«حالىق سانىنىڭ وسۋىنە بايلانىستى استانا قالاسىنىڭ مەكتەپتەرىندە جىل سايىن وقۋشىلار سانى ورتاشا العاندا 15-18 مىڭ ادامعا كوبەيىپ كەلەدى. سول سەبەپتەن ءبىرىنشى كەزەكتە ينفراقۇرىلىم ماسەلەسى شەشىلۋدە. ويتكەنى وقۋشىلار سانىنىڭ وسۋىمەن قاتار, قۋاتتىق جوباسىنان ارتىق وقىتىپ جاتقان مەكتەپتەردىڭ سانى ارتتى» دەپ مالىمدەدى كەشە سەناتتاعى ۇكىمەت ساعاتىندا استانا قالاسى ءبىلىم بەرۋ باسقارماسىنىڭ باسشىسى ءانۋار جانعوزين. ول ەلوردادا بيىل 4 ءبىلىم بەرۋ نىسانى پايدالانۋعا بەرىلگەنىن, جىل سوڭىنا دەيىن 1200 ورىندىق تاعى ءبىر مەكتەپ تاپسىرىلاتىنىن حابارلادى.
17 مىڭ وقۋشىعا ورىن تاپشى
قۇزىرلى باسقارما جەتەكشىسى 2018-2019 وقۋ جىلدارىندا ەلوردانىڭ 5 مەكتەبى ءۇش اۋىسىمدىق جۇمىس تارتىبىنە كوشىرىلگەنىن جەتكىزدى. بۇدان بولەك, تاعى 20 مەكتەپتە ادام سانىنىڭ تىعىزدىعى بايقالادى. جالپى, وقۋشى ورىندارىنىڭ تاپشىلىعى 17 مىڭدى قۇرايدى ەكەن. بۇل ماسەلەنى شەشۋ ءۇشىن 2023 جىلعا دەيىن 120 مىڭ ورىن دايىنداۋ قاجەت. ءانۋار جانعوزيننىڭ ايتۋىنشا, ماڭىزدى ماسەلە, ەڭ الدىمەن, جاڭا نىسانداردى سالۋ مەن ىسكە قوسۋ ارقىلى شەشىلەدى. «بيىل 4 نىسان پايدالانۋعا بەرىلدى, جىل سوڭىنا دەيىن 1200 ورىندىق تاعى ءبىر مەكتەپ سالىنادى. ودان بولەك, 7 مەكتەپ پەن 6 جاپسارلاس عيماراتتىڭ قۇرىلىسى ءجۇرىپ جاتىر. ولار 2019 جىلى ىسكە قوسىلادى» دەدى ول.
ەلوردادا جەكەمەنشىك مەكتەپتەردىڭ سانى ارتۋدا. رەسمي مالىمەت بويىنشا 15 سونداي مەكتەپتىڭ 8-ىنە 3 مىڭ ورىنعا مەملەكەتتىك تاپسىرىس بەرىلگەن. بۇل مەكتەپتەردە ءبىر وقۋشىعا جىلىنا 160-تان 250 مىڭ تەڭگەگە دەيىن شىعىن جۇمسالادى. ءانۋار جانعوزين الداعى ۋاقىتتا ولاردىڭ (الپامىس, اقبۇلاق-1, «اقبۇلاق دامىتۋ ورتالىعى, ەكونوميكالىق ليتسەي, نۇروردا, ورتالىق ەكونوميكالىق مەكتەپ, ەلوردالىق, سپەكترۋم مەكتەبى, حەيليبەري) سانى كوبەيەتىنىن جەتكىزدى. «بۇل مەحانيزم بىزگە جەكەمەنشىك مەكتەپ سالاتىن جەكە ينۆەستورلاردى كوبىرەك تارتۋعا مۇمكىندىك بەرەدى. الداعى 3 جىلدا ءبىز باە جانە سينگاپۋر ينۆەستورلارىنىڭ ەسەبىنەن 6-7 مىڭ ورىندى جەكەمەنشىك مەكتەپتەردى اشۋدى جوسپارلاپ وتىرمىز» دەدى باسقارما باسشىسى.
