استانا ءتۋريزمدى دامىتۋ بويىنشا زور الەۋەتكە يە, دەپ حابارلايدى astana-akshamy.kz
ەلوردا ماڭىزدى ءىس-شارالاردى وتكىزۋ جانە تۋريستەر ءۇشىن قولايلى جاعدايلار جاساۋ ارقىلى ورتالىق ازيانىڭ ىسكەرلىك حابى رەتىندە دامىپ كەلەدى. وسى باعىتتاعى جۇمىس تۋرالى كوممۋنيكاتسيالار قىزمەتىندە وتكەن بريفينگتە قالانىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ ايتىپ بەردى.
دامىعان ينفراقۇرىلىم مەن گەوگرافيالىق ورنالاسۋىن ەسكەرە وتىرىپ, استانا ءتۋريزمدى دامىتۋ ءۇشىن زور الەۋەتكە يە.
2023 جىلدىڭ قورىتىندىسى بويىنشا ەلوردادا تۋريستەر سانى 2022 جىلمەن سالىستىرعاندا 12%-عا ارتىپ, 1,3 ملن-نان استام ادامدى قۇرادى.
«تۋريستەر كەلەتىن ەلدەر بويىنشا ءبىرىنشى ورىندا رەسەي, ودان كەيىن قحر, تۇركيا, گەرمانيا, وزبەكستان, اقش جانە ت.ب. ەلدەر ورنالاسقان. 2023 جىلى تەمىرجول اعىنى شامامەن 5,5 ملن ادامدى قۇرادى, 4%-عا ءوسىم بايقالادى. نەگىزگى ءوسىم اۋە كولىگىمەن تاسىمالداۋدا تىركەلدى, مۇندا 30 باعىت بويىنشا الەمنىڭ 13 ەلىنە 23 اۆياكومپانيا تىكەلەي حالىقارالىق رەيستەردى ورىندايدى. ۆيزاسىز رەجيم 79 ەلمەن جاڭارتىلدى», – دەپ اتاپ ءوتتى سپيكەر.
استانادا تۋريستەر وزدەرىن جايلى سەزىنۋى ءۇشىن بارلىق قاجەتتى ينفراقۇرىلىم جاسالعان.
قالادا بارلىعى 9 283 نومىرگە ارنالعان 229 قوناق ءۇي جۇمىس ىستەيدى, 70 ءىرى تۋريستىك نىسان: تەاترلار, مۇراجايلار, ساياباقتار, سوو, 2100-دەن استام قوعامدىق تاماقتانۋ نىسانى, 2 اقپاراتتىق تۋريستىك دۇڭگىرشەك بار. قالادا جاياۋ جۇرگىنشىلەرگە باعدارلاۋدىڭ بىرىڭعاي جۇيەسىنىڭ 262 ەلەمەنتى بار, ەكى قاباتتى «Red Bus» ەكسكۋرسيالىق اۆتوبۋسى جۇرەدى, CityPASS بىرىڭعاي تۋريستىك كارتاسى ىسكە اسىرىلادى, استانا قالاسىنىڭ 168 كورنەكى نىسانى بويىنشا اۋديو تۋرلار ورنالاستىرىلعان.
«تۋريستەردىڭ قاۋىپسىزدىگىن قامتاماسىز ەتۋ ءۇشىن سەرۆيستىك قىزمەت – ەلوردانىڭ تۋريستىك پوليتسياسى قۇرىلدى. قازاقستان رەسپۋبليكاسىنىڭ تۋريستىك سالاسىن دامىتۋ تۇجىرىمداماسىنا سايكەس استانا ەلدىڭ ساياسي, اكىمشىلىك, ىسكەرلىك جانە مادەني ورتالىعى بولىپ سانالادى. وسىعان بايلانىستى, ىسكەرلىك تۋريزم ەلوردادا باسىم باعىت بولىپ بەلگىلەندى. استانادا كونگرەسس-كورمە ينفراقۇرىلىمى جەتكىلىكتى, وسى باعىتتى دامىتۋعا ەرەكشە نازار اۋدارامىز. ەلوردانىڭ ىسكەرلىك تۋريزم يندۋسترياسىن دامىتۋ ماقساتىندا, سونداي-اق ءىس-شارالاردى وتكىزۋ ءۇشىن ءبىز سالالىق قاۋىمداستىقتار مەن كورپوراتيۆتىك سەكتور وكىلدەرىمەن ارىپتەستىك باعدارلامانى ىسكە اسىرامىز.قاتىسۋشىلاردىڭ جالپى سانى 90-نان استام كومپانيا», – دەدى ماقسات جاڭاباەۆ.
استانادا ەلوردا برەندىن ىلگەرىلەتۋگە ىقپال ەتەتىن ءىس-شارالاردى ۇيىمداستىرۋشىلاردى قولداۋ باعدارلاماسى جۇزەگە اسىرىلۋدا. سونداي-اق, قالادا وقيعالىق تۋريزم دامىپ كەلەدى.
2023 جىلى استانادا 350-دەن استام ىسكەرلىك, سپورتتىق جانە مادەني ءىس-شارالار وتكىزىلدى.
كورسەتىلەتىن تۋريستىك قىزمەتتەردىڭ ساپاسىن جاقسارتۋ بويىنشا جۇمىستار جۇرگىزىلۋدە. تۋريستەرگە جايلى بولۋى ءۇشىن استانانى دامىتۋ ورتالىعى «Visit Astana» سەرىكتەستىك باعدارلاماسىن ىسكە اسىرۋدا.
بۇگىنگى تاڭدا باعدارلامانىڭ 60-تان استام سەرىكتەسى بار. بۇل قوناق ۇيلەر, مەيرامحانالار, تۋروپەراتورلار, قىزمەت كورسەتۋ مەن قىزمەت كورسەتۋدىڭ جوعارى دەڭگەيىنە كەپىلدىك بەرەتىن كورىكتى ورىندار.
«ەلوردا ءتۋريزمىن دامىتۋدىڭ تاعى ءبىر باسىم باعىتى مەديتسينالىق تۋريزم بولدى. قالادا JCI حالىقارالىق ساپا ستاندارتىمەن اككرەديتتەلگەن 7 كلينيكا جۇمىس ىستەيدى. استانا قالاسىندا ەمدەلۋدىڭ نەگىزگى باعىتتارى كارديوحيرۋرگيا, نەيروحيرۋرگيا, ستوماتولوگيا, پلاستيكالىق حيرۋرگيا جانە ونكولوگيالىق اۋرۋلاردى ەمدەۋ بولىپ سانالادى. نەگىزگى ارتىقشىلىعى – شەتەلدىك كلينيكالارمەن سالىستىرعاندا مەديتسينالىق قىزمەتتەردىڭ قۇنى تومەن ءارى ساپاسى جوعارى. ونىڭ ىشىندە, ءبىزدىڭ كلينيكالار زاماناۋي جابدىقتارمەن جانە جوعارى بىلىكتى ماماندارمەن جابدىقتالعانىن اتاپ وتۋگە بولادى. سونداي-اق, مەديتسينالىق ءتۋريزمدى دامىتۋ جانە مەديتسينالىق ۇيىمدار مەن تۋريستىك سالا وكىلدەرىنىڭ بىرلەستىگى ءۇشىن «قازاقستاندىق مەديتسينالىق تۋريزم قاۋىمداستىعى» قۇرىلدى, وعان بۇگىنگى تاڭدا 46 كلينيكا مەن مەديتسينالىق ۇيىم كىردى», – دەپ حابارلادى جاۋاپتى باسقارمانىڭ وكىلى.
