ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا بەلگىلى تەاتر جانە كينو اكتەرى, قازاقستاننىڭ حالىق ءارتىسى, پروفەسسور تىلەكتەس مەيراموۆتىڭ شىعارماشىلىق كەشى ءوتتى. ءارتىس ءارى ۇستازدىڭ 70 جىلدىق مەرەيتويىنا ارنالعان شارا بارىسىندا ف.بوردوننىڭ «قارداعى كوگەرشىننىڭ ءىزى» دراماسىنىڭ پرەمەراسى ءوتتى.
تىلەكتەس مەيراموۆ اكتەر رەتىندە عانا ەمەس, رەجيسسەر, اۋدارماشى, ۇستاز رەتىندە دە تەاتر ونەرىنىڭ العا باسۋىنا ۇلكەن ۇلەسىن قوسىپ كەلە جاتىر. قازاق تەاترىندا كەنجە قالىپ كەلە جاتقان مونوسپەكتاكل جانرىن العاش قولعا العانداردىڭ ءبىرى بولىپ, ع.مۇسىرەپوۆتىڭ «اقان سەرى–اقتوقتى» تراگەدياسىن, ر.سەيسەنباەۆتىڭ «مايدان اندەرى», ن.گوگولدىڭ «جىندىنىڭ جازبالارى» اڭگىمەلەرىن, ۋ.شەكسپير, ا.گريبوەدوۆ, ع.مۇسىرەپوۆ شىعارمالارى بويىنشا دايىندالعان «اقىلدان ازاپ» سپەكتاكلدەرىن جالعىز ورىنداپ شىقتى.
كەش يەسىن مەرەيتويىمەن استانا اكىمىنىڭ ورىنباسارى ەرمەك امانشاەۆ ارنايى كەلىپ قۇتتىقتاپ, ءارتىستىڭ تەاتر جانە كينو ونەرىنە سىڭىرگەن ەڭبەگىن اتاپ ءوتتى. قالا باسشىسىنىڭ اتىنان سىي-سىياپات جاسادى.
ايگىلى تەاتر قايراتكەرلەرى اسقار توقپانوۆ, شولپان جانداربەكوۆا, ءازىربايجان مامبەتوۆ, ەسمۇحان وباەۆ سىندى شەبەرلەردىڭ مەكتەبىنەن شىڭدالىپ شىققان تىلەكتەس مەيراموۆ جارتى عاسىرعا جۋىقتاپ قالعان شىعارماشىلىق عۇمىرىندا ونەردىڭ ورىستەۋىنە ولشەۋسىز ۇلەس قوستى. باستاپقىدا جيىرما جىلعا جۋىق م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا اكتەر بولىپ, 100-دەن اسا بەينەنى سومدادى. وتكەن عاسىردىڭ جەتپىسىنشى جىلدارى ع.مۇسىرەپوۆتىڭ «قوزى كورپەش–بايان سۇلۋ» سپەكتاكلىندە قوزى بولىپ جارق ەتىپ, اقان سەرى, ءبىرسىمباي, جاراس, ەركىن, توقپاەۆ, ۆالتەر, جانتاي سياقتى ءار جانرداعى كۇردەلى بەينەلەردى وزىنە عانا ءتان مانەرمەن الىپ شىعا ءبىلدى.
ساحنا ساڭلاعى ءانۋار مولدابەكوۆتەن كەيىن ۆوينيتسكي, جانتىق, كەرىم بەينەلەرى تىلەكتەس مەيراموۆقا بەرىلۋى دە تەگىن ەمەس. مۇنداي سۇبەلى بەينەلەردىڭ قاتارىنا شىڭعىس حان, جاڭگىر حان, ەدىل پاتشا, بەدەل, سورين, بەكتەر, انتوني رولدەرىن دە قوسۋعا بولادى.
مادەنيەت مينيسترلىگىندە تەاتر ءبولىمىنىڭ جەتەكشىسى, ع.مۇسىرەپوۆ اتىنداعى مەملەكەتتىك اكادەميالىق جاستار مەن جاسوسپىرىمدەر تەاترىنىڭ ديرەكتورى-كوركەمدىك جەتەكشىسى بولدى. بىرەۋ بىلەر, بىرەۋ بىلمەس استاناداعى «جاستار» تەاترىنىڭ باسىندا دا تىلەكتەس مەيراموۆ تۇر. وسى تەاتر اشىلعاندا ءتورت جىل ونىڭ كوركەمدىك جەتەكشىسى قىزمەتىن اتقاردى. ال جەتى جىلدان بەرى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرى. مۇندا سومداعان وننان استام بەينەنىڭ اراسىندا م.اۋەزوۆتىڭ «ابايىندا» – اباي, ۆ.ەجوۆتىڭ «تىراۋلاپ ۇشقان تىرنالارىندا» – لۋكيانوۆ, ر.سەيسەنباەۆتىڭ «مايدان اندەرى» مونوسپەكتاكلىندە سادىر رولدەرى, بىزدىڭشە, دارا تۇر.
اۋدارماشى, رەجيسسەر رەتىندە ا.گەلماننىڭ «بارىمەن وڭاشادا», ن.ابدۋللوەۆتىڭ «ەكەۋ», ي.ۆوۆنيانكونىڭ «ستريپتيزەردىڭ ءولىمى» پەسالارىن قازاقشالاسا, ءى.ەسەنبەرليننىڭ «عاشىقتار», ش.ايتماتوۆتىڭ «عاسىردان دا ۇزاق ءتۇن» روماندارىن, ر.وتارباەۆتىڭ «دۇنيە عايىپ» پوۆەسىن, و’گەنريدىڭ «ۇندىستەردىڭ كوسەمى» اڭگىمەسىن ساحناعا, ال م.اۋەزوۆتىڭ «اباي جولى» رومانىن تەلەارناعا لايىقتاپ ينستسەنيروۆكا جاسادى.
شىعارماشىلىق كەشىندە پرەمەراسى وتكەن ف.بوردوننىڭ «قارداعى كوگەرشىننىڭ ءىزى…» دراماسىن دا ءوزى اۋدارىپ, باس كەيىپكەر بەينەسىن سومدادى. سپەكتاكلدى ساحنالاعان – تىلەگەن احمەتوۆ. ال تىلەكتەس مەيراموۆپەن اكتەرلىك ءانسامبلدى اراي وماروۆا, شاح–مۇرات ورداباەۆ جانە ەرعۇلان جانپەيىسوۆ قۇرادى. قويىلىمدا ادامعا ءتان جالعىزدىق قۇساسى پسيحولوگيالىق شەڭبەردە سۋرەتتەلگەن. بۇل تۋىندى قازاق ساحناسىنا العاشقى رەت جول تارتىپ وتىر. تاعى ءبىر قوسارىمىز, كەش اياسىندا قالامگەر ۇلپان سەرىكبولقىزىنىڭ «اكتەر تىلەكتەس مەيراموۆ» كىتابىنىڭ تۇساۋكەسەرى ءوتتى. بۇل دا ءبىر مەرەيتوي يەسىنىڭ مارتەبەسىن كوتەرگەن تارتۋ بولدى.
