ۇيىمداسىپ, كارىز جەلىلەرىن تارتقىزعانىن ايتىپ, بىراق سونىڭ قۇجاتتارىن ءبىر-ەكى جىلدان بەرى ءالى دايىنداي الماي جۇرگەنىن ايتتى. وعان قوسمان قايىرتايۇلى جيىنعا قاتىسىپ وتىرعان ساۋلەت جانە قالا قۇرىلىسى باسقارما باسشىسىنىڭ ورىنباسارىنا اتالعان ماسەلەنى قاداعالاۋدى تاپسىردى. كەزدەسۋ بارىسىندا پاتەر يەلەرى كووپەراتيۆتەرىنىڭ جۇمىسىنا قاتىستى دا سۇراقتار قويىلدى. قالىڭ جاۋعان قار دا نازاردان تىس قالمادى. اكىمنىڭ ورىنباسارىنا ريزاشىلىعىن بىلدىرگەن ازاماتتار دا بولدى.
ءبىر سوزبەن ايتقاندا, جيىندا كۇندەلىكتى تىرشىلىكتە ونشا بىلىنبەگەنمەن, بىراق اياعىمىزدى سان وراپ جاتاتىن تۇرمىستاعى ماڭىزى زور ماسەلەلەر كوبىرەك قاۋزالدى. استانا اكىمىنىڭ ورىنباسارى قوسمان ايتمۇحامەتوۆ جيىرمادان استام تۇرعىننىڭ سۇراقتارىنا جاۋاپ بەردى.
ازامات ەسەنجول
