مەكتەپ ەڭ قاۋىپسىز ورىن بولۋى ءتيىس
ءبىلىم بەرۋ ۇيىمدارىندا بالالاردىڭ قاۋىپسىزدىگىن قامتاماسىز ەتۋ ماسەلەسى – باسىم باعىتتىڭ ءبىرى. مەملەكەت باسشىسى قاسىم-جومارت توقاەۆ ايتقانداي, مەكتەپ ەڭ قاۋىپسىز جەر بولۋى ءتيىس. بۇگىنگى تاڭدا قالاداعى بارلىق مەملەكەتتىك ءبىلىم بەرۋ ۇيىمى اۆتوماتتى ءورت دابىلى جۇيەسىنە قوسىلىپ, تولىعىمەن تسيفرلىق بەينەباقىلاۋمەن, تۋرنيكەتپەن جانە ءى ساناتتى ليتسەنزياسى بار كۇزەت كاسىپورىندارىمەن قامتاماسىز ەتىلگەن. سونداي-اق بارلىق كامەرا مەن دابىل تۇيمەسى جەدەل باسقارۋ ورتالىعىنا قوسىلعان.
باسقارما تاراپىنان ءبىلىم بەرۋ ۇيىمدارىنىڭ اۋماعىندا جانە 1 كم راديۋستا كىرمە جولدار مەن اشىق كارىز قۇدىقتارى (ليۋكتەر) بويىنشا مونيتورينگ جۇرگىزىلدى. 2023-2024 وقۋ جىلىنىڭ باسىنان بارلىق ءبىلىم بەرۋ ۇيىمىندا توتەنشە جاعدايلار دەپارتامەنتى ماماندارىمەن بىرلەسە وتىرىپ, تابيعي جانە تەحنوگەندىك سيپاتتاعى توتەنشە جاعدايلار كەزىندە قىزمەتكەرلەر مەن وقۋشىلاردىڭ ءىس-ارەكەتى بويىنشا 120 ترەنينگ ءوتتى.
جاز ماۋسىمى باستالار الدىندا اۋدان اكىمدىكتەرىمەن, اۋداندىق توتەنشە جاعدايلار دەپارتامەنتتەرىمەن جانە توتەنشە جاعدايلار باسقارماسىمەن بىرلەسىپ, ويىن الاڭدارىن, سپورت عيماراتتارىن, عيماراتتاردى, اشىق ليۋكتەردى, بالالاردىڭ شومىلۋ ورىندارىن, اتتراكتسيونداردى جانە ت. ب. بويىنشا تەكسەرۋ جۇمىستارى جۇرگىزىلەدى.
2024 جىلى اقپان ايىندا اكىمدىكتە ءبىلىم بەرۋ ۇيىمدارىنداعى جانە ودان تىسقارى قاۋىپسىزدىك ماسەلەلەرى بويىنشا قر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى, پروكۋراتۋرا, پوليتسيا دەپارتامەنتى جانە باسقا دا مۇددەلى ورگانداردىڭ بىرلەسكەن وتىرىسى ءوتتى. بالالاردىڭ قاۋىپسىزدىك ماسەلەسى قالا اكىمىنىڭ ۇنەمى باقىلاۋىندا بولعاندىقتان, بارلىق مۇددەلى ورگاندارعا بىرقاتار تاپسىرما بەرىلدى:
– قالالىق مەكتەپ پسيحولوگتارىنىڭ سانىن 200-گە (228-دەن 428-گە), قورعانشىلىق جانە قامقورشىلىق قىزمەتكەرلەرىنىڭ سانىن ەكى ەسەگە ارتتىرۋ.
جاز ماۋسىمى باستالار الدىندا اۋدان اكىمدىكتەرىمەن, اۋداندىق توتەنشە جاعدايلار دەپارتامەنتتەرىمەن جانە توتەنشە جاعدايلار باسقارماسىمەن بىرلەسىپ, ويىن الاڭدارىن, سپورت عيماراتتارىن, عيماراتتاردى, اشىق ليۋكتەردى, بالالاردىڭ شومىلۋ ورىندارىن, اتتراكتسيونداردى جانە ت. ب. بويىنشا تەكسەرۋ جۇمىستارى جۇرگىزىلەدى
– قامقورشىلىق قىزمەتىنىڭ ءتيىمدى جۇمىس ىستەۋى ءۇشىن مەملەكەتتىك الەۋمەتتىك تاپسىرىس شەڭبەرىندە ۇكىمەتتىك ەمەس ۇيىمدارعا ناشاقورلىقتىڭ الدىن الۋ, كامەلەتكە تولماعانداردىڭ قۇقىعىن قورعاۋ جانە اتا-اناسىنىڭ قامقورلىعىنسىز قالعان بالالار, جەتىم بالالارعا ارنالعان قالالىق ءبىلىم بەرۋ ۇيىمدارىنىڭ تۇلەكتەرىن ينتەرناتتان كەيىنگى قولداۋعا باعىتتالعان ءىس-شارالارعا تارتۋ جۇمىستارى جۇرگىزىلەدى. سونداي-اق كامەلەتكە تولماعانداردىڭ جىنىستىق قول سۇعىلماۋشىلىققا قارسى قىلمىستاردىڭ الدىن الۋ, وتباسىنداعى كەلەڭسىزدىكتەردى ەرتە انىقتاۋ جۇمىستارى دا قامتىلعان.
