استاناداعى اسكەري كوللەدجدە ساعادات نۇرماعامبەتوۆتى ەسكە الۋعا ارنالعان شارا ءوتتى, دەپ حابارلايدى astana-akshamy.kz
كەڭەس وداعىنىڭ باتىرى, حالىق قاھارمانى, تاۋەلسىز قازاقستاننىڭ تۇڭعىش ءمينيسترى ارميا گەنەرالى ساعادات نۇرماعامبەتوۆ اتىنداعى اسكەري كوللەدجدە عاسىرلىق مەرەيتويعا وراي كونفەرەنتسيا ءوتتى.
وعان «Tayelsiz Qazaqstannyn Halyq Batyrlary» رقب باسشىسى حالىق قاھارمانى گەنەرال-لەيتەنانت باقىتجان ەرتاەۆ, «قارۋلى كۇشتەر ارداگەرلەرى» رقب توراعاسىنىڭ ورىنباسارى گەنەرال-مايور مارات ناعۇمانوۆ, قورعانىس مينيسترلىگى اسكەري ءبىلىم جانە عىلىم دەپارتامەنتى باستىعىنىڭ ورىنباسارى پولكوۆنيك امانگەلدى توعىسوۆ, قازاقستان رەسپۋبليكاسى ۇلتتىق قورعانىس ۋنيۆەرسيتەتىنىڭ, ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, م. جۇماباەۆ اتىنداعى حالىقارالىق كوللەدجدىڭ وقىتۋشىلارى, اسكەري وقۋ ورنىنىڭ كادەتتەرى مەن ۇلاندارى قاتىستى.
ءىس-شارا اسكەري كوللەدج اۋماعىندا ورنالاسقان ساعادات نۇرماعامبەتوۆتىڭ بيۋستىنە گۇل شوقتارىن قويۋدان باستالدى. سالتاناتتى راسىمگە قاتىسۋشىلار حالىق باتىرىن ءبىر مينۋت ءۇنسىز تۇرىپ, ەسكە الدى.
قارۋلى كۇشتەردىڭ مەملەكەتتىك اسكەري-تاريحي مۋزەيىنىڭ قولداۋىمەن كوللەدجدە باتىردىڭ ءومىربايانىنىڭ كەزەڭدەرىن بەينەلەيتىن فوتوكورمە, ايگىلى گەنەرالعا ارنالعان مۇراجاي ەكسپوزيتسياسى اشىلدى. وندا گەنەرال فورماسى, كيتەلى, ۇلى وتان سوعىسىندا پايدالانعان كومانديرلىك سومكەسى مەن كارتاسى, ساعادات نۇرماعامبەتوۆتىڭ بەينەسى توقىلعان كىلەم ىلىنگەن.
ءىس-شاراعا قاتىسۋشىلارعا قارۋلى كۇشتەردىڭ ارداگەرلەرى باقىتجان ەرتاەۆ پەن مارات ناعۇمانوۆ قۇتتىقتاۋ ءسوز سويلەدى. كونفەرەنتسيادا ۇلتتىق قورعانىس ۋنيۆەرسيتەتىنىڭ اعا وقىتۋشىسى پولكوۆنيك اسقار ماكيپوۆ, ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اسكەري كافەدراسىنىڭ وقىتۋشىسى پولكوۆنيك اتىعاي بالعابەكوۆ, م. جۇماباەۆ اتىنداعى حالىقارالىق كوللەدجىنىڭ ءااد وقىتۋشىلارى پودپولكوۆنيك ەرلان سەرىكباەۆ پەن كاپيتان سەرىك سۇلەيمەنوۆتىڭ باياندامالارى تىڭدالدى.
جيىن بارىسىندا ءسوز سويلەگەندەر ساعادات نۇرماعامبەتوۆتىڭ ءومىرى مەن جاۋىنگەرلىك جولىنىڭ جاستاردى اسكەري-پاتريوتتىق تاربيەلەۋ ىسىندەگى ماڭىزىن اتاپ ءوتتى. قازاقستاننىڭ ءبىرىنشى قورعانىس ءمينيسترىنىڭ ەسىمىمەن اتالاتىن اسكەري كوللەدج تاربيەلەنۋشىلەرى ساعادات قوجاحمەتۇلىنىڭ ءومىربايانىن جاقسى بىلەتىنىن ايتا كەتكەن ءجون. ونىڭ قۇرمەتىنە وقۋ ورنىنىڭ حورى «ساعادات» ءانىن جانە ەرجۇرەك ماماندىق وكىلدەرى – وتان قورعاۋشىلارعا ارناپ باسقا دا شىعارمالار ورىندادى. ال ۇلان امزەحان ءساتجان حالىق قاھارمانى ساعادات نۇرماعامبەتوۆ تۋرالى ءوزى شىعارعان ولەڭدى وقىپ بەردى.
