استانا قالاسى اكىمدىگى مەن «جاسنۇر» وندىرىستىك-شارۋاشىلىق كاسىپورنىنىڭ ماماندارى ەلوردا ىرگەسىندەگى قوياندى توعانى, قاراسۋ وزەنى جانە ۆياچەسلاۆكا سۋ قويمالارىنا بالىق شاباقتارىن جىبەردى.
«قوياندى سۋ قويماسىنا التايلىق تۇقى بالىعىنىڭ 100 مىڭ, اق امۋر بالىعىنىڭ 40 مىڭ داناسىن جىبەرىپ وتىرمىز. بۇلاردىڭ بارلىعى – بيىلعى جىلعى شاباقتار. سونىمەن قاتار, 20 مىڭ دانا ەكى جىلدىق التىن ءتۇستى موڭكە بالىعى تاعى بار. ۆياچەسلاۆكا سۋ قويماسىنا دا 80 مىڭ دانا سارباياندىق تۇقى بالىعى مەن 20 مىڭ دانا اق امۋر بالىعى قوسىلىپ وتىر. قاراسۋ وزەنىنىڭ ەسكى ارناسى مەن شالقار, ۇيالى-شالقار كولدەرىنە دە وسىنداي بالىق تۇرلەرىن جىبەردىك. بۇل شارانىڭ ماقساتى – سوڭعى ۋاقىتتاردا قالا تۇرعىندارىنىڭ ءجيى باراتىن دەمالىس ورنىنا اينالىپ ۇلگەرگەن قوياندى, ۆياچەسلاۆكا جانە باسقا دا سۋ ايدىندارىنا بالىق شارۋاشىلىعىن دامىتۋ جانە ولاردىڭ ونىمدىلىگىن ارتتىرۋ. سونىمەن قاتار, اتالمىش سۋ ايدىندارىنداعى بالىقتاردىڭ قانىن تازارتۋ ماقساتىن كوزدەپ وتىرمىز» دەيدى استانا قالاسى تابيعي رەسۋرستار جانە تابيعاتتى رەتتەۋ باسقارماسىنىڭ ءبولىم باسشىسى ءابدىماناپ جۇمادىلداەۆ.
مامانداردىڭ ايتۋىنشا, بالىقتىڭ بۇل تۇرلەرىن تاڭداپ الۋدىڭ وزىندىك سەبەپتەر دە بار ەكەن. «ماسەلەن, اق امۋردى
سۋ قويمالارىنا جىبەرۋدىڭ ارقاسىندا ەكى ماقساتقا بىردەن قول جەتكىزىلەدى. اتاپ ايتقاندا, اۋلايتىن بالىق كوپ بولادى جانە سۋ قويمالارى اباتتاندىرىلادى. سەبەبى, بالىقتىڭ بۇل ءتۇرىن «تازالىقشى بالىق» دەپ تە اتايدى. اق امۋر تەك وسىمدىكتەرمەن جانە سۋ تۇبىندەگى قالدىقتارمەن عانا قورەكتەنەدى. اينالاسى بىرنەشە جىلدىڭ ىشىندە سۋ قويمالارى قامىستاردان تازارىپ شىعا كەلەدى. ءارى بۇل بالىق وتە تەز وسەدى. قازىر قۇرتاقانداي بولعانىمەن, ەكى جىلدان كەيىن بۇل بالىقتىڭ سالماعى 20 كەلىگە جەتەدى» دەيدى اقمولا وبلىستىق ورمان شارۋاشىلىعى جانە بالىق دۇنيەسى ينسپەكتسياسىنىڭ باس مامانى ەركىنعازى ءجۇنىسوۆ.
بۇركىت نۇراسىل