قۇقىق بۇزۋشىلىقتىڭ الدىن الۋ
بۇگىندە باسقارما قۇقىق بۇزۋشىلىقتىڭ الدىن الۋ جۇمىستارىن كۇشەيتىپ وتىر. تەك 2024 جىلدىڭ باسىنان بەرى پروفيلاكتيكالىق كەڭەستەردىڭ 420 وتىرىسى ءوتتى, بۇل 2023 جىلمەن سالىستىرعاندا 180 پايىزعا كوپ (2023 جىلى – 1064, 2023 جىلدىڭ ناۋرىزىندا – 150).
قازىرگى ۋاقىتتا يۋۆەنالدى پوليتسيا بولىمشەسىندە 135 (138) كامەلەتكە تولماعان ءجاسوسپىرىم ەسەپتە تۇر, بۇل 2,2 پايىزعا تومەندەگەنىن كورسەتەدى, 363 (309) وقۋشى مەكتەپ ەسەبىندە تۇر, 17,5 پايىزعا ءوستى, بۇل ءبىلىم بەرۋ ۇيىمدارىندا پروفيلاكتيكالىق جۇمىستاردىڭ كۇشەيگەنىن اڭعارتادى.
ەسەپكە الىنعان كامەلەتكە تولماعاندارمەن جۇمىس جەكە جوسپار بويىنشا جۇرەدى. ءاربىر مەكتەپ وقۋشىسى مەن كوللەدج ستۋدەنتىنە الەۋمەتتىك پورترەت جاسالدى.
بارلىق جالپى ءبىلىم بەرەتىن مەكتەپتە قوسىمشا ءبىلىم بەرۋ ۇيىمدارىنىڭ 135 فيليالى جۇمىس ىستەيدى, ولاردا 213556 وقۋشى ءبىلىم الادى. سونداي-اق مەكتەپتەردە جۇمىس ىستەيتىن ۇيىرمەلەرگە 84377 وقۋشى تارتىلعان. ەلوردالىق وقۋشىلاردىڭ 81,5 پايىزىنىڭ بوس ۋاقىتىن ۇيىمداستىرۋدا.
124 ءبىلىم بەرۋ ۇيىمىنىڭ (98 مەكتەپ جانە 26 كوللەدج) بازاسىندا «جاس سارباز» اسكەري-پاتريوتتىق قوعامدىق قوزعالىسىنىڭ جانىنان 85 اسكەري-پاتريوتتىق كلۋب جۇمىس ىستەيدى.
كامەلەتكە تولماعاندار اراسىندا قۇقىقتىق مادەنيەتتى ارتتىرۋ ماقساتىندا ءىس-شارالار (ساباق, اڭگىمەلەسۋ, لەكتسيا, ساۋالناما, كونكۋرس, كەزدەسۋ) وتەدى.
2022 جىلدان باستاپ «قاۋىپسىزدىك ساعاتى» ۆەدومستۆوارالىق ءوزارا ءىس-قيمىل جوباسى جۇمىس ىستەيدى (پروكۋراتۋرا, سوت, توتەنشە جاعدايلار قىزمەتى, دەنساۋلىق ساقتاۋ باسقارماسى, پوليتسيا بولىمدەرى جانە ت. ب.). بۇگىندە 32 مەكتەپتە جانە 8 كوللەدجدە ءىس-شارالار ءوتىپ, 16 مىڭنان استام اتا-انا قامتىلدى.
سۋيتسيد پەن بۋللينگتىڭ سەبەبى نە؟
قالانىڭ 5 اۋدانىندا وقۋشىلار مەن اتا-انالارعا تەگىن پسيحولوگيالىق جانە كونسۋلتاتيۆتىك كومەك كورسەتۋ ءۇشىن كابينەتتەر اشىلدى. جىل باسىنان بەرى 142 بالا مەن 156 اتا-انا كونسۋلتاتسيادان ءوتتى. سونىمەن قاتار قالالىق پسيحولوگيالىق قولداۋ ورتالىعىن اشۋ جوسپارلانۋدا. اتالمىش ورتالىق دياگنوستيكالىق, تۇزەتۋ-دامىتۋ, كونسۋلتاتيۆتىك جانە پسيحو-پروفيلاكتيكالىق قىزمەتتەردى كورسەتەدى.
