استانا پوليتسەيلەرى ستۋدەنتتەردىڭ 40 نوۋتبۋگىن الداپ الىپ كەتكەن تۇرعىندى ۇستادى, دەپ حابارلايدى astana-akshamy.kz
استانالىق ساقشىلار ستۋدەنتتەرگە قاتىستى بىرقاتار الاياقتىق ايلاسىن جاساعان ازاماتتى انىقتادى.
21 جاستاعى جىگىت استاناداعى جوعارى وقۋ ورىندارىنىڭ بىرىندە وقيتىن 40-تان استام ستۋدەنتتىڭ نوۋتبۋكتارىن الىپ كەتىپ, الداپ سوققان. بەلگىلى بولعانداي كۇدىكتى ۋاقىتشا پايدالانامىن دەگەن جەلەۋمەن دوستارىنان نوۋتبۋك الۋدى ادەتكە اينالدىرعان. ءسويتىپ جىگىت اپتاسىنا 20-30 مىڭ تەڭگە كولەمىندە جومارت سىياقىمەن جابدىقتى جالعا الۋدى جالعاستىرا بەرگەن.
پايدالى جالعا الۋشى تۋرالى قاۋەسەت ستۋدەنتتەر اراسىندا تەز تارالىپ, ولار ەش ويلانباستان الاياققا قىمبات قۇرال-جابدىقتارىن بەرىپ وتىرعان. جاس جىگىت بولسا بارلىق نوۋتبۋكتاردى لومباردتارعا ساتىپ, تۇسكەن اقشاسىن ينتەرنەتتەگى ويىنعا ءباس تىگۋگە قويىپ ۇتىلىپ قالعانى بەلگىلى بولعان.
قازىر الماتى اۋداندىق پوليتسەيلەر ەلورداداعى لومباردتاردان ۇرلانعان نوۋتبۋكتەردىڭ باسىم بولىگىن تاركىلەدى. الاياقتىق فاكتىسى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. جاس جىگىت كىناسىن مويىنداپ, قاماۋعا الىندى. پوليتسەيلەر ونىڭ ەلورداداعى وسىنداي الاياقتىق ىستەرىنە قاتىسى بار-جوعىن تەكسەرىپ جاتىر.
پوليتسيا دەپارتامەنتى ازاماتتارعا بۇل قىلمىس ءۇشىن قىلمىستىق كودەكس بابىنىڭ سانكتسياسىندا مۇلكى تاركىلەنىپ, ءۇش جىلدان جەتى جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكەرتەدى.
