بۇكىل سانالى عۇمىرىن جۇرەگى قالاعان ماماندىققا ارناپ, بويىنداعى جىگەرى مەن قايراتىن, ءبىلىمى مەن بىلىكتىلىگىن ءبىر سالاعا جۇمسايتىن ادامدار بولادى. مۇنداي ادامدارعا حالىقتىڭ دا قۇرمەتى ەرەكشە. سونداي قادىرلى ازاماتتىڭ ءبىرى جوعارى ساناتتى دارىگەر تاڭسىقباي كۇسەمىسوۆ ەدى.
سوڭعى بەس جىلدا نۇر-سۇلتان قالاسى اكىمدىگىنىڭ «قارتتارعا, مۇگەدەكتەرگە جانە مۇگەدەك بالالارعا ارنالعان وڭالتۋ ورتالىعى» مەكەمەسىنىڭ باس دارىگەرى بولعان تاڭسىقباي سەيتايۇلى بۇكىل سانالى ءومىرىن, اتاپ ايتقاندا 47 جىل بويى دەنساۋلىق ساقتاۋ سالاسىندا ەلەۋلى ەڭبەك ەتتى. اق حالاتتى ابزال ازاماتتىڭ ءوز ماماندىعىن جان-تانىمەن سۇيەتىنىنە بىرگە جۇمىس ىستەگەن كەزىمىزدە سان مارتە كوز جەتكىزگەن ەدىك.
باس دارىگەر مىندەتىن اتقارا ءجۇرىپ, تەراپەۆت رەتىندە ءاربىر ناۋقاستىڭ جاعدايىن بىلۋگە مەيىلىنشە كوڭىل ءبولىپ, ولارعا سىرقاتتان ەمدەلۋدىڭ جولدارىن ءتۇسىندىرىپ, ايتىپ وتىراتىن. سولاي بولا تۇرا قاراماعىنداعى مەديتسينا قىزمەتكەرلەرىنە تالاپشىل ەدى. سول تالاپشىلدىعىنان جاس ماماندار كوپ نارسە ۇيرەنىپ, جاۋاپكەرشىلىكپەن جۇمىس ىستەۋگە ۇمتىلاتىن.
بۇكىل ءومىرىن دەنساۋلىق ساقتاۋ سالاسىنا ارناعان تاڭسىقباي سەيتايۇلى 1949 جىلدىڭ 2 شىلدەسىندە سولتۇستىك قازاقستان وبلىسى, سەرگەەۆ اۋدانى, بالۋان اۋىلىندا دۇنيەگە كەلدى. 1966 جىلى پەتروپاۆل قالاسىنداعى قازاق مەكتەپ-ينتەرناتىن ءبىتىرىپ, سول جىلى الماتى مەملەكەتتىك مەديتسينالىق ينستيتۋتىنا وقۋعا تۇسەدى. 1972 جىلى «ەمدەۋ ءىسى» ماماندىعى بويىنشا ديپلوم الىپ, ەڭبەك جولىن تۋعان جەرىندە, اتاپ ايتقاندا وبلىستىق اۋرۋحانادا انەستەزيولوگ-رەانيماتولوگ دارىگەر بولىپ باستايدى. كەيىننەن جەدەل جاردەم دارىگەرى, قالالىق №1 قالالىق بىرىكتىرىلگەن اۋرۋحاناسىنىڭ ەمدەۋ ءبولىمى بويىنشا باس دارىگەردىڭ ورىنباسارى, باس دارىگەر قىزمەتىن اتقارادى. 2002 جىلى وسى اۋرۋحانا «دەنساۋلىق جىلى» اياسىندا وتكىزىلگەن رەسپۋبليكالىق بايقاۋدا جۇلدەلى ءۇشىنشى ورىنعا يە بولدى. 2003 جىلدان بەرى بىلىكتى دارىگەر ءارى ۇيىمداستىرۋشى بولعان ت.كۇسەمىسوۆ پەتروپاۆل قالاسى بويىنشا دەنساۋلىق ساقتاۋ دەپارتامەنتىنىڭ باسشىسى قىزمەتىن اتقاردى. كەيىننەن «وبلىستىق تۋبەركۋلەزگە قارسى ديسپانسەر» مەملەكەتتىك مەكەمەسىندە, اققايىڭ اۋداندىق اۋرۋحاناسىنىڭ باس دارىگەرى بولدى.