2023 جىلعا دەيىن 5 مىڭ مۇعالىم قاجەت
باس قالاداعى ماڭىزدى ماسەلەنىڭ ءبىرى – مامان تاپشىلىعى. 20 جىلدىڭ ىشىندە ەلورداداعى مۇعالىمدەردىڭ سانى 3 مىڭنان 16 مىڭعا دەيىن ءوسىپتى. الايدا بالاباقشالار مەن مەكتەپتەردە باستاۋىش سىنىپ مۇعالىمدەرى جەتىسپەيدى. بۇگىنگى تاڭدا مۇعالىم تاپشىلىعى 100-گە جۋىق ادامدى قۇرايدى. 1500 مۇعالىمنىڭ زەينەتكەرلىككە شىعۋىن جانە جاڭا ءبىلىم بەرۋ مەكەمەلەرىندەگى بوس ورىنداردى ەسەپكە العاندا, 2023 جىلعا دەيىن استاناعا 5 مىڭعا جۋىق مۇعالىم قاجەت ەكەن. بۇل ءمالىمەت تە ۇكىمەت ساعاتىندا ايتىلدى.
بيىلعى وقۋ جىلىندا العاش رەت قالا اكىمىنىڭ باستاماسىمەن جوعارى وقۋ ورىندارىنا 323 مۇعالىم دايارلاۋعا گرانت بولىنگەن. سونىڭ ىشىندە 146-سى – مەكتەپكە دەيىنگى ءبىلىم بەرۋ مۇعالىمدەرى, 116-سى – باستاۋىش سىنىپ مۇعالىمدەرى, 61-ءى – ارنايى ءبىلىم بەرۋ ۇيىمدارىنىڭ مۇعالىمدەرى (دەفەكتولوگ, لوگوپەد جانە ت.ب.). جىل سايىن اكىمدىك كوللەدجدەردىڭ تۇلەكتەرىن جۇمىسقا شاقىرادى. «پەداگوگتاردىڭ بىلىكتىلىگىن ارتتىرۋ ماقساتىندا بيىل ءبىلىم بەرۋدى جەتىلدىرۋ ورتالىعىن اشتىق. بۇگىنگى تاڭدا 155 مەكتەپ باسشىلارى مەن ورىنباسارلارى ينكليۋزيۆتىك, مەنەدجمەنت بويىنشا ءبىلىم بەرۋ كۋرستارىن وقىپ ءجۇر. 1500-دەن اسا بالاباقشا تاربيەشىلەرى جاڭا باعدارلاما بويىنشا كۋرستى ءتامامدادى» دەدى ءا.جانعوزين.
ول ءبىلىم بەرۋ مەكەمەلەرىندە بالالاردىڭ كوشباسشىلىق قابىلەتىن شىڭداۋعا ەرەكشە كوڭىل بولىنەتىنىن ءمالىم ەتتى. بۇل باعىتتا «جاس ۇلان» بالالار-ءجاسوسپىرىمدەر ۇيىمىنىڭ ءرولى ەرەكشە. «ەلوردا مەكتەپتەرىنىڭ بارىندە ۇلانباسىلار تاعايىندالعان. بۇعان قوسا, ءبىز ورتالىق سايلاۋ كوميسسياسىمەن بىرلەسىپ, ءبىلىم بەرۋ ۇيىمدارىن باسقاراتىن كوشباسشىلار دەگەن جەكە ورگاندى سايلادىق. قانداي دا ءبىر جاڭا باستامانى ىسكە اسىراتىن كەزدە بىزدە جۇمىس ىستەيتىن وقۋشىلار توبى بار» دەپ ءتۇسىندىردى ءانۋار قاناتۇلى.
ونىڭ ايتۋىنشا, قالادا قوسىمشا ءبىلىم بەرۋ نىساندارىنىڭ دا سانى ارتۋدا. «قازىر قالادا 36 مىڭ وقۋشىنى قامتيتىن 11 نىسان بار. بىراق بۇل جەتكىلىكسىز. ءبىزدىڭ ماقساتىمىز – ءار بالانى ءوزى وقيتىن مەكتەبىندە قوسىمشا ءبىلىم بەرۋمەن قامتاماسىز ەتۋ» دەدى باسقارما باسشىسى.
