ەلوردا اكىمى التاي كولگىنوۆ كەشە كوپبالالى انالارمەن كەزدەستى. قالا باسشىسى ءوزىنىڭ Instagram-داعى پاراقشاسىندا وسى كەزدەسۋدەن كەيىنگى پىكىرىن ءبىلدىردى.
«بۇگىن تۇرمىسى تومەن, مۇگەدەك بالاسى بار, كوپبالالى انالارمەن كەزدەستىم. سوڭعى ءۇش اپتادا كۇن سايىن 20-30 كوپبالالى انانى, وزگە ازاماتتاردى قابىلداپ ءجۇرمىن. كەزدەسۋدە الۋان ءتۇرلى ماسەلەلەر كوتەرىلەدى. ماسەلە وتە كوپ, نەگىزىنەن, باسپانا الۋ, سونداي-اق جۇمىسقا ورنالاسۋ, مەديتسينالىق قىزمەت كورسەتۋ, بالالاردى مەكتەپكە قاجەتتى قۇرال-جابدىقتارمەن قامتاماسىز ەتۋگە قاتىستى بولادى. وسى اتالعان سۇراقتارعا وراي مەملەكەت ءارتۇرلى ءىس-شارالار قابىلداۋدا. قازىر ءبىز قۇزىرلى مينيسترلىكپەن بىرلەسە وتىرىپ, ءاربىر انانىڭ الەۋمەتتىك كارتاسىن جاساپ جاتىرمىز. ماسەلەلەر رەت-رەتىمەن شەشىلەدى» دەپ جازدى اكىم.
«قۇرمەتتى انالار! ماسەلە كوشەگە شىعىپ, ايقايلاۋمەن نەمەسە داۋ-دامايمەن شەشىلمەيدى. اكىمدىك ازاماتتاردى قابىلداۋ كەستەسىن بەكىتتى. مەنىڭ ويىمشا, ءار ادامنىڭ ماسەلەسىن جەكە سويلەسۋ ارقىلى شەشەمىز» دەپ قوستى ا.كولگىنوۆ.
ول سونداي-اق كەزدەسۋگە كەلگەن ءاربىر كوپبالالى انانىڭ اتى-ءجونىن, تەلەفونىنىڭ ءنومىرىن جازىپ العانىن ايتتى. «ءبىز بۇل كەزدەسۋگە كەلگەن بارلىق ادامداردىڭ ءسوزىن تىڭدادىق. ولاردى دۇيسەنبىدەن باستاپ ءوزىم جەكە قابىلدايمىن. جۇرتتىڭ ءبارىن ءبىر كۇندە قابىلداپ, ءسوزىن تىڭداۋ مۇمكىن ەمەس. سوندىقتان كەستەدەگى تىزىمگە سايكەس سىزدەرمەن جۇزدەسەمىز» دەپ اياقتادى ءسوزىن ەلوردا اكىمى.