تاڭسىقباي سەيتايۇلى دەنساۋلىق ساقتاۋ جانە سالاۋاتتى ءومىر سالتىن ناسيحاتتاۋ سالاسىنداعى ەرەكشە جەتىستىكتەرى ءۇشىن قر «دەنساۋلىق ساقتاۋ ءىسىنىڭ ۇزدىگى», «كاسىپوداقتارعا سىڭىرگەن ەڭبەگى ءۇشىن» ءتوس بەلگىلەرىمەن, «قازاقستان رەسپۋبليكاسىنا 10 جىل» مەدالىمەن ماراپاتتالعان.
تاجىريبەلى دارىگەر-ۇيىمداستىرۋشى 2015 جىلدان باستاپ وسى ۋاقىتقا دەيىن نۇر-سۇلتان قالاسى اكىمدىگىنىڭ «قارتتارعا, مۇگەدەكتەرگە جانە مۇگەدەك بالالارعا ارنالعان وڭالتۋ ورتالىعىنىڭ» باس دارىگەرى بولىپ جۇمىس ىستەدى. وسىندا كەلىپ ەمدەلەتىن ناۋقاستاردىڭ ريزاشىلىعىنا بولەنىپ, دارىگەر دەگەن قاسيەتتى ماماندىقتىڭ ابىرويىنا لايىق ەڭبەك ەتە ءبىلدى. كوپشىلىكتەن باس دارىگەرىمىز جايلى جىلى پىكىرلەر ەستۋشى ەدىك.
«ءبىزدىڭ شيپاجايدىڭ باس دارىگەرى تاڭسىقباي كۇسەمىسوۆ وتە جاقسى ازامات ەدى. ورتالىققا كەلگەن ءاربىر ادامنىڭ دەنساۋلىعىندا سىر بار ەكەنىن جەتە ۇعىنىپ, قاجەتتىلىكپەن الدىنا بارعاندا, اسىقپاي تىڭداپ, كەڭەسىن بەرىپ, جىگەرلەندىرىپ جىبەرەتىن. اسىرەسە, اۋعان سوعىسىندا بولعان جىگىتتەرگە «سەندەر سوعىستى كورگەنسىڭدەر, سەندەرگە ەرەكشە كۇتىم كەرەك دەپ كوتەرمەلەپ جۇرەتىن. وسىنداي مەيىرىمدى, ءبىلىمدى, بىلىكتى دارىگەردىڭ قايتىس بولعانىن ەستىگەندە كوڭىلىمىز ءتۇسىپ كەتتى» دەيدى جاۋىنگەر-ينتەرناتسيوناليست عالىم قوجابەكوۆ.
دەنساۋلىق ساقتاۋ سالاسىنا ەرەكشە ەڭبەك سىڭىرگەن, دارىگەر دەگەن ابىرويلى اتاعىنا ساي ءومىر سۇرگەن تاڭسىقباي كۇسەمىسوۆ ەسىمى, ارجارقىن ديدارى ونىمەن بىرگە جۇمىس ىستەگەن ارىپتەستەرىنىڭ ەسىندە ماڭگىلىك ساقتالا بەرمەك. ءومىرىن ادامداردىڭ دەنساۋلىعىن ساقتاۋعا ارناعان اق حالاتتى ابزال ازاماتتىڭ وتباسى مەن ۇرپاعىنا اماندىق تىلەيمىز.
ارىستان دجانعازيەۆ,
نۇر-سۇلتان قالاسى اكىمدىگىنىڭ «قارتتارعا,
مۇگەدەكتەرگە جانە مۇگەدەك بالالارعا
ارنالعان وڭالتۋ ورتالىعى» مەملەكەتتىك
مەكەمەسىنىڭ ديرەكتورى
