مەديتسينا قىزمەتكەرلەرىنىڭ مەرەكەسىنە وراي استاناداعى №1 قالالىق اۋرۋحانادا مەرەكەلىك ءىس-شارا بولىپ ءوتتى.
مەرەكەلىك جيىنعا دەنساۋلىق ساقتاۋ باسقارماسىنىڭ باسشىسى ايگۇل سەگىزباەۆا, استانا قالاسىنىڭ ءماسليحات دەپۋتاتى قارشىعا قۇلمۇحانوۆ, استانا قالاسىنىڭ ارداگەرلەر كەڭەسىنىڭ توراعاسى امانگەلدى سىزدىقوۆ جانە باسقالار قاتىستى.
جيىندى اشقان باسقارما باسشىسى ايگۇل كيمقىزى اق جەلەڭدى ابزال جانداردى ءتول مەرەكەسىمەن قۇتتىقتاي كەلە, ولارعا استانا قالاسى اكىمىنىڭ «قۇرمەت گراموتالارىن» تاپسىردى. بۇل ماراپاتتاۋعا استانا قالاسىنىڭ مەديتسينا قىزمەتكەرلەرى كاسىپوداعىنىڭ توراعاسى باحىتجان ءتاجىباي مەن №2 قالالىق ەمحاناسىنىڭ رەنتگەنولوگ-دارىگەرى ەرلان ەسىركەپ يە بولدى. بۇدان وزگە, مەديتسينا سالاسىنداعى جەتىستىكتەرى ءۇشىن قر پرەمەر-ءمينيسترىنىڭ العىسحاتى №1 قالالىق ەمحانا نەيروحيرۋرگيلىق ءبولىمىنىڭ باسقارۋشىسى ەرلان قاليەۆكە تابىستالدى. ال استانا قالاسىنىڭ اكىمىنىڭ العىسحاتىن 7 دارىگەر ەنشىلەدى. سونداي-اق, ارىپتەستەرى اراسىندا بىلىكتىلىگىمەن كوزگە تۇسكەن اقحالاتتىلار «قازاقستان رەسپۋبليكاسىنىڭ دەنساۋلىق ساقتاۋ ىسىنە قوسقان ۇلەسى ءۇشىن» جانە «قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى» ءتوس بەلگىلەرىمەن ماراپاتتالدى.
جىل سايىن ەلوردادا «ەڭ ۇزدىك مامان» بايقاۋى وتكىزىلەتىنى بەلگىلى. بيىل بۇل سايىسقا 9 دارىگەر مەن 5 مەدبيكە قاتىسىپتى. استانا قالاسىنىڭ جەدەل مەديتسينالىق جاردەم قىزمەتىنىڭ دارىگەرى اسقار كاۋشۋراەۆ بارىنەن وزىق شىعىپ, ءبىرىنشى ورىندى يەلەندى. ال ەكىنشى ورىن جۇقپالى اۋرۋلار اۋرۋحاناسىنىڭ ءبولىم مەڭگەرۋشىسى ءلاززات اياشەۆاعا بۇيىرسا, ءۇشىنشى ورىندى №2 قالالىق بالالار اۋرۋحاناسى قابىلداۋ-دياگنوستيكالىق ءبولىمىنىڭ دارىگەرى امۋر جانپەيسوۆ الدى. ال №1 قالالىق اۋرۋحاناسى شۇعىل حيرۋرگيالىق بولىمشەسىنىڭ مەيىربيكەسى ينديرا ابىشەۆا «ەڭ ۇزدىك مەدبيكە» بايقاۋىنىڭ ۇزدىگى بولىپ تانىلدى. ەكىنشى ورىندى رەسپۋبليكالىق سانيتارلىق اۆياتسيا ورتالىعىنىڭ فەلدشەرى مارات راقىمجانوۆ السا, ءۇشىنشى ورىندى قالالىق جۇقپالى اۋرۋلار اۋرۋحاناسىنىڭ مەدبيكەسى گۇلسىم بالتاباەۆا ەنشىلەدى.
سالتاناتتى راسىمنەن كەيىن №1 قالالىق اۋرۋحاناسى باس دارىگەرىنىڭ حيرۋرگيالىق ءىسى جونىندەگى ورىنباسارى عاليا ابەجانوۆا ەلوردا مەديتسيناسىنىڭ جەتىستىگىنە توقتالا كەلە, حيرۋرگيا سالاسىنداعى تابىس-تار كوپ ەكەنىن اتاپ ءوتتى. مىسالى, وسىندا 2 باۋىر, 3 بۇيرەك ترانسپلانتاتسياسى جاسالعان. كەلەسى اپتادا ءۇشىنشى رەت باۋىر اۋىستىرۋ وپەراتسياسى جاسالادى دەپ جوسپارلانىپ وتىر. «ەلوردا دارىگەرلەرى زاماناۋي مەديتسينالىق اپپاراتتاردىڭ ءتىلىن مەڭگەرىپ, شەت مەملەكەتتەردە تاجىريبەدەن ءوتۋىنىڭ ءوزى – ۇلكەن جەتىستىك» دەيدى عاليا ابەجانوۆا.
مەرەكەلىك شارا كونتسەرتتىك باعدارلاماعا ۇلاستى.
بوتا جۇمابايقىزى