مەكتەپتەر مەن كوللەدجدەردە پسيحولوگپەن تىكەلەي بايلانىسىپ, كەڭەس الۋعا مۇمكىندىك بەرەتىن QR-كودتارى بار اقپاراتتىق بەلگىلەر ورناتىلعان. بالالار مەن ولاردىڭ اتا-اناسى سۇراقتارعا جاۋاپ الا الادى, سونىمەن قاتار ستۋدەنتتەر اراسىندا تۋىندايتىن ماسەلەلەر بويىنشا ارەكەت ەتە الادى.
بيىل ءبىلىم بەرۋ ۇيىمدارىندا بۇزاقىلىققا قارسى باعدارلامانى جۇزەگە اسىرۋ جوسپارلانۋدا. وسى ماقساتتا قاناتقاقتى جوباعا 5 مەكتەپ ەندى (الماتى اۋدانىنداعى №72 مەكتەپ, بايقوڭىر اۋدانىنداعى №16 مەكتەپ, نۇرا اۋدانىنداعى №79 مەكتەپ, ەسىل اۋدانىنداعى №24 مەكتەپ, سارىارقا اۋدانىنداعى №6 مەكتەپ).
وسى باعدارلاما اياسىندا بۇزاقىلىقتىڭ الدىن الۋ جانە ازايتۋ (ساباقتاردى وتكىزۋ, تاقىرىپتىق مىندەتتەر, بىرلەسىپ وقۋ), قورقىتۋدىڭ انىقتالعان جاعدايىن شەشۋ بويىنشا شارالار قابىلدانادى. سونداي-اق مۇعالىمدەردى وقۋشىلاردىڭ قورقىنىش دارەجەسىن انىقتاۋ داعدىسىنا ۇيرەتۋ جوسپارلانۋدا.
اسحانانىڭ اس ءمازىرى قانداي؟
ەلورداداعى 102 جالپى ءبىلىم بەرەتىن مەملەكەتتىك مەكتەپتە 214 مىڭنان استام وقۋشى ءبىلىم الۋدا, ونىڭ ىشىندە 100 پايىز باستاۋىش سىنىپ وقۋشىلارى مەن حالىقتىڭ الەۋمەتتىك وسال توپتارىنداعى بالالار تەگىن ىستىق تاماقپەن قامتىلعان.
مەديتسينا ۋنيۆەرسيتەتىمەن بىرلەسە پەرسپەكتيۆالىق ماۋسىمدىق (جاز-كۇز, قىس-كوكتەم) ەكى اپتالىق اس ءمازىرى ازىرلەنىپ, بەكىتىلدى.
مەكتەپتەردە قامقورشىلىق كەڭەسى, اتا-انالار كوميتەتى, مەكتەپ اكىمشىلىگى, مەديتسينا قىزمەتكەرلەرى وكىلدەرىنىڭ قاتىسۋىمەن تاماقتانۋدىڭ ساپاسىن باقىلايتىن كوميسسيالار قۇرىلدى. سونداي-اق استانا قالاسىنىڭ ازىق-تۇلىك ساپاسىن باقىلاۋ جونىندەگى ۆەدومستۆوارالىق ساراپتاۋ توبى قۇرىلدى.
ازىق-تۇلىك ساپاسىن باقىلاۋ جونىندەگى ۆەدومستۆوارالىق ساراپتاۋ توبى تاماقتانۋ ساپاسىن باقىلاۋ كوميسسيالارىنىڭ قىزمەتىنە جۇيەلى مونيتورينگ جۇرگىزەدى جانە مەكتەپ وقۋشىلارىنىڭ تاماقتانۋىن ءتيىمدى ۇيىمداستىرۋ بويىنشا شارالار قابىلدايدى.
اعىمداعى وقۋ جىلىندا ۆەدومستۆوارالىق ساراپتاۋ توبى ءبىلىم بەرۋ ۇيىمدارىنداعى تاماقتانۋ ساپاسىن باقىلاۋ جونىندەگى كوميسسيالارعا ارنالعان سەمينار-كەڭەس وتكىزدى.
ءساۋىردىڭ 11-ىنەن باستاپ ۆەدومستۆوارالىق ساراپتاۋ توبى ءبىلىم بەرۋ ۇيىمدارىنداعى تاماق ساپاسىن قامتاماسىز ەتۋ ماقساتىندا مونيتورينگ جۇرگىزەدى. قازىرگى كەزدە مەكتەپ اسحانالارىنداعى تاعامنىڭ ساپاسى ۇنەمى باقىلاۋدا.
قاسىمحان سەنعازىەۆ, استانا قالاسى
ءبىلىم باسقارماسىنىڭ باسشىسى
