ماسليحاتتىڭ مەرەيتويىنا ارنالدى
استانا اكىمى ادىلبەك جاقسىبەكوۆتىڭ قاتىسۋىمەن قازاقستان رەسپۋبليكاسى ءماسليحاتتارىنىڭ قۇرىلعانىنا 20 جىل تولۋىنا وراي ۇيىمداستىرىلعان سالتاناتتى جيىن ءوتتى.
جيىندى استانا قالالىق ءماسليحاتىنىڭ حاتشىسى سانسىزباي ەسىلوۆ جۇرگىزسە, العاشقى ءسوزدى قالا اكىمى الدى. ادىلبەك جاقسىبەكوۆ ءوز سوزىندە قالالىق ءماسليحاتتىڭ قىزمەتى مەن شەشىمدەرى ءار استانالىققا قاتىستى ەكەنىن ايتا كەلىپ, جەرگىلىكتى زاڭ شىعارۋشى ورگان رەتىندە ءماسليحاتتىڭ مەملەكەتتىك ساياساتتى جۇزەگە اسىرۋدا ەرەكشە ۇلەسى بار ەكەنىن جەتكىزدى. سونداي-اق, ءماسليحات سەسسيالارىندا ەلوردانى دامىتۋعا قاتىستى ەڭ وزەكتى ماسەلەلەر بويىنشا شەشىمدەر قابىلدانعانىنا توقتالدى.
بۇعان قوسا, ادىلبەك جاقسىبەكوۆ مەرەيلى داتالاردىڭ سايكەستىگىنە دە نازار اۋداردى. تۋرا 20 جىل بۇرىن مەملەكەت باسشىسى نۇرسۇلتان ءابىشۇلى نازارباەۆ مەملەكەت استاناسىن اقمولا قالاسىنا, بۇگىندە بارشا ەلگە سۇيىكتى استاناعا اۋىستىرۋ تۋرالى شەشىمىن جاريالاعان بولاتىن.
«سول 1994 جىلى الەۋمەتتىك-ەكونوميكالىق تالاپتار جاڭا كوزقاراستى, بارشا باسقارۋشىلىق جۇيەنى قايتا قۇرۋدى, نارىقتىق ەكونوميكا زاڭدىلىقتارىنا نەگىزدەلگەن ءومىر ءسۇرۋ تارتىپتەرىن ەنگىزۋدى تالاپ ەتكەن بولاتىن. سونداي تاريحي ماڭىزدى كەزەڭدە قالالىق ءماسليحات دەپۋتاتتارى ەلوردانىڭ قالىپتاسۋىنا زور ۇلەسىن قوستى» دەدى اكىم.
جيىن بارىسىندا ەلوردا باسشىسى قازاقستان رەسپۋبليكاسىنىڭ الەۋمەتتىك-ەكونوميكالىق دامۋىنا جانە جەرگىلىكتى ءوزىن-ءوزى باسقارۋدى قالىپتاستىرۋعا قوسقان ۇلەسى ءۇشىن بىرنەشە دەپۋتاتتى مەدالدارمەن جانە قۇرمەت قاعازدارىمەن ماراپاتتادى.
ەلوردانىڭ جەرگىلىكتى وكىلدىك ورگانى – استانا قالاسى ءماسليحاتىنىڭ حاتشىسى سانسىزباي ەسىلوۆ تە بارلىق دەپۋتاتتار الدىندا مەملەكەت باسشىسى كورسەتكەن «قازاقستان-2020» ستراتەگياسى جانە ەلباسىنىڭ «نۇرلى جول – بولاشاققا باستار جول» اتتى جولداۋىنداعى باعدارلامالاردى ىسكە اسىرۋ جونىندە اسا ماڭىزدى ءمىندەتتەر تۇرعانىن تىلگە تيەك ەتتى.
«بولاشاققا ۇمتىلعان جاڭا قازاقستاننىڭ العاشقى قادامدارى رەتىندە 1993 جىلى كونستيتۋتسيا مەن «جەرگىلىكتى وكىلەتتىك جانە اتقارۋشى ورگاندارى تۋرالى» زاڭنىڭ قابىلدانۋىن ايتۋعا بولادى. اتالعان زاڭنىڭ قابىلدانۋىنان باستاپ قازاقستاننىڭ وكىلەتتىك ورگاندارى ءوز تاريحىن كۇنى بۇگىنگى دەيىن ماڭداي تەرىمەن جازىپ كەلەدى. سونىمەن قاتار, 1994 جىلى جەرگىلىكتى وكىلدىك ورگاندارى, ماسليحاتتارعا العاشقى دەپۋتات سايلاۋلارى وتكەن بولاتىن. ال 1994 جىلى 1 ساۋىردە اقمولا قالالىق ءماسليحاتىنىڭ ءبىرىنشى سەسسياسى ءوتتى دەدى ءماسليحات حاتشىسى.
نۇريسلام قۇسپانعالي