ماسكەۋدە «استانا – ەۋرازيا جۇرەگى» اتتى گالا-كونتسەرت ءوتتى

كەشە ماسكەۋدەگى استانانىڭ مادەني كۇندەرى اياسىندا مەملەكەتتىك كرەمل سارايىندا «استانا – ەۋرازيا جۇرەگى» اتتى گالا-كونتسەرت ءوتتى. وتە جوعارى دەڭگەيدە ۇيىمداستىرىلعان دۋماندى كەشتى كورۋگە كەلگەن ماسكەۋلىكتەردىڭ قاراسى كوپ بولدى.

سالتاناتتى كەشتىڭ اشىلۋىندا استانا قالاسىنىڭ اكىمى اسەت يسەكەشەۆ بۇگىنگى شارانىڭ ءوتىپ وتىرعان ماڭىزىنا توقتالدى. ەلوردانىڭ مادەني كۇندەرىن وتكىزۋگە قولداۋ بىلدىرگەن ماسكەۋ قالاسىنىڭ باسشىلىعىنا العىسىن جەتكىزدى. « استانا مەن ماسكەۋدى تىعىز قارىم-قاتىناس پەن دوستىق جانە كوپتەگەن بىرلەسكەن جوبالار بايلانىستىرادى. ەكى قالا تەك دوس قانا ەمەس, ستراتەگيالىق ارىپتەس بولىپ سانالاتىن قازاقستان مەن رەسەيدىڭ استاناسى» دەدى ول.

اۋقىمدى مادەني كەشتە وتاندىق تالانتتى تۇلعالاردىڭ ونەرىنە ماسكەۋلىكتەر تاڭداي قاقتى. اسىرەسە, الىبەك دىنىشەۆ, ايمان مۇساقوجاەۆا, مايرا مۇحامەدقىزى جانە روزا رىمباەۆا سەكىلدى قازاق مۋزىكا ونەرىنىڭ جارىق جۇلدىزدارى ساحناعا شىققاندا تۇرعىندار عاجايىپ اسەرگە بولەندى. ولارعا جۇرتشىلىق ۇزاق ۋاقىت قول شاپالاقتاپ, قۇرمەت كورسەتتى.

سونداي-اق, دارىندى وپەرا ءانشىسى سۇندەت بايعوجين, «سلاۆيانسكي بازار-2015» كونكۋرسىنىڭ جەڭىمپازى ديماش قۇدايبەرگەن,  بۇركىت پەن ايشا, «فورمات», «رينگو» توپتارى دا تاماشا ءان شىرقادى.

استانا قالاسى مەملەكەتتىك اكادەميالىق فيلارمونياسىنىڭ قازاق حالىق اسپاپتارى وركەسترىنىڭ ورىنداعان شىعارمالارى كورەرمەندەردىڭ دەلەبەسىن قوزدىردى. دومبىرانىڭ داۋىسى كرەمل سارايىن كەرەمەت كۇيگە كەنەلتتى. «استانا» ەسترادالىق-سيمفونيالىق وركەسترى دە تاماشا تۋىندىلار ورىندادى. «تۇران» ەسترادالىق-فولكلورلىق ءانسامبلى مەن «سەرپەر» دومبىراشىلار ءانسامبلىنىڭ تالانتتى ونەرپازدارى بابالارىمىزدىڭ باعزى اۋەزىن قايتا جاڭعىرتتى. «ناز» مەملەكەتتىك بي تەاترى مەن «شالقىما» حالىق ءبيى ءانسامبلىنىڭ مۇشەلەرى ۇلتتىق ءبيدىڭ بيىگىن كورسەتتى. تۇرسىنبەك قاباتوۆ باستاعان ازىلكەشتەر  كورەرمەندەرگە اسەم كۇلكى سىيلادى. ايگىلى «ا-ستۋديو» توبى دا تۇرعىنداردى ءوز ونەرىمەن قۋانتتى. عاجايىپ كەشتى «مۋزارت» توبى نۇرعيسا تىلەنديەۆ اتامىزدىڭ «ءوز ەلىم» انىمەن قورىتىندىلادى.

كورەرمەندەردىڭ دە گالا-كونتسەرتتەن العان اسەرى كۇشتى بولدى.

– قازاقستاندىق ونەرپازداردىڭ كونتسەرتى ماعان قاتتى ۇنادى. كەرەمەت دەمالدىم. ءاننىڭ سوزدەرىن تۇسىنبەسەم دە, مۋزىكانى جانىممەن ۇعىندىم. قازاقتىڭ قانداي تالانتتى جاستارى ءوسىپ كەلە جاتىر. ءبارى دە شەتىنەن تالانتتى. سولاردى كورىپ, ءسۇيسىندىم,- دەيدى ماسكەۋ تۇرعىنى ناتاليا ۆاسيلەۆا.

قىرىق جىلدان بەرى ماسكەۋدە تۇراتىن ءبيبىماريام نابيەۆا اپامىزدىڭ دا ايتارى بار.

– وسىندا  ۇزاق جىلدان بەرى تۇرامىن. كونتسەرتتەن مارقايىپ شىعىپ تۇرمىن. جەرلەستەرىمنىڭ ونەرى كەرەمەت. سىرتتا ەلدى ساعىنىپ جۇرگەندە قازاقتىڭ ءانى مەن كۇيىن تىڭداپ,  ماۋقىمدى ءبىر باسىپ الدىم. دومبىرانىڭ داۋىسى دەگەن عاجاپ قوي…وعان ەشتەڭە جەتپەيدى.  تۋعان ەلىمدە بولعانداي اسەردەن ارىلا الماي تۇرمىن,- دەيدى تولقىپ ءبيبىماريام اپايىمىز.

         ازامات ەسەنجول