بالا الدىنداعى بەرەشەك
ەلوردالىق پروكۋرورلور ۋشىعىپ تۇرعان اليمەنت ماسەلەسىن شەشۋدىڭ تىڭ جولىن قولعا الدى. استانا قالاسىنىڭ پروكۋراتۋراسىندا «اليمەنت بەرەشەگىن ازايتۋ» جوباسى تانىستىرىلدى.
پروكۋرورلاردىڭ ايتۋىنشا, جوبانىڭ نەگىزگى ماقساتى – اليمەنتشى اكەلەردى جاپپاي جازاعا تارتۋ ەمەس, ولاردىڭ الدىن الۋدى كوزدەيدى. ياعني اليمەنت بەرەشەگىن تولەمەي جۇرگەن بورىشكەرلەردى جۇمىسپەن قامتاماسىز ەتەدى. ويتكەنى بۇگىنگى تاڭدا تۇراقتى جۇمىسىنىڭ جوقتىعىنا بايلانىستى اليمەنت تولەي الماي جۇرگەن اكەلەر كوپ. ماسەلەن, استانا قالاسى بويىنشا اليمەنت تولەۋگە مىندەتتەلگەن 19 مىڭ ادامنىڭ ەكى مىڭعا جۋىعى جۇمىسسىز.
وسىنىڭ سالدارىنان قالامىزدا 7 مىڭنان استام بالا وزدەرىنە تيەسىلى
400 ملن تەڭگە كولەمىندەگى اليمەنتىن الا الماي ءجۇر. «بورىشى بار اكەلەردى جۇمىسپەن قامتۋ جوباسىن قولعا الىپ وتىرمىز.
جۇمىسسىز رەتىندە ءتىركەۋدە تۇرعان ەكى مىڭ ازاماتتى ماماندىقتارى مەن يگەرگەن كاسىپ تۇرلەرى بويىنشا كاتەگوريالارعا ءبولىپ, كومپانيالارعا سۇراۋ جىبەردىك. قازىردىڭ وزىندە استانا قالاسىنداعى بەدەلدى ەكى قۇرىلىس كومپانياسىنان ەلەكتر مامانى, سانتەحنيك سياقتى ماماندار بويىنشا 500 ۇسىنىس كەلىپ ءتۇستى. سونىمەن قاتار, «Naimi.kz»
ينتەرنەت سايتىمەن ىنتىماقتاستىق ورناتىپ, اليمەنت بويىنشا قارىزى بار ادامداردى سايتقا تەگىن تىركەۋ تۋرالى كەلىستىك. بۇل سايتقا كۇنىنە ەكى جۇزگە جۋىق ادام تىركەلەدى ەكەن.
سونداي-اق, فەيسبۋك الەۋمەتتىك جەلىسىندە «ەڭبەك-
اليمەنت» پاراقشاسىن اشتىق. بۇل پاراقشاعا بورىشكەرلەر ءوز ءتۇيىندەمەلەرىن ورنالاستىرا الادى» دەيدى استانا قالالىق پروكۋراتۋراسىنىڭ سوتتاردا مەملەكەت مۇددەسىنە وكىلدىك ەتۋ باسقارماسىنىڭ باسشىسى بەرىك اداموۆ.
بۇركىت نۇراسىل